இசையமைப்பாளர் அனிருத் மற்றும் காவ்யா மாறன் ஆகியோரின் திருமணத்தில் வழக்கமான தாலி கட்டும் சடங்கு இடம்பெறவில்லையா என்ற விவாதம் தற்போது சமூக வலைத்தளங்களில் பேசுபொருளாகியுள்ளது.
கிரீஸ் நாட்டில் கடந்த நவம்பர் 11ஆம் திகதி நடைபெற்ற இவர்களது திருமணப் புகைப்படங்கள் வெளியானதைத் தொடர்ந்து, மணமகள் காவ்யாவின் கழுத்தில் வழக்கமான தாலி தென்படாதமை குறித்துப் பலரும் கேள்வி எழுப்பியிருந்தனர். இதனால், இத்திருமணம் சுயமரியாதைத் திருமண முறையில் நடைபெற்றதா என்ற விவாதமும் இணையத்தில் எழுந்தது.
இந்தச் சர்ச்சைக்கு முற்றுப்புள்ளி வைக்கும் வகையில், தி.மு.க. தகவல் தொழில்நுட்ப அணிச் செயலாளர் டி.ஆர்.பி. ராஜா தனது எக்ஸ் (X) தளத்தில் விளக்கமளித்துள்ளார். அதன்படி, திருமண நிகழ்வில் முதலில் அனிருத் மற்றும் காவ்யா ஆகியோர் மாலை மாற்றிக்கொண்டதாகவும், பின்னர் தமிழக முதலமைச்சர் மு.க. ஸ்டாலின் காவ்யாவுக்கும், நடிகர் ரஜினிகாந்த் அனிருத்துக்கும் தலா ஒரு சங்கிலியை வழங்கியதாகவும் அவர் குறிப்பிட்டுள்ளார்.
அதனைத் தொடர்ந்து, மணமக்கள் இருவரும் தங்களுக்குக் கிடைத்த சங்கிலிகளை ஒருவருக்கொருவர் மாற்றி அணிந்துகொண்டதாகவும், குடும்பத்தினர் மற்றும் நெருங்கிய நண்பர்கள் முன்னிலையில் அவர்களது திருமண வாழ்க்கை இனிதே ஆரம்பமானதாகவும் டி.ஆர்.பி. ராஜா தெரிவித்துள்ளார். இதன் மூலம், திருமணப் புகைப்படங்களில் தாலி எனப் பலரும் கருதியது இருவரும் பரிமாறிக்கொண்ட சங்கிலிகள் என்பது தெளிவாகியுள்ளது.
இதேவேளை, பெரியார் முன்னெடுத்த சுயமரியாதை இயக்கத்தின் முக்கிய சமூக மாற்றக் கருத்துக்களில் ஒன்றாகச் சுயமரியாதைத் திருமண முறை கருதப்படுகிறது. மதச் சடங்குகள் மற்றும் புரோகிதர்களின் பங்களிப்பு கட்டாயமின்றி, மணமக்களின் விருப்பம், சம்மதம் மற்றும் சமத்துவத்திற்கு முக்கியத்துவம் அளிக்கும் வகையில் இத்திருமண முறை உருவாக்கப்பட்டது.
இந்நிலையில், அனிருத் – காவ்யா மாறன் திருமணத்தில் இடம்பெற்ற இந்தச் சங்கிலிப் பரிமாற்றம் மற்றும் தாலி தொடர்பான தகவல்கள் தற்போது சமூக வலைத்தளங்களில் அதிக கவனம் பெற்று வருகின்றன.
