வெலிக்கடை சிறைச்சாலையில் சிசு உயிரிழப்பு; உள்ளக விசாரணை மற்றும் சட்ட வைத்திய அதிகாரியின் அறிக்கையின் அடிப்படையில் மேலதிக நடவடிக்கை

வெலிக்கடை சிறைச்சாலையில் சிசு உயிரிழந்த சம்பவம் தொடர்பில், உள்ளக விசாரணை அறிக்கை மற்றும் சட்ட வைத்திய அதிகாரியின் (JMO) மருத்துவப் பரிசோதனை அறிக்கை ஆகியவற்றின் முடிவுகளின் அடிப்படையில் மேலதிக நடவடிக்கைகள் எடுக்கப்படும் என சிறைச்சாலைகள் திணைக்கள ஆணையாளரும் ஊடகப் பேச்சாளருமான சேனக்க பல்லேதென்ன தெரிவித்துள்ளார்.

நேற்று (19) 'டெய்லி மோர்னிங்' பத்திரிகை இது தொடர்பில் வினவியபோதே அவர் இதனைக் குறிப்பிட்டுள்ளார். உயிரிழந்த சிசுவின் சடலம் மருத்துவப் பரிசோதனைக்காக சட்ட வைத்திய அதிகாரியிடம் ஒப்படைக்கப்பட்டுள்ளதாகவும், அதற்கான அறிக்கை விரைவில் கிடைக்கப்பெறும் என எதிர்பார்க்கப்படுவதாகவும் அவர் கூறினார். 

"என்ன நடந்தது என்பதைக் கண்டறிவதற்காக உள்ளக விசாரணையொன்றும் முன்னெடுக்கப்பட்டு வருகின்றது. இவ்விரு அறிக்கைகளும் எமக்கு விரைவில் கிடைக்கும்" எனவும் அவர் தெரிவித்தார்.

குறித்த சிசு குறைமாதத்தில் பிறந்திருந்ததாகவும், சிறைச்சாலைக்குக் கொண்டு வரப்படுவதற்கு முன்னர் சுமார் இரண்டு மாதங்கள் வைத்தியசாலையில் தங்கி சிகிச்சை பெற்றிருந்ததாகவும் அவர் சுட்டிக்காட்டினார். "தற்போதைய நிலையில் எமக்கு அதிக தகவல்கள் கிடைக்கப்பெறவில்லை" எனவும் சிறைச்சாலைகள் ஊடகப் பேச்சாளர் குறிப்பிட்டார்.

உயிரிழந்த மூன்று மாத சிசு, வெலிக்கடை சிறைச்சாலையின் பெண்கள் பிரிவில் தடுத்து வைக்கப்பட்டுள்ள பெண் கைதி ஒருவரின் குழந்தையாகும். தாய்ப்பால் சிசுவின் சுவாசக் குழாய்க்குள் சென்றமையினாலேயே இம்மரணம் நிகழ்ந்துள்ளதாக முதற்கட்டத் தகவல்கள் தெரிவிக்கின்றன.

இதேவேளை, இச்சம்பவம் தொடர்பில் சிறைச்சாலைகள் ஆணையாளர் நாயகம் ஊடாக விரிவான அறிக்கையொன்றைக் கோரியுள்ளதாக மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ் தெரிவித்துள்ளார். 

அத்துடன், இச்சம்பவம் தொடர்பில் உரிய நடவடிக்கைகளை எடுக்குமாறும், எதிர்காலத்தில் இவ்வாறான துயரச் சம்பவங்கள் நிகழ்வதற்கான அபாயத்தைக் குறைப்பதற்குத் தேவையான மேலதிக நடவடிக்கைகளை அடையாளம் காணுமாறும் மகளிர் பணியகம் மற்றும் நன்னடத்தை மற்றும் சிறுவர் பராமரிப்பு சேவைகள் திணைக்களம் ஆகியவற்றுக்கு அமைச்சர் பணிப்புரை விடுத்துள்ளார்.