பாராளுமன்றத்தில் எதிர்க்கட்சிகளின் குரல்களை அரசாங்கம் நசுக்குகின்றது – சஜித் பிரேமதாச குற்றச்சாட்டு

பாராளுமன்றத்தில் எதிர்க்கட்சிகளின் குரல்களை அரசாங்கம் திட்டமிட்டு நசுக்கி வருவதாக ஐக்கிய மக்கள் சக்தியின் தலைவரும் எதிர்க்கட்சித் தலைவருமான சஜித் பிரேமதாச குற்றம் சுமத்தியுள்ளார். பொதுமக்களைப் பாதிக்கும் பிரச்சினைகளை எதிர்க்கட்சி பாராளுமன்ற உறுப்பினர்கள் எழுப்ப முற்படும்போது, அவர்களது ஒலிவாங்கிகள் அணைக்கப்படுவதாக அவர் சுட்டிக்காட்டியுள்ளார்.

தற்போது விளக்கமறியலில் வைக்கப்பட்டுள்ள தொழிற்சங்கத் தலைவரும் ஐக்கிய மக்கள் சக்தியின் செயற்குழு உறுப்பினருமான ஆனந்த பாலிதவின் நலன் குறித்து விசாரிப்பதற்காக வெலிக்கடை சிறைச்சாலைக்குச் சென்றிருந்த எதிர்க்கட்சித் தலைவர், அதனைத் தொடர்ந்து ஊடகங்களுக்குக் கருத்துத் தெரிவிக்கும்போதே இவ்வாறு குறிப்பிட்டுள்ளார். 

அரசாங்கத்தின் கொள்கைகளும் செயற்பாடுகளும் அரசியல் சுதந்திரத்தையும் அடிப்படை ஜனநாயகக் கோட்பாடுகளையும் சீர்குலைத்து வருவதாகவும், இதனால் எதிர்க்கட்சிப் பிரதிநிதிகள் தமது பாராளுமன்றப் பொறுப்புகளை வினைத்திறனுடன் நிறைவேற்ற முடியாத சூழல் உருவாக்கப்பட்டுள்ளதாகவும் அவர் தெரிவித்தார்.

அண்மையில் லாஃப்ஸ் (LAUGFS) சமையல் எரிவாயு விலையேற்றம் தொடர்பான பாராளுமன்ற விவாதங்களை நினைவுகூர்ந்த சஜித் பிரேமதாச, பாராளுமன்ற நிலையியற் கட்டளைகளின் கீழ் அவ்வாறான கேள்விகளை எழுப்ப அனுமதியில்லை எனக் கூறி எதிர்க்கட்சி உறுப்பினர்களுக்கு ஆரம்பத்தில் சந்தர்ப்பம் மறுக்கப்பட்டதாகக் குற்றம் சுமத்தினார். 

எவ்வாறாயினும், அத்தகைய கட்டுப்பாடுகளுக்கு மத்தியிலும் ஐக்கிய மக்கள் சக்தி தொடர்ந்தும் இவ்விடயத்தை எழுப்பியதன் விளைவாகவே, எரிவாயு விலையேற்றம் மற்றும் அதன் பின்னர் மேற்கொள்ளப்பட்ட விலை குறைப்பு தொடர்பில் பொதுமக்களின் கவனம் திரும்பியதாக அவர் குறிப்பிட்டார்.

பாராளுமன்றத்தில் பொதுமக்கள் நலன்சார்ந்த விடயங்களை எழுப்புவதற்கு எதிர்க்கட்சிப் பிரதிநிதிகளுக்கு இடமளிக்க வேண்டியதன் முக்கியத்துவத்தை இச்சம்பவம் எடுத்துக்காட்டுவதாகத் தெரிவித்த அவர், மாற்று அரசியல் சக்தியாக ஐக்கிய மக்கள் சக்தி வகிக்கும் வகிபாகம் குறித்து அரசாங்கம் அதிருப்தியடைந்துள்ளதாகவும் கூறினார். 

மக்கள் பொருளாதார நெருக்கடிகள், கைத்தொழில் பின்னடைவுகள் மற்றும் தொழில் இழப்புகளை எதிர்கொண்டுள்ள இக்காலப்பகுதியில், நாட்டின் ஜனநாயக நிறுவனங்களும் அழுத்தங்களுக்கு உள்ளாகியுள்ளதாக அவர் சுட்டிக்காட்டினார்.

மேலும், தொழிற்சங்கத் தலைவர்களை இலக்கு வைத்துத் தொழிற்சங்க இயக்கத்தைப் பலவீனப்படுத்தும் கொள்கைகளை அரசாங்கம் முன்னெடுத்து வருவதாகவும் எதிர்க்கட்சித் தலைவர் குற்றம் சுமத்தினார். தொழிலாளர்கள் தமது அன்றாட வாழ்க்கைச் செலவுகளை ஈடுசெய்வதில் பாரிய சிரமங்களை எதிர்நோக்கி வரும் நிலையில், தொழிற்சங்க நடவடிக்கைகளைத் தடுக்கும் நோக்கில் முன்னெடுக்கப்படும் செயற்பாடுகள் தொழிலாளர்களின் ஜனநாயக மற்றும் தொழிற்சங்க உரிமைகளை மீறுவதாக அமைந்துள்ளன என அவர் தெரிவித்தார். 

அரசியல் மற்றும் தொழிற்சங்க அடக்குமுறைகள் எவ்வாறிருப்பினும், நாட்டின் 22 மில்லியன் மக்களின் ஜனநாயக உரிமைகளுக்காக ஐக்கிய மக்கள் சக்தி தொடர்ந்தும் குரல் கொடுக்கும் என சஜித் பிரேமதாச உறுதியளித்தார்.