இந்தியா vs பாகிஸ்தான்: ஹர்திக் பாண்டியா படைத்த மாபெரும் சாதனைகள்

பாகிஸ்தானுக்கு எதிராக நடந்த 2025 ஆசிய கோப்பை சூப்பர் 4 போட்டியில், இந்திய அணியின் நட்சத்திர ஆல்-ரவுண்டர் ஹர்திக் பாண்டியா மாபெரும் சாதனையைப் படைத்துள்ளார். 

துபாயில் நடந்த இந்தப் போட்டியின் மூலம், அவர் மூன்று முக்கிய சாதனைகளைப் படைத்து அசத்தியுள்ளார். 

ஹர்திக் பாண்டியா, ஆசிய கோப்பை டி20 தொடரில் இந்தியாவுக்காக அதிக விக்கெட்டுகளை வீழ்த்திய வீரர் என்ற பெருமையைப் பெற்றுள்ளார். இந்தச் சாதனையை இதற்கு முன்பு தன்வசம் வைத்திருந்த புவனேஷ்வர் குமாரை அவர் பின்னுக்குத் தள்ளினார்.

பாண்டியா, இந்தப் போட்டியின் இரண்டாவது ஓவரின் மூன்றாவது பந்தில், பாகிஸ்தான் வீரர் ஃபக்கர் ஜமானின் விக்கெட்டை வீழ்த்தினார். ஜமான் 9 பந்துகளில் 15 ரன்கள் எடுத்திருந்த நிலையில், விக்கெட் கீப்பர் சஞ்சு சாம்சனிடம் கேட்ச் கொடுத்து ஆட்டமிழந்தார்.

இந்த ஒரு விக்கெட், ஹர்திக் பாண்டியாவின் ஆசிய கோப்பை டி20 விக்கெட்டுகளின் எண்ணிக்கையை 14 ஆக உயர்த்தியது. ஹர்திக் பாண்டியா 12 போட்டிகளில் 14 விக்கெட்டுகளுடன் (சிறந்த பந்துவீச்சு 3/8) முதலிடத்தில் உள்ளார்.

இதற்கு முன்பு முதலிடத்தில் இருந்த புவனேஷ்வர் குமார், 6 போட்டிகளில் 13 விக்கெட்டுகளை (சிறந்த பந்துவீச்சு 5/4) வீழ்த்தியிருந்தார். மற்ற இந்திய பந்துவீச்சாளர்களில், ஜஸ்பிரித் பும்ரா 8 போட்டிகளில் 9 விக்கெட்டுகளுடனும், குல்தீப் யாதவ் 4 போட்டிகளில் 8 விக்கெட்டுகளுடனும் உள்ளனர்.

இந்தச் சாதனையை நிகழ்த்தியதன் மூலம், ஆசிய கோப்பை டி20 வரலாற்றில் அதிக விக்கெட்டுகள் வீழ்த்திய வீரர்கள் பட்டியலில் பாண்டியா முதலிடத்தை ஆப்கானிஸ்தானின் ரஷித் கான் மற்றும் இலங்கையின் வனிந்து ஹசரங்கா ஆகியோருடன் பகிர்ந்து கொண்டுள்ளார்.

மூன்று வீரர்களும் தலா 14 விக்கெட்டுகளுடன் சமநிலையில் உள்ளனர். இந்தப் போட்டியில் பாண்டியா இன்னும் ஒரு விக்கெட் வீழ்த்தினால், அவர் தனித்து முதலிடத்தைப் பிடிப்பார். ஷித் கான் 11 போட்டிகளிலும், வனிந்து ஹசரங்கா 10 போட்டிகளிலும் 14 விக்கெட்டுகளை எடுத்துள்ளனர். பாண்டியா 12 போட்டிகளில் 14 விக்கெட்டுகளை எடுத்துள்ளார்.

ஃபக்கர் ஜமானின் விக்கெட், சர்வதேச டி20 போட்டிகளில் ஹர்திக் பாண்டியாவின் விக்கெட்டுகளின் எண்ணிக்கையை 97 ஆக உயர்த்தியது. இதன் மூலம், பாண்டியா இதுவரை 96 விக்கெட்டுகளை வீழ்த்தியிருந்த யுஸ்வேந்திர சாஹலை முந்தி, சர்வதேச டி20 அரங்கில் இந்தியாவுக்காக அதிக விக்கெட்டுகளை வீழ்த்திய வீரர்கள் பட்டியலில் இரண்டாவது இடத்திற்கு முன்னேறியுள்ளார்.

சர்வதேச டி20 போட்டிகளில் இந்தியாவுக்காக அதிக விக்கெட்டுகளை வீழ்த்தியவர், சமீபத்தில் ஓமனுக்கு எதிரான போட்டியில் 100 விக்கெட்டுகளை வீழ்த்திய அர்ஷ்தீப் சிங் ஆவார். அர்ஷ்தீப் சிங்: 64 போட்டிகள், 100 விக்கெட்டுகள். ஹர்திக் பாண்டியா: 118* போட்டிகள், 97 விக்கெட்டுகள். யுஸ்வேந்திர சாஹல்: 80 போட்டிகள், 96 விக்கெட்டுகள்.