பாகிஸ்தான் அணிக்கு எதிராக ராவல்பிண்டியில் நடைபெற்று வரும் முதலாவது டெஸ்ட் போட்டியில் அபாரமாகத் துடுப்பெடுத்தாடிய இலங்கை அணியின் புதிய தலைவர் குசல் மெண்டிஸ், இலங்கை கிரிக்கெட் வரலாற்றில் புதிய மைல்கல்லொன்றை எட்டியுள்ளார்.
தனஞ்சய டி சில்வாவிற்குப் பதிலாக இலங்கை டெஸ்ட் அணியின் முழுநேரத் தலைவராக நியமிக்கப்பட்ட குசல் மெண்டிஸ், அப்பொறுப்பை ஏற்ற முதலாவது போட்டியிலேயே சதம் விளாசி, டெஸ்ட் கிரிக்கெட் வரலாற்றில் இச்சாதனையைப் படைத்த முதலாவது இலங்கை வீரர் என்ற பெருமையைத் தனதாக்கிக்கொண்டார்.
போட்டியின் மூன்றாம் நாளான வியாழக்கிழமை (12) பொறுப்புடன் ஆடிய குசல் மெண்டிஸ், ஆட்டமிழக்காமல் 117 ஓட்டங்களைக் குவித்தார். இதன் மூலம் சர்வதேச டெஸ்ட் அரங்கில் அணித்தலைவராக அறிமுகமான முதலாவது போட்டியிலேயே சதம் கடந்த 37ஆவது வீரர் என்ற சிறப்பையும் அவர் பெற்றுள்ளார்.
அத்துடன், பாகிஸ்தான் அணிக்கு எதிராகத் தலைவராக அறிமுகமான டெஸ்ட் போட்டியில் சதம் அடித்த இரண்டாவது சர்வதேச வீரர் என்ற சாதனையையும் மெண்டிஸ் படைத்துள்ளார். இதற்கு முன்னர் இங்கிலாந்தின் முன்னாள் தலைவர் ஆண்ட்ரூ ஸ்ட்ராஸ் மட்டுமே இச்சாதனையைப் பதிவு செய்திருந்தார்.
இப்போட்டியில் இலங்கை அணி 42 ஓவர்களில் 155 ஓட்டங்களுக்கு 4 விக்கெட்டுகளை இழந்து நெருக்கடியான நிலையில் காணப்பட்டது. அந்தத் தருணத்தில் களத்தில் நிலைத்து நின்று ஆடிய குசல் மெண்டிஸ், 5ஆவது விக்கெட்டுக்காக 360 பந்துகளில் ஆட்டமிழக்காமல் 249 ஓட்டங்களைப் பகிர்ந்து அணியை வலுவான நிலைக்குக் கொண்டு சென்றார்.
ரசாவுல்லா வீசிய 92ஆவது ஓவரின் மூன்றாவது பந்தில் பவுண்டரி விளாசியதன் மூலம் 152 பந்துகளில் தனது சதத்தைப் பூர்த்தி செய்த மெண்டிஸ், இதுவரை 188 பந்துகளை எதிர்கொண்டு 10 பவுண்டரிகள் மற்றும் 4 சிக்ஸர்கள் அடங்கலாக 117 ஓட்டங்களுடன் களத்தில் உள்ளார். மூன்றாம் நாள் ஆட்டநேர முடிவில் இலங்கை அணி 102 ஓவர்களில் 4 விக்கெட்டுகளை இழந்து 404 ஓட்டங்களைக் குவித்துள்ளது.
இதேவேளை, இந்த ஆட்டத்தின் மூலம் சர்வதேச கிரிக்கெட்டின் அனைத்து வடிவங்களிலும் (டெஸ்ட், ஒருநாள் மற்றும் இருபதுக்கு-20) மொத்தமாக 13,000 ஓட்டங்களைக் கடந்த 8ஆவது இலங்கை வீரர் என்ற பெருமையையும் குசல் மெண்டிஸ் பெற்றுள்ளார். குமார் சங்கக்கார, மஹேல ஜயவர்தன மற்றும் சனத் ஜயசூரிய ஆகிய முன்னாள் ஜாம்பவான்களின் வரிசையில் அவரும் இணைந்துள்ளார்.
இதுவரை 76 டெஸ்ட் போட்டிகளில் விளையாடி 4,953 ஓட்டங்களைக் குவித்துள்ள குசல் மெண்டிஸ், டெஸ்ட் அரங்கில் 5,000 ஓட்டங்கள் என்ற மைல்கல்லை எட்டுவதற்கு இன்னும் 47 ஓட்டங்கள் மாத்திரமே தேவையாகவுள்ளது.
