பும்ராவுக்கு ஓய்வு... பிசிசிஐ கடும் அதிருப்தி.. கம்பீர் - அகர்கர் எடுத்துள்ள அதிரடி தீர்மானம்!

இங்கிலாந்துக்கு எதிரான டெஸ்ட் தொடரில், இந்திய அணியின் வேகப்பந்து வீச்சாளர் ஜஸ்பிரித் பும்ரா மூன்று போட்டிகளில் மட்டுமே விளையாடியது பெரும் சர்ச்சையை ஏற்படுத்தியுள்ளது. 

வீரர்களின் பணிச்சுமை கையாளப்படும் விதம் குறித்து இந்திய கிரிக்கெட் கட்டுப்பாட்டு வாரியம் அதிருப்தியில் உள்ளதாகவும், இதன் காரணமாக விளையாட்டு அறிவியல் துறை (மீது கேள்விகள் எழுந்துள்ளதாகவும் தகவல் வெளியாகியுள்ளது.

இந்திய அணியின் நட்சத்திர வேகப்பந்து வீச்சாளரான ஜஸ்பிரித் பும்ராவுக்கு இங்கிலாந்துக்கு எதிரான டெஸ்ட் தொடரில் இரண்டு போட்டிகளில் ஓய்வு கொடுக்கப்பட்டதுடன்,  அவரது பணிச்சுமையை நிர்வகிக்கும் திட்டத்தின் ஒரு பகுதி என்று கூறப்பட்டது. 

எனினும், தொடரின் முக்கியமான கட்டத்தில் கூட பும்ரா விளையாடாதது, பிசிசிஐ உயர் அதிகாரிகளிடையே அதிருப்தியை ஏற்படுத்தியுள்ளதுடன், பெங்களூருவில் உள்ள தேசிய கிரிக்கெட் அகாடமியின் விளையாட்டு அறிவியல் துறையின் செயல்பாடுகள் குறித்தும் பிசிசிஐ கேள்வி எழுப்பியுள்ளது.

இந்திய அணியின் புதிய தலைமைப் பயிற்சியாளர் கம்பீர் மற்றும் தலைமைத் தேர்வாளர் அஜித் அகர்கர் ஆகியோர், வீரர்கள் தங்களுக்கு விருப்பமான போட்டிகளை மட்டும் தேர்ந்தெடுத்து விளையாடும் கலாசாரத்திற்கு முற்றுப்புள்ளி வைக்க முடிவு செய்துள்ளனர். 

இது தொடர்பாக பிசிசிஐ-யின் மத்திய ஒப்பந்தத்தில் உள்ள வீரர்களுக்கு விரைவில் கடுமையான உத்தரவுகள் பிறப்பிக்கப்படும் என்று எதிர்பார்க்கப்படுகிறது.

"வீரர்கள் தாங்களாகவே போட்டிகளைத் தேர்ந்தெடுத்து விளையாடும் கலாசாரம் எதிர்காலத்தில் ஏற்றுக்கொள்ளப்படாது. அதே சமயம், வேகப்பந்து வீச்சாளர்களின் பணிச்சுமை மேலாண்மை கைவிடப்படாது, எனினும், முக்கியமான போட்டிகளில் இருந்து விலகுவதை ஏற்க முடியாது" என இதுகுறித்து பிசிசிஐ-யின் மூத்த அதிகாரி ஒருவர் கூறியுள்ளார்.

இந்தத் தொடர் முழுவதும் சிராஜ் வெளிப்படுத்திய அயராத உழைப்பு, பணிச்சுமை மேலாண்மை குறித்த விவாதங்களை வேறு ஒரு கோணத்தில் பார்க்க வைத்துள்ளது. 

சிராஜால் ஐந்து போட்டிகளிலும் முழு உத்வேகத்துடன் பந்துவீச முடியும்போது, மற்ற வீரர்களுக்கு மட்டும் ஏன் இந்த விதிவிலக்கு என்ற கேள்வி எழுந்துள்ளது.

மொத்தத்தில், இந்திய கிரிக்கெட்டில் நட்சத்திர வீரர்களின் ஆதிக்கத்தைக் குறைத்து, அணித் தேர்வில் ஒரு புதிய, கடுமையான அணுகுமுறையை கம்பீர் மற்றும் அகர்கர் கூட்டணி கொண்டுவரத் தயாராகிவிட்டது.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS