“3 மூட்டை கோதுமையை வித்துட்டு வந்தேன்…” – பனிமூட்டத்தால் ரத்தான டி20 போட்டியால் சோகத்தில் ரசிகர்கள்
மாலை 6:30 மணிக்கு நடக்க இருந்த இந்தப் போட்டிக்கான டாஸ் கூட போடப்படவில்லை. போட்டி நடத்தக்கூடிய நிலை இல்லை என்பதை உறுதிப்படுத்த, நடுவர்கள் 6:30 மணியிலிருந்து 9:00 வரை பலமுறை மைதானத்தை ஆய்வு செய்தனர்.
Editorial Staff 
இந்தியா – தென்னாப்பிரிக்கா இடையே லக்னோவில் நேற்று (புதன்கிழமை) நடக்க இருந்த நான்காவது டி20 போட்டி, கடும் பனிமூட்டம் மற்றும் பனிப்பொழிவு காரணமாக ஒரு பந்து கூட வீசப்படாமல் ரத்து செய்யப்பட்டது. இந்த முடிவு, ஆட்டத்தைக் காண ஆவலோடு வந்த ஆயிரக்கணக்கான ரசிகர்களின் ஏமாற்றத்தை உச்சக்கட்டத்திற்கு எடுத்துச் சென்றுள்ளது.
மைதானத்திற்கு வெளியே நின்றிருந்த ரசிகர்கள், போட்டி ரத்தானதை அறிந்தவுடன் கோபமும் வேதனையும் கலந்த குரலை எழுப்பினர். அவர்களில் ஒருவர், "நான் மூன்று மூட்டை கோதுமையை விற்று, அதன் பணத்தை வைத்து டிக்கெட் வாங்கி இங்கு வந்தேன்… எனக்கு என் பணம் திரும்ப வேண்டும்!" என்று கதறிய வீடியோ சமூக வலைதளங்களில் வைரலாகி வருகிறது.
மற்றொரு ரசிகர், “இந்திய அணியின் ஆட்டத்தைப் பார்க்கலாம் என்று ஆசையாக வந்தோம்… ஆனால் இதயம் உடைந்துவிட்டது” என்று சோகத்துடன் தெரிவித்தார்.
மாலை 6:30 மணிக்கு நடக்க இருந்த இந்தப் போட்டிக்கான டாஸ் கூட போடப்படவில்லை. போட்டி நடத்தக்கூடிய நிலை இல்லை என்பதை உறுதிப்படுத்த, நடுவர்கள் 6:30 மணியிலிருந்து 9:00 வரை பலமுறை மைதானத்தை ஆய்வு செய்தனர். ஆனால், எதிரே இருப்பவர் தெரியாத அளவுக்கு பனிமூட்டம் அடர்த்தியாகவும், பிட்ச்சில் பனிப்பொழிவு காரணமாக வழுக்கும் நிலை ஏற்பட்டதால், ஆட்டத்தை கைவிட வேண்டியதாயிற்று.
இந்த நிலையில், டிசம்பர் மாதத்தில் வட இந்தியாவில் கடும் பனிமூட்டம் இருக்கும் என்பது அனைவருக்கும் தெரிந்த உண்மை. இருந்தும், இரவு நேரப் போட்டியை லக்னோவில் திட்டமிட்டது பிசிசிஐ செய்த தவறான முடிவு என்று ரசிகர்கள் கடுமையாக விமர்சித்து வருகின்றனர். “பணத்தைத் திருப்பிக் கொடுங்கள்” என்ற கோஷத்துடன், சமூக வலைதளங்களில் இந்த ஹேஷ்டேக் ட்ரெண்டாகி வருகிறது.
தற்போது, இந்தியா 2-1 என்ற கணக்கில் இந்த தொடரில் முன்னிலை வகிக்கிறது. தொடரின் வெற்றியாளரைத் தீர்மானிக்கும் ஐந்தாவது மற்றும் இறுதி டி20 போட்டி, நாளை (டிசம்பர் 19) அகமதாபாத்தில் உள்ள நரேந்திர மோடி மைதானத்தில் நடக்க உள்ளது. ரசிகர்கள் இப்போது அங்காவது பனிமூட்டம் இல்லாமல், முழுமையான ஆட்டத்தைப் பார்க்க முடியும் என்று ஆவலோடு எதிர்பார்த்துக் காத்திருக்கின்றனர்.
WHATSAPP CHANNEL
GOOGLE NEWS
