3-வது டி20 போட்டி: மேற்கிந்தியத் தீவுகளை வீழ்த்தி இந்திய அணி வெற்றி
இந்தூரில் நடைபெற்ற 3-ஆவது டி20 கிரிக்கெட் போட்டியில் மேற்கிந்தியத் தீவுகள் அணியை 14 ஓட்டங்கள் வித்தியாசத்தில் வீழ்த்திய இந்திய அணி, 5 போட்டிகள் கொண்ட தொடரில் 2-1 என முன்னிலை பெற்றுள்ளது.
இந்தியாவில் சுற்றுப்பயணம் மேற்கொண்டுள்ள மேற்கிந்தியத் தீவுகள் கிரிக்கெட் அணி 5 போட்டிகள் கொண்ட இருபதுக்கு 20 தொடரில் விளையாடி வருகிறது. இதில் நேற்று நடைபெற்ற 3-ஆவது போட்டியில் இந்திய அணி 14 ஓட்டங்கள் வித்தியாசத்தில் வெற்றி பெற்று, தொடரில் 2-1 என்ற கணக்கில் முன்னிலை பெற்றுள்ளது.
இந்தூரில் உள்ள ஹோல்கர் கிரிக்கெட் மைதானத்தில் நடைபெற்ற இந்தப் போட்டியில் நாணயச்சுழற்சியில் வெற்றி பெற்ற மேற்கிந்தியத் தீவுகள் அணி முதலில் களத்தடுப்பைத் தேர்வு செய்தது. இதையடுத்து களமிறங்கிய இந்திய அணி 20 ஓவர்களில் அனைத்து விக்கெட்டுகளையும் இழந்து 223 ஓட்டங்களைக் குவித்தது.
அதிரடியாக ஆடிய ஆரம்ப துடுப்பாட்ட வீரர் அபிஷேக் சர்மா 30 பந்துகளில் 6 நான்கு ஓட்டங்கள், 5 ஆறு ஓட்டங்கள் உட்பட 69 ஓட்டங்களைப் பெற்றார். இஷான் கிஷன் 37 ஓட்டங்களையும், திலக் வர்மா 28 ஓட்டங்களையும் சேர்த்தனர். மேற்கிந்தியத் தீவுகள் தரப்பில் ஷமர் ஸ்பிரிங்கர் மற்றும் ஷமர் ஜோசப் தலா 2 விக்கெட்டுகளை வீழ்த்தினர்.
தொடர்ந்து 224 ஓட்டங்கள் என்ற வெற்றி இலக்கை நோக்கிப் பதிலளித்தாடிய மேற்கிந்தியத் தீவுகள் அணி 20 ஓவர்கள் முடிவில் 7 விக்கெட்டுகளை இழந்து 209 ஓட்டங்களை மட்டுமே எடுத்தது.
அந்த அணியில் அதிகபட்சமாக ஷிம்ரன் ஹெட்மையர் 43 ஓட்டங்களும், கமில் பூரன் 42 ஓட்டங்களும் எடுத்தனர். இந்திய அணித் தரப்பில் அர்ஷ்தீப் சிங் 3 விக்கெட்டுகளையும், நமன் திர் 2 விக்கெட்டுகளையும் கைப்பற்றி அணியின் வெற்றியை உறுதி செய்தனர்.
