2027ஆம் ஆண்டுக்கான வரவு செலவுத் திட்டத்தில் தமது சம்பளம் மற்றும் கொடுப்பனவு தொடர்பான கோரிக்கைகளுக்குத் தீர்வு வழங்கப்படவில்லை எனக் குற்றம் சுமத்தி, அரச நிறைவேற்று அதிகாரிகள் இன்று (20) நாடளாவிய ரீதியில் ஒருநாள் அடையாளப் பணிப்பகிஷ்கரிப்பை முன்னெடுக்கவுள்ளனர்.
அதேவேளை, முன்மொழியப்பட்ட 25,000 ரூபாய் இடைக்காலக் கொடுப்பனவு ஒதுக்கப்படாதமைக்கு எதிர்ப்புத் தெரிவித்து எதிர்வரும் நவம்பர் 23ஆம் திகதி தனியான போராட்டமொன்றை முன்னெடுக்க ஆசிரியர்களும் அதிபர்களும் தயாராகி வருகின்றனர்.
பல்வேறு நிறைவேற்று சேவைப் பிரிவுகளைப் பிரதிநிதித்துவப்படுத்தும் 20 தொழிற்சங்கங்கள் இன்றைய நாடளாவிய தொழிற்சங்க நடவடிக்கையில் பங்கேற்கவுள்ளதாக அரச நிறைவேற்று அதிகாரிகளின் ஒன்றிணைந்த குழு அறிவித்துள்ளது.
வரவு செலவுத் திட்டத்தின் ஊடாகத் தெரிவுசெய்யப்பட்ட சில அரச ஊழியர் பிரிவினருக்கு மாத்திரம் கொடுப்பனவு அதிகரிப்புகளை வழங்க அரசாங்கம் நடவடிக்கை எடுத்துள்ள நிலையில், தமது குழுவினால் பிரதிநிதித்துவப்படுத்தப்படும் 20 நிறைவேற்று சேவைப் பிரிவினரின் கோரிக்கைகள் புறக்கணிக்கப்பட்டுள்ளதாகக் குற்றம் சுமத்தியே இத்தீர்மானம் எடுக்கப்பட்டுள்ளது.
இவ்வாறு பாரபட்சமான முறையில் கொடுப்பனவு அதிகரிப்புகள் ஒதுக்கப்பட்டமையே, பங்கேற்கும் தொழிற்சங்கங்களை நாடளாவிய ரீதியிலான தொழிற்சங்க நடவடிக்கையில் இறங்கத் தூண்டியுள்ளதாகக் குழுவின் பிரதிநிதி ஒருவர் தெரிவித்தார்.
இதேவேளை, வரவு செலவுத் திட்டத்தில் முன்மொழியப்பட்ட 25,000 ரூபாய் இடைக்காலக் கொடுப்பனவை ஒதுக்கத் தவறியமைக்கு எதிர்ப்புத் தெரிவித்து, எதிர்வரும் நவம்பர் 23ஆம் திகதி தனியான போராட்டமொன்றை முன்னெடுக்க ஆசிரியர் மற்றும் அதிபர் தொழிற்சங்கங்கள் திட்டமிட்டுள்ளன.
முன்பள்ளி முதல் பல்கலைக்கழக மட்டம் வரையிலான கல்வி நிறுவனங்களில் கடமையாற்றும் ஊழியர்கள் இந்த இடைக்காலக் கொடுப்பனவை வழங்குமாறு கோரி வருவதாகத் தரப்படுத்தப்பட்ட அதிபர்கள் சங்கத்தின் பொதுச் செயலாளர் நிமல் முதுன்கொடுவ தெரிவித்துள்ளார். ஏழு பிரதான அதிபர் சங்கங்களும், சுமார் 20 ஆசிரியர் தொழிற்சங்கங்களும் ஒன்றிணைந்து இப்போராட்டத்தை ஏற்பாடு செய்துள்ளதாக அவர் குறிப்பிட்டார்.
வரவு செலவுத் திட்டத்தின் இத்தீர்மானத்திற்குக் கல்வித் துறையைச் சேர்ந்த ஊழியர்கள் ஏற்கனவே தமது எதிர்ப்பை வெளியிட்டுள்ளதாகவும், முன்மொழியப்பட்ட கொடுப்பனவைப் பெற்றுக்கொள்வதற்காகப் பங்கேற்கும் தொழிற்சங்கங்கள் தொடர்ந்தும் அழுத்தம் கொடுத்து வருவதாகவும் முதுன்கொடுவ மேலும் தெரிவித்தார்.