சீன ஜனாதிபதி ஷி ஜின்பிங் மற்றும் ரஷ்ய ஜனாதிபதி விளாடிமிர் புடின் ஆகியோருடனான சந்திப்புடன் நிறைவடையவுள்ள ஆசிய சுற்றுப்பயணத்தின் முதற்கட்டமாக, அமெரிக்க ஜனாதிபதி டொனால்ட் ட்ரம்ப் பிலிப்பைன்ஸ் தலைநகர் மணிலாவை வந்தடைந்துள்ளார்.
மணிலாவில் உள்ள வில்லமோர் (Villamor) விமானப்படைத் தளத்தில் 'எயார் ஃபோர்ஸ் ஒன்' (Air Force One) விமானத்திலிருந்து இறங்கிய ட்ரம்பிற்குச் சிவப்புக் கம்பள வரவேற்பு அளிக்கப்பட்டது. இசைக்குழுவினர் அவருக்குப் பிடித்தமான 'Y.M.C.A.' பாடலை இசைக்க, பின்னர் அவர் உலங்குவானூர்தி மூலமாக விடுதிக்கு அழைத்துச் செல்லப்பட்டார்.
ஆசியான் (Asean) உச்சிமாநாட்டில் ட்ரம்பின் முதலாவது சந்திப்பு 'குவாட்' (Quad) கூட்டமைப்பின் பங்காளிகளான இந்தியப் பிரதமர் நரேந்திர மோடி, ஜப்பான் பிரதமர் சனே தகாய்ச்சி (Sanae Takaichi) மற்றும் அவுஸ்திரேலியப் பிரதமர் அந்தோணி அல்பானீஸ் ஆகியோருடன் இடம்பெற்றது.
இதில் இந்தியப் பிரதமர் மோடியை மிகவும் உறுதியான மனிதர் எனவும், ஜப்பான் பிரதமர் சனே தகாய்ச்சியை அவரை விடவும் உறுதியானவர் எனவும் ட்ரம்ப் வர்ணித்தார்.
சுதந்திரமான, வெளிப்படையான, நிலையான மற்றும் வளமான இந்தோ-பசிபிக் பிராந்தியத்தின் நான்கு மூலைகளாகத் தமது நாடுகள் விளங்குவதாகவும், தமக்கிடையே சிறந்த உறவுகளும் நெருக்கமான ஒருங்கிணைப்பும் காணப்படுவதாகவும் கூறிய அவர், தனது தொலைபேசி எப்போதும் திறந்திருக்கும் எனவும் தெரிவித்தார்.
ட்ரம்பின் வரிகள் மற்றும் ஈரான் மீதான போர் காரணமாகத் தென்கிழக்கு ஆசியாவின் பல நாடுகள் கடுமையாகப் பாதிக்கப்பட்டுள்ள போதிலும், செயற்கை நுண்ணறிவு (AI) துறையின் வளர்ச்சிக்கான பல உதிரிப்பாகங்களை இப்பிராந்தியம் உற்பத்தி செய்வதால், கடந்த ஆண்டு அமெரிக்காவிற்கான அந்நாடுகளின் ஏற்றுமதி 30 சதவீதத்தால் அதிகரித்துள்ளது.
சீனாவிடமிருந்து இப்பிராந்திய நாடுகளைத் திசைதிருப்பி, தனது 'பாக்ஸ் சிலிக்கா' (Pax Silica) தொழில்நுட்ப மற்றும் செயற்கை நுண்ணறிவுக் கட்டமைப்பிற்குள் கொண்டுவர அமெரிக்கா எதிர்பார்க்கிறது. எனினும், இப்பிராந்தியத்தில் சீனா கொண்டுள்ள பாரிய செல்வாக்கை எளிதில் சவாலுக்கு உட்படுத்த முடியாது எனவும், ட்ரம்ப் பிலிப்பைன்ஸில் தங்கியிருக்கும் சில மணித்தியாலங்களில் அது சாத்தியமில்லை எனவும் சுட்டிக்காட்டப்பட்டுள்ளது.
இதேவேளை, செவ்வாய்க்கிழமை பிற்பகுதியில் தாய்லாந்து பிரதமர் அனுதின் சார்ன்விரகுலுடன் (Anutin Charnvirakul) இணைந்து அந்நாட்டுடனான வர்த்தக ஒப்பந்தம் ஒன்றில் ட்ரம்ப் கைச்சாத்திட்டார். தாய்லாந்தின் மிகப்பெரிய ஏற்றுமதிச் சந்தையாக அமெரிக்கா விளங்குவதுடன், இவ்வாண்டு தாய்லாந்தின் மொத்த ஏற்றுமதியில் 24 சதவீதம் அமெரிக்காவிற்கே அனுப்பப்பட்டுள்ளது.
அதனைத் தொடர்ந்து தென்கிழக்கு ஆசியத் தலைவர்களுடனான இராப்போசன விருந்தில் கலந்துகொண்ட ட்ரம்ப், இது உலகின் மிகத் துடிப்பான மற்றும் ஆக்கப்பூர்வமான பிராந்தியங்களில் ஒன்றாகும் எனவும், பாரிய ஆற்றல்களைக் கொண்டுள்ளது எனவும் குறிப்பிட்டார்.
மணிலாவில் இரவு தங்கியதன் பின்னர், ஆசிய-பசிபிக் தலைவர்களின் உச்சிமாநாட்டில் கலந்துகொள்வதற்காகவும், சீன ஜனாதிபதி ஷி ஜின்பிங் மற்றும் ரஷ்ய ஜனாதிபதி விளாடிமிர் புடின் ஆகியோருடன் அணுசக்தி தொடர்பான பேச்சுவார்த்தைகளை நடத்துவதற்காகவும் அமெரிக்க ஜனாதிபதி சீனாவின் ஷென்சென் (Shenzhen) நகருக்குப் பயணமாகவுள்ளார்.
ரஷ்ய ஜனாதிபதி புடினுடன் தனிப்பட்ட முறையில் சந்திப்பொன்றை நடத்தத் தயாரா என எழுப்பப்பட்ட கேள்விக்கு, அதற்கான வாய்ப்புக் கிடைத்தால் நிச்சயம் சந்திப்பேன் என ட்ரம்ப் பதிலளித்துள்ளார்.
