த்ரில்லர் சினிமா பார்த்தால் அபார்ஷன் ஆகுமா? மருத்துவர் பதில்

த்ரில்லர் படக் காட்சியைப் பார்த்ததால் தனக்கு அபார்ஷன் (கருச்சிதைவு) ஆனதாக சமீபத்தில் ஒரு நடிகை தனது பேட்டியில் தெரிவித்திருந்தார். பொதுவாகவே த்ரில்லர் படங்கள் ஆரம்பிப்பதற்கு முன், வயதானவர்கள், குழந்தைகள், கர்ப்பிணிகள் பார்க்க வேண்டாம் என்பது போன்ற எச்சரிக்கை (டிஸ்கிளெய்மர்) போடப்படுவதை நாம் பார்த்திருக்கிறோம். இந்தச் சூழலில், த்ரில்லர் காட்சிகளைப் பார்ப்பதால் ஒருவருக்கு அபார்ஷன் ஆக வாய்ப்பு உண்டா என்ற கேள்வி எழுகிறது. இதற்குப் பதிலளிக்கும் விதமாக, கோவை, கிணத்துக்கடவையைச் சேர்ந்த மகப்பேறு மருத்துவர் ஸ்ரீதேவி விளக்கம் அளித்துள்ளார்.

கர்ப்பத்தின் ஆரம்பகாலத்தில் அபார்ஷன் ஆவதற்குப் பல காரணங்கள் இருக்கலாம். உதாரணத்திற்கு, மரபணு தொடர்பான காரணங்கள் மிக முக்கியமானவை. அபார்ஷன் ஆவதற்கு 50 முதல் 70 சதவிகிதம் இந்த மரபணுக் காரணங்களே பிரதானமாக இருக்கின்றன. முதல் டிரைமெஸ்டர் எனப்படும் கர்ப்பத்தின் முதல் முப்பருவத்தில் (7 முதல் 8 வாரங்களில்) இதனாலேயே அபார்ஷன் ஏற்படுகிறது. அடுத்த முக்கிய காரணம், ஹார்மோன் சமநிலையின்மை. தைராய்டு பாதிப்பு, சர்க்கரைநோய் இருந்தாலோ, தீவிர பி.சி.ஓ.எஸ் பாதிப்புடன் கருத்தரித்திருந்தாலோ அந்த நிலைகளில் அபார்ஷன் ஆவதற்கான வாய்ப்புகள் அதிகம். கர்ப்பப்பையில் பிரச்சினைகள் இருந்தாலும் கரு கலையலாம் - எடுத்துக்காட்டாக, ஃபைப்ராய்டு கட்டிகள் இருந்தாலோ, செப்டம் எனப்படும் சுவர் போன்ற பிளவு இருந்தாலோ கூட அபார்ஷன் ஏற்படலாம்.

பிறவியிலேயே கர்ப்பப்பையில் ஏற்பட்ட கோளாறுகள், 35 வயதுக்கு மேல் கருத்தரித்தல், சில வகையான தொற்றுகள் (இன்ஃபெக்ஷன்), மதுப் பழக்கம், புகைப் பழக்கம், தூக்கமின்மை, மன அழுத்தம் (ஸ்ட்ரெஸ்) போன்றவற்றாலும் அபார்ஷன் ஆகலாம். ஆட்டோ இம்யூன் குறைபாடுகள், சிறுநீரகப் பாதிப்புகள், அனீமியா எனப்படும் ரத்தச் சோகை, நச்சுத்தன்மை வாய்ந்த கெமிக்கல்களுடன் தொடர்பில் இருப்பது போன்றவையும் காரணங்களாக அமையலாம். எனினும், த்ரில்லர் படம் பார்த்ததால் மட்டுமே அபார்ஷன் ஆகிவிடாது என மருத்துவர் ஸ்ரீதேவி தெளிவுபடுத்துகிறார்.

ஏற்கெனவே கர்ப்பப்பைப் பலவீனமாக இருப்பது, 'திரெட்டெண்டு அபார்ஷன்' (threatened abortion) எனப்படும் நிலையில் ரத்தப்போக்கு ஏற்பட்டிருப்பது என ஏதோ ஒரு பிரச்சினை இருக்கும் நிலையில், திடீரெனத் தீவிர மன அழுத்தம் ஏற்பட்டு ஸ்ட்ரெஸ் ஹார்மோன் அதிகம் சுரக்கும். அந்தச் சூழலில் த்ரில்லர் காட்சிகளைப் பார்ப்பது மன அழுத்தத்தைத் தூண்டும் ஒரு காரணியாக இருக்கலாமே தவிர, அதுவே கரு கலைவதற்கான முழுக் காரணமாக இருக்காது. எனவே, இதுபோன்ற செய்திகளைப் படித்துவிட்டு, கர்ப்பிணிகள் திரைப்படங்களையே பார்க்க வேண்டாம் என்ற முடிவுக்கு வரத் தேவையில்லை. சோகப்படம், த்ரில்லர் படங்கள் எல்லாவற்றையும் பார்ப்பது, ஆரோக்கியமான கர்ப்பத்தை எந்த வகையிலும் பாதிக்காது.

கர்ப்பமாக இருக்கும்போது நல்ல ஓய்வு, போதுமான தூக்கம், குடும்பத்தினரின் ஆதரவு, நேர்மறையான (பாசிட்டிவ்) சிந்தனை போன்றவை இருப்பதை உறுதிசெய்துகொள்வது மிகவும் முக்கியம். மேலும், கர்ப்பத்தின்போது ஏதேனும் உடல்நலச் சிக்கல்கள் அல்லது அசௌகரியங்கள் ஏற்பட்டால், சுயமாக முடிவுகளை எடுப்பதைத் தவிர்த்து, உடனடியாக ஒரு மகப்பேறு மருத்துவரை அணுகி ஆலோசனை பெறுவது அவசியம்.

பொறுப்புத் துறப்பு: இக்கட்டுரையில் வழங்கப்படும் தகவல்கள் தகுதிவாய்ந்த மகப்பேறு மருத்துவரின் கருத்துகளை அடிப்படையாகக் கொண்டவை. எனினும், ஒவ்வொரு கர்ப்பமும் தனித்துவமானது. கர்ப்பம், மன அழுத்தம் அல்லது வேறு ஏதேனும் உடல்நலப் பிரச்சினைகள் குறித்து மருத்துவ ஆலோசனை தேவைப்பட்டால், நேரடியாக ஒரு பதிவு செய்யப்பட்ட மருத்துவரை அணுகுவதே சிறந்தது. இக்கட்டுரை பொதுவான விழிப்புணர்விற்காக மட்டுமே.