முன்னாள் ஜனாதிபதி மஹிந்த ராஜபக்ஷவின் மனைவி ஷிரந்தி ராஜபக்ஷ கைது
முன்னாள் ஜனாதிபதி மஹிந்த ராஜபக்ஷவின் பாரியார் ஷிரந்தி ராஜபக்ஷவை இலஞ்ச ஊழல் ஆணைக்குழு அதிகாரிகள் கிருலப்பனையிலுள்ள அவரது இல்லத்தில் வைத்துக் கைது செய்துள்ளனர்.
முன்னாள் ஜனாதிபதி மஹிந்த ராஜபக்ஷவின் மனைவி ஷிரந்தி ராஜபக்ஷ, இலஞ்சம் அல்லது ஊழல் பற்றிய சார்த்துதல்களை புலனாய்வு செய்யும் ஆணைக்குழுவின் அதிகாரிகளினால் கைது செய்யப்பட்டுள்ளார்.
கிருலப்பனையிலுள்ள பூர்வாராம வீதியில் அமைந்துள்ள அவரது இல்லத்தில் வைத்தே இவர் கைது செய்யப்பட்டுள்ளார். குறித்த இல்லத்திற்குச் சென்ற இலஞ்ச ஊழல் ஆணைக்குழுவின் அதிகாரிகள், அவரிடம் சுமார் இரண்டு மணித்தியாலங்கள் வாக்குமூலம் பதிவு செய்த பின்னரே இந்த கைது நடவடிக்கையை முன்னெடுத்ததாக ஆணைக்குழு தெரிவித்துள்ளது.
'சிரிலிய சவிய' நிதியத்துடன் தொடர்புடைய வங்கிக் கணக்கொன்றினூடாக இடம்பெற்ற நிதி மோசடிகள் மற்றும் சந்தேகத்திற்கிடமான பணப்பரிமாற்றங்கள் தொடர்பான முறைப்பாடுகள் குறித்தே இவர் கைது செய்யப்பட்டுள்ளதாக தெரிவிக்கப்படுகின்றது.
இதேவேளை, கடந்த திங்கட்கிழமை இரவு நாடு திரும்பிய ஷிரந்தி ராஜபக்ஷவை, எதிர்வரும் ஒக்டோபர் 13 ஆம் திகதி நிதிக்குற்றப் புலனாய்வுப் பிரிவில் முன்னிலையாகுமாறு பொலிஸார் ஏற்கனவே அறிவித்திருந்தனர்.
முன்னதாக, கடந்த செப்டெம்பர் 15 ஆம் திகதி சுகயீனமுற்று கொழும்பிலுள்ள தனியார் வைத்தியசாலையொன்றில் அனுமதிக்கப்பட்டிருந்த அவர், சிகிச்சை தேவைகளுக்காக செப்டெம்பர் 16 ஆம் திகதி அதிகாலை சிங்கப்பூருக்குப் புறப்பட்டுச் சென்றிருந்தார்.
குறித்த வைத்தியசாலையிலிருந்து அவர் நேரடியாக கட்டுநாயக்க விமான நிலையத்திற்கு அழைத்துச் செல்லப்பட்டதாக தகவல்கள் வெளியாகியிருந்தன.
சிரிலிய சவிய அமைப்பின் நிதி விவகாரங்கள் தொடர்பில் முன்னெடுக்கப்பட்டு வரும் விசாரணைகளின் அடிப்படையில் தன்னை கைது செய்வதைத் தடுக்கும் உத்தரவொன்றைப் பிறப்பிக்குமாறு கோரி, ஷிரந்தி ராஜபக்ஷவின் சட்டத்தரணிகளினால் மாளிகாகந்த நீதவான் நீதிமன்றத்தில் கடந்த திங்கட்கிழமை முற்பிணை மனுவொன்றும் தாக்கல் செய்யப்பட்டிருந்தது.
