மேல் மாகாணத்திற்குள் சேவையில் ஈடுபடும் பயணிகள் பஸ்களுக்கான வழித்தட அனுமதிப்பத்திரத்தை மாதாந்தம் புதுப்பிக்கும் புதிய நடைமுறையால், பஸ் தொழில்துறையினர் பாரிய நெருக்கடிகளை எதிர்நோக்கியுள்ளதாக இலங்கை தனியார் பஸ் உரிமையாளர்கள் சங்கம் தெரிவித்துள்ளது.
இதுவரை வருடாந்தம் முன்னெடுக்கப்பட்டு வந்த அனுமதிப்பத்திரம் புதுப்பிக்கும் நடைமுறையை மாற்றி, இம்மாதம் முதலாம் திகதி முதல் மாதாந்த அடிப்படையில் அதனை மேற்கொள்வதற்கு மேல் மாகாண வீதிப் பயணிகள் போக்குவரத்து அதிகாரசபை நடவடிக்கை எடுத்துள்ளதாக அச்சங்கத்தின் தலைவர் கெமுனு விஜேரத்ன சுட்டிக்காட்டியுள்ளார்.
குறித்த புதிய நடைமுறைக்கு எதிர்ப்பு தெரிவித்து, இலங்கை மனித உரிமைகள் ஆணைக்குழுவில் முறைப்பாடொன்றை முன்வைத்ததன் பின்னர் ஊடகங்களுக்குக் கருத்து வெளியிடுகையிலேயே அவர் இதனைக் குறிப்பிட்டுள்ளார்.
இது தொடர்பில் அவர் மேலும் தெரிவிக்கையில், தொழிற்சங்கப் போராட்டமான பணிப்புறக்கணிப்பிற்குச் செல்லாமல், தமக்குரிய நீதியைப் பெற்றுக்கொள்ளும் நோக்கிலேயே மனித உரிமைகள் ஆணைக்குழுவை நாடியுள்ளதாகத் தெரிவித்துள்ளார்.
வழித்தட அனுமதிப்பத்திரத்தை மாதாந்தம் நீடிக்கும் நடைமுறைக்கு எதிராகச் சுமார் 10 முதல் 12 வருடங்களுக்கு முன்னர் தம்மால் உயர் நீதிமன்றத்தில் தீர்ப்பொன்று பெறப்பட்டிருந்ததாக கெமுனு விஜேரத்ன நினைவுபடுத்தியுள்ளார்.
தற்போது மேல் மாகாண வீதிப் பயணிகள் போக்குவரத்து அதிகாரசபையின் இந்தச் செயற்பாடானது, குறித்த உயர் நீதிமன்றத் தீர்ப்பையும் தடை உத்தரவையும் மீறும் வகையிலான அநீதியான நடவடிக்கையாகும் என அவர் குற்றம் சுமத்தியுள்ளார்.
வாகனங்களுக்கான வருமான அனுமதிப்பத்திரம் மற்றும் காப்புறுதிச் சான்றிதழ் என்பன வருடாந்த அடிப்படையிலேயே வழங்கப்படுகின்றன. அவ்வாறிருக்கையில், வழித்தட அனுமதிப்பத்திரத்தை மட்டும் மாதாந்தம் புதுப்பிப்பதற்குத் தேவையான ஆவணங்களை ஒவ்வொரு மாதமும் தயாரித்துச் சமர்ப்பிப்பது நடைமுறைச் சாத்தியமற்ற பாரிய சிக்கலாகும் என அவர் சுட்டிக்காட்டியுள்ளார்.
இந்தத் தீர்மானத்தினால் பஸ் உரிமையாளர்கள் மட்டுமன்றி, அன்றாடப் போக்குவரத்துக்காகப் பஸ்களைப் பயன்படுத்தும் பொதுமக்களும் கடுமையாகப் பாதிக்கப்படுவதாகவும், எனவே இதற்கு உரிய நீதி கிடைக்க வேண்டும் எனவும் இலங்கை தனியார் பஸ் உரிமையாளர்கள் சங்கத்தின் தலைவர் வலியுறுத்தியுள்ளார்.
