2027 வரவு செலவுத் திட்டத்தில் இளைஞர்களுக்கான வாய்ப்புகள் மற்றும் கடன் மீள்செலுத்தல் திட்டங்கள் இல்லை – வஜிர அபேவர்தன விமர்சனம்
நாட்டின் பொருளாதாரச் சவால்களை எதிர்கொள்ளவும், இளைஞர்களுக்கான புதிய வாய்ப்புகளை உருவாக்கவும் 2027ஆம் ஆண்டுக்கான வரவு செலவுத் திட்டத்தில் போதுமான நடவடிக்கைகள் முன்வைக்கப்படவில்லை என ஐக்கிய தேசியக் கட்சியின் தவிசாளரும் முன்னாள் அமைச்சருமான வஜிர அபேவர்தன குற்றஞ்சாட்டியுள்ளார். கொழும்பு மலர் வீதியிலுள்ள ஐக்கிய தேசியக் கட்சியின் அரசியல் அலுவலகத்தில் ஊடகங்களுக்குக் கருத்துத் தெரிவிக்கும்போதே அவர் இதனைக் குறிப்பிட்டுள்ளார்.
உலக நாடுகள் நவீன தொழில்நுட்பத்தின் உதவியுடன் வேகமாக முன்னேறி வரும் நிலையில், இலங்கையில் இளைஞர்களுக்குத் தொழில்நுட்பம் சார்ந்த வேலைவாய்ப்புகளை உருவாக்குவதற்குப் போதிய கவனம் செலுத்தப்படவில்லை என அவர் சுட்டிக்காட்டியுள்ளார். குறிப்பாக Millennials மற்றும் Generation Z தலைமுறையினரின் எதிர்காலப் பொருளாதார வாய்ப்புகளை உறுதிப்படுத்தத் தெளிவான செயற்றிட்டங்கள் அவசியம் என்றும், இளைஞர்களின் திறன்களை மேம்படுத்துவதே நாட்டின் நீண்டகாலப் பொருளாதார வளர்ச்சிக்கு அடித்தளமாக அமையும் என்றும் அவர் வலியுறுத்தியுள்ளார்.
2028ஆம் ஆண்டுக்குள் நாட்டின் வெளிநாட்டுக் கையிருப்பை 13 பில்லியன் அமெரிக்க டொலர்களாக அதிகரிக்க வேண்டிய கட்டாயம் உள்ளதாகவும், அதே ஆண்டில் சர்வதேச கடன் வழங்குநர்களுக்கு 3.5 பில்லியன் முதல் 4 பில்லியன் அமெரிக்க டொலர் வரையிலான கடன்களை மீள்செலுத்த வேண்டியுள்ளதாகவும் வஜிர அபேவர்தன தெரிவித்துள்ளார். ஆனால், இந்தப் பொறுப்புகளை நிறைவேற்றுவதற்கான தெளிவான நிதித் திட்டம் வரவு செலவுத் திட்டத்தில் விளக்கப்படவில்லை என அவர் விமர்சித்துள்ளார்.
சர்வதேச நாணய நிதியத்துடனான (IMF) பொருளாதார வேலைத்திட்டத்தை அரசாங்கம் கையாளும் விதம் குறித்தும் அவர் கேள்வி எழுப்பியுள்ளார். IMF தொடர்பான விடயங்களை ஆராய்வதற்குப் புதிய குழுவொன்று நியமிக்கப்பட்டுள்ளமையானது, அரசாங்கத்திற்குள் கருத்து வேறுபாடுகள் நிலவுகின்றனவா என்ற சந்தேகத்தை ஏற்படுத்துவதாக அவர் குறிப்பிட்டுள்ளார்.
இதேவேளை, அரச ஊழியர்கள் உள்ளிட்ட பொதுமக்கள் எதிர்கொள்ளும் வாழ்க்கைச் செலவு நெருக்கடிகள் குறித்தும் முன்னாள் அமைச்சர் கவலை வெளியிட்டுள்ளார். சில அரச ஊழியர்கள் தங்களது மாதாந்த சம்பளத்தில் சுமார் 60 சதவீதத்தைக் கடன் தவணைகளுக்காகச் செலுத்த வேண்டியுள்ளதால், உணவு, போக்குவரத்து உள்ளிட்ட அத்தியாவசிய குடும்பச் செலவுகளைச் சமாளிப்பதில் பெரும் சிரமங்களை எதிர்நோக்குவதாக அவர் தெரிவித்துள்ளார். அன்றாடத் தேவைகளுக்காகப் பல குடும்பங்கள் தங்க நகைகள் உள்ளிட்ட பெறுமதியான பொருட்களை அடகு வைக்கும் நிலைக்குத் தள்ளப்பட்டுள்ளதாகவும், கடனை உரிய காலத்தில் மீள்செலுத்த முடியாததால் சிலர் அவற்றை இழந்துள்ளதாகவும் சுட்டிக்காட்டிய அவர், இத்தகைய குடும்பங்களை மீட்டெடுக்கப் புதிய வரவு செலவுத் திட்டத்தில் போதுமான நிவாரணங்கள் இல்லை எனத் தெரிவித்துள்ளார்.
முன்னாள் ஜனாதிபதி ரணில் விக்ரமசிங்கவின் ஆட்சிக்காலத்தில் நடைமுறைப்படுத்தப்பட்ட பொருளாதாரக் கொள்கைகளே நெருக்கடிக்குப் பின்னர் நாட்டின் நிதி நிலைமையை ஸ்திரப்படுத்த உதவியதாகக் குறிப்பிட்ட வஜிர அபேவர்தன, அந்த மீட்சியைத் தொடர்ந்து பேணுவதற்கும் எதிர்காலக் கடன் பொறுப்புகளைச் சமாளிப்பதற்கும் தற்போதைய அரசாங்கம் தெளிவான பொருளாதார உத்தியை முன்வைக்கவில்லை எனவும் விமர்சித்துள்ளார்.
