இதே தவறு தொடர்ந்தால் சூப்பர் 8-ல் இந்தியாவின் பயணம் முடியும்: வருண் ஆரோன் கடும் எச்சரிக்கை

அகமதாபாத் நகரில் நடைபெற்று வரும் 2026 டி20 உலகக்கோப்பை தொடரில் இந்திய அணி குரூப் சுற்றில் விளையாடிய நான்கு போட்டிகளிலும் வெற்றி பெற்று நம்பிக்கையுடன் சூப்பர் 8 சுற்றுக்கு முன்னேறியுள்ளது. பேட்டிங் மற்றும் பந்துவீச்சில் இந்திய அணி வலுவாக செயல்பட்டு வந்தாலும், ஃபீல்டிங் மற்றும் கேட்ச் பிடிப்பதில் தொடர்ச்சியாக சொதப்பி வருவது கடும் விமர்சனத்தை ஏற்படுத்தியுள்ளது.

இந்த நிலை குறித்து இந்திய அணியின் முன்னாள் வேகப்பந்து வீச்சாளரான வருண் ஆரோன் கடுமையான எச்சரிக்கையை வெளியிட்டுள்ளார். முக்கியமான நாக்அவுட் போட்டிகளிலும் இதே தவறு தொடர்ந்தால், இந்திய அணி தொடரை விட்டு வெளியேறும் அபாயம் இருப்பதாக அவர் தெரிவித்துள்ளார்.

இதுகுறித்து பேசிய வருண் ஆரோன், “இந்திய அணியின் ஃபீல்டிங் தற்போது மிகப்பெரிய பிரச்சனையாக உள்ளது. கடந்த 12 முதல் 18 மாதங்களாகவே கேட்ச் பிடிப்பதில் இந்தியா மிகவும் மோசமான அணியாகவே இருக்கிறது. அணியின் கேட்ச் பிடிக்கும் சதவீதம் 70-க்கும் குறைவாக உள்ளது. ஒவ்வொரு போட்டியிலும் குறைந்தது 2 அல்லது 3 கேட்ச்களை தவறவிடுகிறார்கள். லீக் சுற்றில் இது பெரிய பாதிப்பை ஏற்படுத்தாதபோதிலும், சூப்பர் 8 அல்லது அரையிறுதியில் இப்படியான தவறுகள் தோல்வியை உறுதி செய்யும்” என்று எச்சரித்துள்ளார்.

நெதர்லாந்து அணிக்கு எதிரான போட்டியிலும் இந்திய அணியின் ஃபீல்டிங் பலவீனம் வெளிப்பட்டது. அந்த அணியின் வீரர் லயன் கேஷட் அடித்த பந்தில் வந்த கேட்சை, கேப்டன் சூர்யகுமார் யாதவ் மற்றும் ரிங்கு சிங் ஆகியோர் ஒருவருக்கொருவர் தகவல் பரிமாற்றத்தில் ஏற்பட்ட குழப்பம் காரணமாக மோதிக்கொண்டு தவறவிட்டனர். அதேபோல் கடைசி ஓவரில் திலக் வர்மா ஒரு எளிய கேட்சையும் நழுவவிட்டார். நெதர்லாந்து போன்ற comparatively பலம் குறைந்த அணியாக இருந்ததால் இந்தியா அந்த போட்டியில் தப்பித்தது.

இந்த உலகக்கோப்பை தொடரில் இந்திய அணி இதுவரை நான்கு போட்டிகளில் விளையாடி மொத்தம் 9 கேட்ச்களை தவறவிட்டுள்ளது. அதிக கேட்ச்களை தவறவிட்ட அணிகள் பட்டியலில் அயர்லாந்து (10 கேட்ச்கள்) அடுத்ததாக இந்தியா இரண்டாவது இடத்தில் இருப்பது, ஒரு வலுவான அணிக்கு அழகல்ல என்ற விமர்சனத்தையும் எழுப்பியுள்ளது.

சூப்பர் 8 சுற்றில் இந்தியா தனது முதல் போட்டியில் பலம் வாய்ந்த தென்னாப்பிரிக்கா அணியை அகமதாபாத்தில் எதிர்கொள்கிறது. 2024 டி20 உலகக்கோப்பை இறுதிப்போட்டி யில் மோதிய அதே அணிகள் மீண்டும் சந்திப்பதால், இந்தப் போட்டி கடும் சவாலாக இருக்கும் என எதிர்பார்க்கப்படுகிறது. கிளாசென், மில்லர் போன்ற அதிரடி வீரர்களின் கேட்ச்களை தவறவிட்டால், அது போட்டியின் முடிவையே மாற்றிவிடும் சூழல் உருவாகும்.

எனவே, சூப்பர் 8 சுற்றுக்கு முன்பாகவே இந்திய அணி தனது ஃபீல்டிங் குறைகளை உடனடியாகச் சரிசெய்ய வேண்டும் என்பதே ரசிகர்கள் மற்றும் முன்னாள் வீரர்களின் ஒருமித்த எதிர்பார்ப்பாக உள்ளது. இல்லையெனில், பல விமர்சனங்களையும் அழுத்தங்களையும் இந்திய அணி எதிர்கொள்ள நேரிடும் என்ற கருத்து பரவலாக வலுப்பெற்று வருகிறது.