ஐ.பி.எல் தொடரிலிருந்து ஓய்வு பெற்றார் எம்.எஸ். தோனி; மனைவி சாக்சி நெகிழ்ச்சிப் பதிவு

இந்திய கிரிக்கெட் அணியின் முன்னாள் தலைவரும், சென்னை சூப்பர் கிங்ஸ் (CSK) அணியின் நட்சத்திர வீரருமான எம்.எஸ். தோனி, ஐ.பி.எல் (IPL) கிரிக்கெட் தொடரிலிருந்து வீரராக ஓய்வு பெறுவதாக அறிவித்துள்ளார். இதனைத் தொடர்ந்து, கடந்த 18 ஆண்டுகளாகத் தோனிக்கு ஆதரவளித்து வரும் ரசிகர்களுக்கு நன்றி தெரிவித்து அவரது மனைவி சாக்சி சிங் தோனி இன்ஸ்டாகிராமில் வெளியிட்டுள்ள பதிவு சமூக வலைத்தளங்களில் வைரலாகி வருகின்றது.

சாக்சி தனது பதிவில், அழகான புதிய அத்தியாயங்கள் தொடங்குவதற்குச் சில அத்தியாயங்கள் முடிவுக்கு வர வேண்டும் எனவும், இத்தனை ஆண்டுகளாக மஹியை நேசித்து, ஆதரவளித்து, நம்பிக்கை வைத்த அனைவருக்கும் இதயப்பூர்வமான நன்றிகள் எனவும் குறிப்பிட்டுள்ளார். புதிய தொடக்கங்கள், புதிய சாகசங்கள் மற்றும் பல அழகான நினைவுகளுக்கு வாழ்த்துக்களைத் தெரிவித்துள்ள அவர், உன்னை நினைத்து எப்போதும் பெருமைப்படுகிறேன் மஹி என நெகிழ்ச்சியுடன் பதிவிட்டுள்ளார்.

சமூக வலைத்தளங்களில் அதிகம் செயற்படாத தோனியும், தனது இன்ஸ்டாகிராம் பக்கத்தில் ஓய்வு தொடர்பான காணொளியொன்றை வெளியிட்டு ரசிகர்களின் அன்பிற்கு நன்றி தெரிவித்துள்ளார். ஐ.பி.எல் தொடரில் வீரராகத் தனது பயணத்தை நிறைவு செய்துள்ள போதிலும், சென்னை சூப்பர் கிங்ஸ் அணியின் ஆலோசகராக அவர் புதிய பொறுப்பை ஏற்கவுள்ளார்.

காயம் மற்றும் உடற்தகுதி சார்ந்த காரணங்களால் 45 வயதான தோனி, இந்த ஆண்டின் ஆரம்பத்தில் நடைபெற்ற ஐ.பி.எல் தொடரில் சென்னை சூப்பர் கிங்ஸ் அணியின் 14 லீக் போட்டிகளிலும் விளையாடவில்லை என்பது குறிப்பிடத்தக்கது. 2004 ஆம் ஆண்டு டிசம்பர் மாதம் பங்களாதேஷ் அணிக்கு எதிரான போட்டியின் ஊடாகச் சர்வதேச கிரிக்கெட்டில் அறிமுகமான தோனி, 2020 ஆம் ஆண்டு ஆகஸ்ட் 15 ஆம் திகதி சர்வதேசப் போட்டிகளிலிருந்து ஓய்வு பெற்றார். 2019 ஒருநாள் உலகக் கிண்ணத் தொடரில் நியூசிலாந்து அணிக்கு எதிரான அரையிறுதிப் போட்டியே இந்திய அணிக்காக அவர் விளையாடிய இறுதிச் சர்வதேசப் போட்டியாகும்.

ஐ.பி.எல் தொடரில் 2008 ஏப்ரல் 19 முதல் 2025 வரை சென்னை சூப்பர் கிங்ஸ் அணிக்காகவும், 2016 மற்றும் 2017 ஆம் ஆண்டுகளில் ரைசிங் புனே சூப்பர்ஜெயன்ட் அணிக்காகவும் தோனி விளையாடியுள்ளார். ஐ.பி.எல் வரலாற்றில் 12 இறுதிப் போட்டிகளில் விளையாடிய ஒரே வீரர் என்ற சாதனை தோனிக்கு மட்டுமே உரியது. அத்துடன், சென்னை சூப்பர் கிங்ஸ் அணிக்காக அதிக போட்டிகளில் விளையாடிய வீரர் மற்றும் அதிக ஓட்டங்களைக் குவித்தவர் என்ற பெருமையையும் அவர் தன்வசம் கொண்டுள்ளார்.