நல்லூரில் திலீபனின் சிலை அகற்றப்பட்டமைக்கும் அரசாங்கத்திற்கும் தொடர்பில்லை: அமைச்சர் இராமலிங்கம் சந்திரசேகரன்
திலீபனின் சிலை அகற்றப்பட்டமைக்கும் தேசிய மக்கள் சக்தி அரசாங்கத்திற்கும் தொடர்பில்லை என்றும், மாநகரசபையின் தீர்மானமின்மையால் பொலிஸார் இந்நடவடிக்கையை எடுத்துள்ளதாகவும் அமைச்சர் இராமலிங்கம் சந்திரசேகரன் தெரிவித்துள்ளார்
தியாக தீபம் திலீபனின் சிலை அகற்றப்பட்ட சம்பவத்திற்கும் தேசிய மக்கள் சக்தி அரசாங்கத்திற்கும் எவ்வித தொடர்பும் இல்லை என கடற்றொழில் அமைச்சர் இராமலிங்கம் சந்திரசேகரன் தெரிவித்துள்ளார்.
பூநகரி பிரதேச செயலகத்தில் இடம்பெற்ற கலந்துரையாடலைத் தொடர்ந்து ஊடகங்களுக்குக் கருத்து வெளியிட்டபோதே அவர் இதனைக் குறிப்பிட்டார்.
மாநகரசபை எடுக்க வேண்டிய தீர்மானங்களை உரிய முறையில் எடுக்கத் தவறியதன் காரணமாகவே பொலிஸார் இந்நடவடிக்கையை முன்னெடுத்துள்ளதாகத் தெரிவித்த அமைச்சர், மாநகரசபையும் பொலிஸாரும் தத்தமது எல்லைக்குட்பட்ட கடமைகளைச் சரியாகச் செய்யாததன் விளைவே இச்சம்பவம் எனவும், இது குறித்து விரிவாக ஆராய்ந்து எதிர்காலத்தில் உரிய முடிவுகள் எடுக்கப்படும் எனவும் விளக்கமளித்தார்.
தென்னிலங்கை மற்றும் வடக்கிலுள்ள ஒரு சில அரசியல்வாதிகள் தங்களின் குறுகிய அரசியல் நலன்களுக்காக மக்களிடையே மீண்டும் இனவாதம், மதவாதம் மற்றும் பிளவுகளை உருவாக்க முனைகின்றனர் என்று அமைச்சர் குற்றம் சுமத்தினார்.
தென்னிலங்கையில் ஊழல் மற்றும் மோசடிகளில் ஈடுபட்ட அரசியல்வாதிகள் சட்டம் விரைவுபடுத்தப்பட்டுள்ளதால் சிறை செல்ல நேரிடும் என்ற அச்சத்தில் அரசாங்கத்தைக் கவிழ்க்கவும், மீண்டும் கலவரங்களைத் தூண்டவும் எத்தனிக்கின்றனர் எனவும் அவர் கூறினார்.
அதேநேரம் வடக்கிலுள்ள அரசியல்வாதிகள் தமிழ் மக்களின் உண்மையான பிரச்சினைகள் குறித்துப் பேசுவதையோ, நலத்திட்டங்களை வரவேற்பதையோ தவிர்த்து, கடந்த தேர்தலில் மக்கள் தேசிய மக்கள் சக்திக்கு வழங்கிய பேராதரவைப் பொறுத்துக்கொள்ள முடியாமல் இவ்வாறான செயற்பாடுகளில் ஈடுபடுவதாகவும் அமைச்சர் இராமலிங்கம் சந்திரசேகரன் மேலும் சுட்டிக்காட்டினார்.
