ஜப்பான் - இந்தியா போட்டியின் வைட் பந்து சர்ச்சை: நடுவரின் தீர்ப்பு மாற்றப்பட்டது ஏன்? சட்ட விதிகள் கூறுவது என்ன?

ஜப்பான் மற்றும் இந்திய அணிகளுக்கு இடையே நடைபெற்ற ஐந்து ஓவர்கள் கொண்ட பரபரப்பான சர்வதேச இருபதுக்கு20 போட்டியில், நடுவரால் அறிவிக்கப்பட்ட வைட் பந்து தீர்ப்பு மீளப்பெறப்பட்டமை சர்வதேச கிரிக்கெட் வட்டாரங்களில் பெரும் விவாதத்தை ஏற்படுத்திய போதிலும், கிரிக்கெட் சட்ட விதிகளின்படி நடுவர்கள் மேற்கொண்ட இறுதித் தீர்மானம் முற்றிலும் சரியானது என கிரிக்கெட் நிபுணர்களும் முன்னாள் நடுவர்களும் தெளிவுபடுத்தியுள்ளனர். 

சானோ சர்வதேச கிரிக்கெட் மைதானத்தில் மழை காரணமாக 5 ஓவர்களாக மட்டுப்படுத்தப்பட்ட இப்போட்டியில், உலக சம்பியனான இந்திய அணி 32 ஓட்டங்களை மாத்திரமே பெற, கடினமான இலக்கை நோக்கித் துடுப்பெடுத்தாடிய ஜப்பான் அணி வெற்றியை நெருங்கி 2 ஓட்டங்களால் போராடித் தோல்வியடைந்தது.

போட்டியின் இறுதி ஓவரில் ஜப்பான் அணிக்கு வெற்றிபெற 8 ஓட்டங்கள் தேவைப்பட்ட நிலையில் அக்ஸர் பட்டேல் பந்துவீசினார். ஜப்பான் துடுப்பாட்ட வீரர் அலக்ஸாண்டர் ஷிராய்-பெட்மோர், அக்ஸர் பட்டேலின் பந்துவீச்சில் ரிவர்ஸ் ஸ்வீப் (Reverse sweep) அல்லது சுவிட்ச் ஹிட் போன்ற நிலைக்கு மாறி அடிப்பதற்கு முற்பட்டார். 

அப்போது லெக் ஸ்டம்ப் திசையில் சென்ற பந்தை கள நடுவர் கிறிஸ் தர்கேட் உடனடியாக வைட் என சமிக்ஞை செய்தார். இதற்கு இந்திய அணித் தலைவர் ஷ்ரேயஸ் ஐயர் மற்றும் பந்துவீச்சாளர் அக்ஸர் பட்டேல் ஆகியோர் அதிருப்தி வெளியிட்டதுடன், மற்றைய நடுவரான சர்வதேச நடுவர் கிறிஸ் பிரவுனுடன் கலந்துரையாடினர். உடனடியாக இரு நடுவர்களும் தமக்குள் ஆலோசித்து, அந்த வைட் பந்து தீர்ப்பை ரத்து செய்து சரியான பந்தாக (Dot ball) அறிவித்தனர்.

நடுவரின் இந்த அதிரடி மாற்றத்தைத் தொடர்ந்து, இந்திய அணி நடுவர்கள் மீது அழுத்தம் கொடுத்து தீர்ப்பை மாற்றிவிட்டதாக சமூக வலைத்தளங்களிலும் சில ஊடகங்களிலும் விமர்சனங்கள் எழுந்தன. எனினும் சர்வதேச கிரிக்கெட் பேரவையின் (ICC) விதிமுறைகள் மற்றும் எம்சிசி (MCC) சட்டப் புத்தகத்தின்படி துடுப்பாட்ட வீரர் ஒருவர் ரிவர்ஸ் ஸ்வீப் அல்லது சுவிட்ச் ஹிட் அடிப்பதற்குத் தயாராகும் போதோ அல்லது அந்த நிலைக்கு மாறும் போதோ, பிட்சின் இரு பக்கங்களும் ‘ஓஃப்-சைட்’ (Off-side) ஆகவே கருதப்படும். 

இதன் காரணமாக வழக்கமான லெக்-ஸ்டம்ப் வைட் விதிமுறை அங்கு செல்லுபடியாகாது என்பதுடன், ஓஃப்-சைட்டுக்குரிய 75 சென்டிமீட்டர் எல்லைக்கு அப்பால் பந்து சென்றால் மட்டுமே அது வைட் என கணிக்கப்பட வேண்டும்.

இது குறித்து கருத்துத் தெரிவித்த ஐசிசி சர்வதேச நடுவர் குழாமின் முன்னாள் நடுவரான அனில் சௌத்ரி, ஒரு துடுப்பாட்ட வீரர் ரிவர்ஸ் ஸ்வீப் அல்லது சுவிட்ச் ஹிட் போன்ற ஷாட்களை ஆட முற்படும் போது, இரு பக்கங்களும் ஓஃப்-சைட்டாக மாறுவதால் அது வைட் பந்து கிடையாது என்றும், ஆரம்பத்தில் தவறான முடிவெடுக்கப்பட்டாலும் நடுவர்கள் சரியான நேரத்தில் விதிமுறைகளைப் பின்பற்றி அதனைத் திருத்திக் கொண்டதாகவும் குறிப்பிட்டுள்ளார். 

அடுத்த பந்து வீசப்படுவதற்கு முன்பாக அல்லது ஆட்டம் இடைநிறுத்தப்படுவதற்கு முன்னதாக நடுவர்கள் தங்களுக்குள் கலந்துரையாடி களத் தீர்ப்பை மாற்றிக்கொள்வதற்கு முழுமையான விதிமுறை அனுமதி உண்டு என்பதால், இந்தத் தீர்மானத்தில் எவ்வித சட்டவிரோதமும் இல்லை என்பது உறுதியாகியுள்ளது.