பிக்பாஸ் வரலாற்றில் சர்ச்சைக்குள்ளான பெண் போட்டியாளர்கள்: ஓவியாவிலிருந்து விஜே பார்வதி வரை

ரியாலிட்டி நிகழ்ச்சிகளில் மக்களின் பார்வையை முழுமையாக ஈர்க்கும் பிக்பாஸ் தொடர்ந்து சர்ச்சைகளையும் உருவாக்கி வருகிறது. தற்போது ஒளிபரப்பாகும் 9வது சீசனில் விஜே பார்வதி பெயர் மீண்டும் சர்ச்சையில் முன்னிலைக்கு வந்துள்ளது. இதற்கு முன்னரும் பல பெண் போட்டியாளர்கள் பிக்பாஸ் ஹவுஸில் சர்ச்சைக்குள்ளாகி, பெரும் பேச்சுக்களுக்கு உள்ளாகியுள்ளனர்.

முதல் சீசனில் ஓவியா அனைவரின் கவனத்தையும் ஈர்த்தார். ஆரம்ப நாட்களிலேயே ஹவுஸ்மேட்ஸின் எதிர்ப்பைச் சந்தித்த அவர், ஒரு கட்டத்தில் நீச்சல்குளத்தில் திடீரென குதித்து தற்கொலை முயற்சியில் ஈடுபட்டார். இது பெரும் புயலைக் கிளப்பியது. வெளியில் அவரது ஆதரவாளர்கள் "ஓவியா ஆர்மி" என்ற இயக்கத்தை உருவாக்கினர். இந்த சம்பவம் முதல் சீசனின் மிக முக்கிய நிகழ்வாக பேசப்பட்டது. அப்போது அவரை வார்த்தைகளால் தொடர்ந்து தாக்கிய ஜூலி மற்றும் காயத்ரி ரகுராம் ஆகியோரும் பெரும் விமர்சனங்களுக்கு உள்ளானார்கள்.

இரண்டாவது சீசனில் ஐஸ்வர்யா தத்தா, ஒரு போட்டியாளர் மீது குப்பையைக் கொட்டியதற்காக கடும் சர்ச்சையில் சிக்கினார். இருப்பினும், ரசிகர்களின் ஆதரவால் அவர் அந்த சீசனில் ரன்னர்-அப்பாக நின்றார்.

மூன்றாம் சீசனில் வனிதா முக்கிய கவனத்தை ஈர்த்தார். பிக்பாஸ் மூலம்தான் பலருக்கு அவர் பரிச்சயமானார். ஷெரினுக்கு எதிராக அவர் வெளியிட்ட கருத்துகள் பெரும் சர்ச்சையை உருவாக்கின. அதே சீசனில் நடிகை மதுமிதாவும் சர்ச்சைகளில் சிக்கினார். காவிரி பிரச்சினை குறித்து அவர் வெளியிட்ட கருத்துகளுக்கு எதிராக சில ஹவுஸ்மேட்ஸ் எழுந்தபோது, அவர் தனது கையை அறுத்துக்கொண்டு போட்டியிலிருந்து வெளியேற்றப்பட்டார்.

பிக்பாஸ் 7ல் பூர்ணிமா, மாயா, ஐஸ்வர்யா ஆகியோர், பிரதீப் ரெட் மீது பெண்களை அசௌகரியப்படுத்தியதாக குற்றச்சாட்டு வைத்தனர். இது பெரும் விவாதத்தை உருவாக்கியது. இருப்பினும், இந்த விவகாரம் பின்னர் மௌனத்தில் மறைந்தது.

தற்போதைய 9வது சீசனில் விஜே பார்வதி, கம்ருதீனுடனான நெருக்கமான உறவு காரணமாகவும், சான்ட்ராவை கார் டாஸ்கில் பலவந்தமாகத் தள்ளியதற்காகவும் பெரும் சர்ச்சைக்குள்ளானார். இதன் விளைவாக, அவரும் கம்ருதீனும் சேர்ந்தே ரெட் கார்டு பெற்று போட்டியில் இருந்து வெளியேற்றப்பட்டனர்.

இவ்வாறு, பிக்பாஸ் நிகழ்ச்சியின் வரலாற்றில் பல பெண் போட்டியாளர்கள் வெற்றியையும் விமர்சனத்தையும் சமமாக சந்தித்துள்ளனர்.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS