கடுவலை தீ விபத்தில் ஒரே குடும்பத்தைச் சேர்ந்த நால்வர் பலி; விபத்துக்கான காரணம் குறித்து வெளியான தகவல்

கொழும்பு - கடுவலை நகரிலுள்ள மின்சார உபகரண விற்பனை நிலையமொன்றில் நேற்று (19) அதிகாலை ஏற்பட்ட தீ விபத்தில் ஒரே குடும்பத்தைச் சேர்ந்த நால்வர் உயிரிழந்த சம்பவம் தொடர்பில் முக்கிய தகவல்கள் வெளியாகியுள்ளன.

குறித்த இரண்டு மாடிக் கட்டடத்தில் நேற்று அதிகாலை சுமார் 6.20 மணியளவில் ஏற்பட்ட தீ விபத்தில் தாய், தந்தை மற்றும் அவர்களது இரண்டு சிறு பிள்ளைகள் உயிரிழந்துள்ளனர். மாலபே - தலஹேன பகுதியைச் சேர்ந்த நாரத சந்தருவன் (35), லக்ஷி மதுஷானி (30) மற்றும் அவர்களது மகள்களான ஒனேலி பஹன்யா (2), திலேனி ஹசான்யா (9) ஆகியோரே இவ்வாறு உயிரிழந்தவர்களாவர்.

மின்கசிவு காரணமாக மின்விசிறிக்கு மின்சாரம் வழங்கும் கம்பியிலிருந்து தீ பரவியிருக்கலாம் எனச் சந்தேகிக்கப்படுகிறது. தீயிலிருந்து எழுந்த கரும்புகையையும், மின்சாதனங்கள் எரிந்தபோது வெளியான கார்பன் மோனாக்சைடு (CO) நச்சு வாயுவையும் சுவாசித்தமையால் இம்மரணங்கள் சம்பவித்திருக்கலாம் என பொலிஸ் ஊடகப் பேச்சாளர் தெரிவித்துள்ளார்.

உயிரிழந்த தம்பதியினர் குறித்த இரண்டு மாடிக் கட்டடத்தைக் குத்தகைக்கு எடுத்து மின்சாதன விற்பனை நிலையத்தை நடத்தி வந்துள்ளனர். அவர்கள் வழக்கமாக இரவு வேளைகளில் தலஹேனவிலுள்ள தமது வீட்டிற்குச் செல்வதாகவும், சில நாட்களில் கடையிலேயே தங்குவதாகவும் தெரிவிக்கப்படுகிறது. அந்த வகையில் சம்பவ தினத்தன்றும் அவர்கள் கடையின் மேல் மாடியில் தங்கியிருந்த போதே இத்துயரச் சம்பவம் நிகழ்ந்துள்ளது.

சம்பவம் குறித்து ஸ்ரீ ஜயவர்தனபுர கோட்டை மாநகர சபை தீயணைப்புப் பிரிவின் தலைமை அதிகாரி என்.டி. லியனகே கருத்துத் தெரிவிக்கையில், மூன்று தீயணைப்பு வாகனங்கள் மற்றும் 13 வீரர்களின் உதவியுடன் 20 நிமிடங்களுக்குள் தீ கட்டுப்பாட்டுக்குள் கொண்டுவரப்பட்டதாகக் குறிப்பிட்டார். தாம் சம்பவ இடத்திற்குச் சென்றபோது இரண்டு தளங்களும் தீப்பற்றி எரிந்து கரும்புகையால் சூழப்பட்டிருந்ததாகவும், மேல் மாடியில் அவசர காலத்தில் தப்பிச் செல்வதற்கான மாற்று வெளியேறும் வழிகள் எதுவும் இல்லாததால் நால்வரும் உள்ளே சிக்கி உயிரிழக்க நேரிட்டதாகவும் அவர் சுட்டிக்காட்டியுள்ளார்.

எனவே, வணிக நிலையங்களையோ அல்லது வீடுகளையோ அமைக்கும்போது அவசர காலங்களில் பாதுகாப்பாக வெளியேறும் வழிகளை கட்டாயம் அமைக்க வேண்டும் என அவர் பொதுமக்களுக்கு அறிவுறுத்தியுள்ளார்.

உயிரிழந்தவர்களின் சடலங்கள் மீதான பிரேதப் பரிசோதனைகள் இன்று (20) நடைபெறவுள்ளதுடன், அரசாங்க இரசாயனப் பகுப்பாய்வாளரின் அறிக்கையின் பின்னரே தீ விபத்துக்கான துல்லியமான காரணம் உறுதிப்படுத்தப்படும் என கடுவலை பொலிஸ் நிலையப் பொறுப்பதிகாரி சமிந்த எதிரிசூரிய தெரிவித்துள்ளார்.