அமெரிக்காவில் வேலைவாய்ப்பு அடிப்படையிலான நிரந்தரக் குடியுரிமை (Green Card) மற்றும் விசா வழங்கும் விதிமுறைகளைக் கடுமையான முறையில் திருத்துவதற்கு அமெரிக்க அரசு புதிய வரைவுத் திட்டங்களை முன்மொழிந்துள்ளது. உள்நாட்டுத் தொழிலாளர்களுக்கு முன்னுரிமை அளிக்கும் நோக்கில், கடந்த இருபது ஆண்டுகளில் முதல்முறையாக 'பெர்ம்' (PERM) எனப்படும் நிரந்தரத் தொழிலாளர் சான்றளிக்கும் நடைமுறையில் அமெரிக்கத் தொழிலாளர் துறை பாரிய சீர்திருத்தங்களை மேற்கொண்டுள்ளது.
செவிலியர்கள் (Nurses), உடற்பயிற்சி நிபுணர்கள் (Physiotherapists) மற்றும் உயர் திறன் கொண்ட பணிப்பிரிவுகளில் அமெரிக்கப் பிரஜைகளுக்கே முதல் முன்னுரிமை வழங்கப்படுவதை உறுதிசெய்யும் வகையில் இந்த மாற்றங்கள் கொண்டுவரப்படுகின்றன.
புதிய விதிமுறைகளின்படி, குறிப்பிட்ட வெளிநாட்டு ஊழியர்களின் தகுதிகளுக்கு ஏற்ப வேலைவாய்ப்பு நிபந்தனைகளைத் தன்னிச்சையாக வடிவமைக்க நிறுவனங்களுக்குத் தடை விதிக்கப்படுகிறது. இனிவரும் காலங்களில், நிறுவனங்களின் உத்தியோகபூர்வ இணையதளங்கள், வேலைவாய்ப்புத் தளங்கள், சமூக ஊடகங்கள், வேலைவாய்ப்பு முகாம்கள் மற்றும் பல்கலைக்கழக வளாக நேர்காணல்கள் போன்றவற்றின் மூலமே ஆட்சேர்ப்புப் பணிகள் முன்னெடுக்கப்பட வேண்டும்.
மேலும், பணியிடங்களுக்கான விளம்பரக் காலம் தற்போதைய 30 நாட்களிலிருந்து 90 நாட்களாக (மூன்று மடங்கு) நீட்டிக்கப்படுவதுடன், அவ்விளம்பரங்களில் ஊதிய விவரங்களும் வெளிப்படையாகக் குறிப்பிடப்பட வேண்டும். தகுதியான அமெரிக்கர்களைப் பணியமர்த்த உரிய முயற்சிகள் மேற்கொள்ளப்பட்டதை நிறுவனங்கள் ஆவணங்களுடன் நிரூபிப்பதும் கட்டாயமாக்கப்பட்டுள்ளது.
அமெரிக்கத் தொழிலாளர்கள் உலகிலேயே சிறந்தவர்கள் என்றும், உயர் திறன் கொண்ட வேலைவாய்ப்புகளில் அவர்களுக்கே முதல் முன்னுரிமை கிடைக்க வேண்டும் என்றும் அமெரிக்கத் தொழிலாளர் துறை அமைச்சர் கீத் சோண்டர்லிங் (Keith Sonderling) தெரிவித்துள்ளார். தற்போதைய விதிகளில் உள்ள ஓட்டைகளைப் பயன்படுத்தி நிறுவனங்கள் அமெரிக்கர்களை முழுமையாகப் பரிசீலிக்காமல் வெளிநாட்டினருக்கு விசா அனுசரணை (Visa Sponsor) வழங்குவதை இந்தப் புதிய விதிகள் தடுக்கும் என்றும் அவர் குறிப்பிட்டுள்ளார்.
அத்துடன், செவிலியர்கள் மற்றும் உடற்பயிற்சி நிபுணர்கள் உள்ளிட்ட பிரிவினருக்கு வழங்கப்பட்டிருந்த நிர்வாக விலக்குகள் நீக்கப்பட்டு, அவர்களைப் பணியமர்த்துவதற்கும் முழுமையான ஆட்சேர்ப்புச் சோதனைகள் கட்டாயமாக்கப்பட்டுள்ளன.
கடந்த இரண்டு ஆண்டுகளில் அமெரிக்க ஊழியர்களைப் பணிநீக்கம் செய்த நிறுவனங்கள், அதே போன்ற பணிகளுக்கு வெளிநாட்டு ஊழியர்களைப் பணியமர்த்த விண்ணப்பிப்பதற்குத் தடை விதிக்கப்படுகிறது. முன்னதாக இந்த வரம்பு ஆறு மாதங்களாக மட்டுமே இருந்தது. மேலும், விண்ணப்பச் செயல்முறை முழுவதும் பணிநீக்கம் செய்யப்பட்ட தகுதியான அமெரிக்க ஊழியர்களுக்கு முன்னுரிமை அளித்துப் பரிசீலிக்க வேண்டும் என்றும் புதிய விதிகள் வலியுறுத்துகின்றன.
இந்தப் புதிய வரைவு விதிகள் குறித்துப் பொதுமக்கள் தங்களது கருத்துக்களைத் தெரிவிப்பதற்காக எதிர்வரும் 2027 ஆம் ஆண்டு ஜனவரி 19 ஆம் திகதி வரை (60 நாட்கள்) அவகாசம் வழங்கப்பட்டுள்ளது. அதன் பின்னரே இறுதி விதிகள் அமல்படுத்தப்படும். இந்த மாற்றங்கள் கிரீன் கார்டுக்காகக் நீண்டகாலமாகக் காத்திருக்கும் இலட்சக்கணக்கான இந்தியத் தகவல் தொழில்நுட்ப (IT) ஊழியர்கள் மற்றும் செவிலியர்களுக்குப் பெரும் பின்னடைவாக அமையும் எனப் பொருளாதார வல்லுநர்கள் தெரிவித்துள்ளனர்.