ரஷ்யாவிற்காக உளவு பார்த்தார் என்ற சந்தேகத்தின் பேரில் இம்மாத முற்பகுதியில் பிரித்தானியாவில் கைது செய்யப்பட்ட அமெரிக்க இராணுவ அதிகாரி, தற்போது அமெரிக்க இராணுவக் காவலில் ஒப்படைக்கப்பட்டுள்ளதாக பிரித்தானிய பயங்கரவாதத் தடுப்புப் பொலிஸார் தெரிவித்துள்ளனர்.
குறித்த இராணுவ அதிகாரி லெப்டினன்ட் கேணல் பிராண்டன் கரோல் டைனர் (Brandon Carroll Tyner) என அடையாளம் காணப்பட்டுள்ளார். 2008 ஆம் ஆண்டு முதல் அமெரிக்க இராணுவத்தில் பணியாற்றி வரும் 41 வயதான இவர், கடந்த நவம்பர் 10 ஆம் திகதி குளோஸ்டர் (Gloucester) நகருக்கு அருகில் பிரித்தானிய பயங்கரவாதத் தடுப்புப் பொலிஸாரால் கைது செய்யப்பட்டிருந்தார்.
குளோஸ்டர்ஷையரின் (Gloucestershire) இன்ஸ்வொர்த் (Innsworth) பகுதியில் அமைந்துள்ள நேட்டோவின் நேச நாட்டு விரைவு எதிர்வினைப் படையின் (Allied Rapid Reaction Corps) தலைமையகமான இம்ஜின் படைமுகாமில் (Imjin Barracks) டைனர் பணியாற்றி வந்தவராவார்.
தேசியப் பாதுகாப்பு மற்றும் உளவு பார்த்தல் ஆகிய சந்தேகத்திற்குரிய குற்றச்சாட்டுகளின் அடிப்படையில் அவர் தற்போது அமெரிக்கக் காவலில் வைக்கப்பட்டுள்ளதாக பயங்கரவாதத் தடுப்புப் பொலிஸார் குறிப்பிட்டுள்ளனர்.
பிரித்தானியாவின் 2023 ஆம் ஆண்டின் தேசியப் பாதுகாப்புச் சட்டத்தின் முதலாம் மற்றும் மூன்றாம் பிரிவுகளின் கீழ் அவர் கைது செய்யப்பட்டு லண்டனில் தடுத்து வைக்கப்பட்டிருந்ததாக பொலிஸார் முன்னர் தெரிவித்திருந்தனர். பாதுகாக்கப்பட்ட தகவல்களைப் பெறுதல் அல்லது வெளியிடுதல் மற்றும் வெளிநாட்டு உளவுத்துறைக்கு உதவுதல் ஆகிய குற்றச்சாட்டுகளுடனேயே இச்சட்டப் பிரிவுகள் தொடர்புபட்டுள்ளன.
இதேவேளை, நவம்பர் 10 ஆம் திகதி டைனர் கைது செய்யப்பட்டதற்கு மறுநாள் மொஸ்கோவில் ஊடகவியலாளர்களிடம் கருத்துத் தெரிவித்த ரஷ்ய ஜனாதிபதி மாளிகையான கிரெம்ளினின் பேச்சாளர் டிமிட்ரி பெஸ்கோவ், இவ்விடயம் எதனுடன் தொடர்புடையது என்பது தமக்குத் தெரியாது எனத் தெரிவித்திருந்தார். தமக்கும் இதற்கும் எவ்விதத் தொடர்பும் இல்லை எனவும், இதற்கும் தமக்கும் எந்தச் சம்பந்தமும் இல்லை எனவும் அவர் குறிப்பிட்டிருந்தமை குறிப்பிடத்தக்கது.
