அமெரிக்க குடியுரிமையை துறந்து இந்தியாவுக்காக விளையாடும் பனிச்சறுக்கு ராணி – யார் இவர்?

இந்தியாவில் பனிச்சறுக்கு (Figure Skating) பெரும்பாலானவர்களால் அறியப்பட்ட விளையாட்டு அல்ல. இருந்தாலும், சர்வதேச அரங்கில் இந்தியாவின் பெயரை உயர்த்தியவர் 25 வயதான தாரா பிரசாத். அமெரிக்காவில் பிறந்து வளர்ந்த இவர், இந்தியாவுக்கான ஆழமான பற்று காரணமாக அமெரிக்க குடியுரிமையை விட்டுவிட்டு இந்திய குடியுரிமையைத் தேர்வு செய்தது அவரது அர்ப்பணிப்பை வெளிப்படுத்துகிறது.

ஏழு வயதிலேயே பனிச்சறுக்கில் ஆரம்பித்த தாரா, விளையாட்டு மரபு கொண்ட குடும்பத்தைச் சேர்ந்தவர். அவரது தாயார் கவிதா பிரசாத், புகழ்பெற்ற இந்திய தடகள வீராங்கனை பி.டி. உஷாவுடன் பயிற்சி பெற்றவர் என்பது குறிப்பிடத்தக்கது. இந்த உழைப்பும் உறுதியும் தாராவின் விளையாட்டு பயணத்துக்கு வலுவான ஆதாரமாக அமைந்தது.

பொழுதுபோக்காக தொடங்கிய பனிச்சறுக்கு, காலப்போக்கில் தாராவுக்கு ஒரு தொழில்முறை இலக்காக மாறியது. இந்தியாவுக்காக விளையாடத் தொடங்கிய அவர், முதல் தேசிய சாம்பியன்ஷிப் போட்டியிலேயே தங்கம் வென்று அனைவரையும் ஆச்சரியப்படுத்தினார். பின்னர் இரு ஆண்டுகளிலும் தங்கத்தைத் தட்டி, மொத்தம் மூன்று முறை தேசிய சாம்பியனாக திகழ்ந்தார்.

தேசிய வெற்றிகளைத் தாண்டி சர்வதேச அரங்கில் அவர் படைத்த சாதனைகளே இந்திய பனிச்சறுக்கு வரலாற்றில் ஒரு புதிய அத்தியாயத்தை உருவாக்கின. இந்தியாவுக்காக சர்வதேசப்பதக்கம் வென்ற முதல் பனிச்சறுக்கு வீராங்கனை என்ற பெருமையை தாரா பெற்றுள்ளார். ஐஸ்லாந்தில் நடைபெற்ற ரெய்க்யவிக் கேம்ஸ் மற்றும் ஸ்லோவேனியாவின் ஸ்கேட் செல்ஜே ஆகிய இரு முக்கியப் போட்டிகளில் வெள்ளிப் பதக்கம் வென்று உலக அரங்கில் இந்தியாவின் தடத்தை பதித்தார்.

இதற்காக, இந்திய பனிச்சறுக்குச் சங்கத்தின் செயலாளர் அவரை “இந்தியா இதுவரை கண்ட சிறந்த பனிச்சறுக்கு வீராங்கனை” என பாராட்டியுள்ளார்.

இவ்வளவு வெற்றிகளுக்கு மத்தியிலும் காயங்கள் அவரை தாக்கி விடவில்லை. சமீபத்திய முதுகுக் காயம் காரணமாக 2026 குளிர்கால ஒலிம்பிக்ஸ் தகுதிச் சுற்றில் பங்கேற்க முடியாத நிலை ஏற்பட்டது. இருந்தாலும், இந்த சவால்கள் அவரது இலக்கை மாற்றவில்லை. இந்தியாவுக்காக தொடர்ந்து சர்வதேச மேடைகளில் பங்கேற்று பதக்கங்கள் வெல்ல தான் உறுதியுடன் இருப்பதாக தாரா தெரிவித்துள்ளார்.

தாரா பிரசாத் தனது தன்னம்பிக்கை, முயற்சி மற்றும் நாட்டுப்பற்று மூலமாக இளம் இந்திய விளையாட்டு வீரர்களுக்கு ஒரு உண்மையான முன்மாதிரியாக திகழ்கிறார்.