தமிழ், தெலுங்கு உள்ளிட்ட பல மொழித் திரைப்படங்களில் முத்திரை பதித்த பிரபல நடிகை ரம்யா கிருஷ்ணனும், அவரது கணவரும் தெலுங்குத் திரைப்பட இயக்குநருமான கிருஷ்ண வம்சியும் விவாகரத்து செய்து பிரிந்துவிட்டதாகச் சமூக வலைத்தளங்களில் பரவி வந்த வதந்திகளுக்கு நடிகை ரம்யா கிருஷ்ணன் முற்றுப்புள்ளி வைத்துள்ளார். தங்களது திருமண வாழ்க்கை குறித்து அவர் அண்மையில் வழங்கிய நேர்காணல் ஒன்றில் இந்தத் தெளிவுபடுத்தலை மேற்கொண்டுள்ளார்.
திரையுலகில் பல தசாப்தங்களாகத் தனது தனித்துவமான நடிப்பால் முத்திரை பதித்து வரும் ரம்யா கிருஷ்ணன், தமிழ், தெலுங்கு, மலையாளம், கன்னடம், இந்தி எனப் பல மொழிகளில் 260 க்கும் மேற்பட்ட திரைப்படங்களில் நடித்துள்ளார்.
அண்மையில் வெளியான 'ஜெயிலர் 2' திரைப்படத்திலும் அவர் முக்கிய கதாபாத்திரத்தில் நடித்திருந்தார். இவர் கடந்த 2003 ஆம் ஆண்டு தெலுங்குத் திரைப்பட இயக்குநர் கிருஷ்ண வம்சியைத் திருமணம் செய்துகொண்டதுடன், இந்தத் தம்பதியினருக்கு ரித்விக் என்ற மகன் உள்ளார்.
ரம்யா கிருஷ்ணன் சென்னையிலும், அவரது கணவர் கிருஷ்ண வம்சி ஹைதராபாத்திலும் வசித்து வருவதன் காரணமாக, இருவரும் பிரிந்துவிட்டதாகவும் விவாகரத்து செய்துகொண்டதாகவும் பரவலான செய்திகள் வெளியாகியிருந்தன.
இருவேறு நகரங்களில் வசிப்பது குறித்துப் பேசிய ரம்யா கிருஷ்ணன், நாடகங்களில் நடிப்பதற்கான வாய்ப்புகள் கிடைத்தபோது தாம் ஹைதராபாத்தில் வசித்து வந்ததாகக் குறிப்பிட்டுள்ளார். இதனால் சென்னை மற்றும் ஹைதராபாத் ஆகிய இரு நகரங்களுக்கும் அடிக்கடி பயணங்களை மேற்கொள்ள வேண்டியிருந்ததாகக் கூறியுள்ளார்.
அவ்வாறு தாம் வெளியூர் சென்று திரும்பும் ஒவ்வொரு சந்தர்ப்பத்திலும், தனது மகனுக்கு உடல்நலக் குறைவு ஏற்பட்டு வந்ததாக ரம்யா கிருஷ்ணன் விவரித்துள்ளார். இதன் காரணமாக, தாமும் தனது கணவரும் கலந்தாலோசித்து ஒரு சுமுகமான முடிவை எடுத்ததாகக் குறிப்பிட்டுள்ளார். அதற்கமைய, மகனைச் சென்னையில் உள்ள பாடசாலையொன்றில் சேர்த்துவிட்டுத் தாம் சென்னையிலேயே தங்கிவிட்டதாக அவர் தெரிவித்துள்ளார்.
தாங்கள் இன்னும் திருமண உறவிலேயே இருப்பதாகவும், இது முழுக்க முழுக்கத் தங்களது தொழில் மற்றும் குடும்பச் சூழலைக் கருத்தில் கொண்டு எடுக்கப்பட்ட முடிவு எனவும் அவர் தெளிவுபடுத்தியுள்ளார். இருவரும் வெவ்வேறு நகரங்களில் மிகவும் மகிழ்ச்சியாகவும் வசதியாகவும் வசித்து வருவதாகவும் அவர் கூறியுள்ளார்.

நடைமுறைச் சாத்தியங்களுக்காக எடுத்த இந்த முடிவு தற்போது தங்களுக்கு மிகவும் வசதியாக இருப்பதாகத் தெரிவித்த ரம்யா கிருஷ்ணன், அருகில் இருந்து சண்டையிட்டுக் கொள்வதை விட, தற்போது இருவரும் நல்ல நண்பர்களாக இருப்பதாக நெகிழ்ச்சியுடன் குறிப்பிட்டுள்ளார்.
மேலும், தங்களது திருமணத்திற்கு முன்பாகவே கிருஷ்ண வம்சி தன்னிடம் ஏன் திருமணம் செய்துகொள்ள வேண்டும், திருமணம் செய்யாமல் இணைந்து வாழலாமே (Live-in relationship) எனக் கேட்டதாகக் குறிப்பிட்ட அவர், அப்போதே அதற்குச் சம்மதித்திருக்க வேண்டும் என நகைச்சுவையாகவும் பகிர்ந்துள்ளார்.
ரம்யா கிருஷ்ணனின் இந்த வெளிப்படையான விளக்கத்தின் மூலம், கடந்த சில நாட்களாக இணையத்தில் பரவி வந்த விவாகரத்து வதந்திகளுக்கு முழுமையாக முற்றுப்புள்ளி வைக்கப்பட்டுள்ளது.