தனியார் எரிபொருள் நிலையங்களில் தட்டுப்பாடு: கொழும்பு உள்ளிட்ட பகுதிகளில் நீண்ட வரிசைகள்
கொழும்பு உள்ளிட்ட பகுதிகளில் தனியார் எரிபொருள் நிலையங்களில் தட்டுப்பாடு ஏற்பட்டுள்ளதால் மக்கள் நீண்ட வரிசையில் காத்திருப்பதாகவும், கூட்டுத்தாபன நிலையங்களில் தட்டுப்பாடு இல்லை என்றும் அறிவிக்கப்பட்டுள்ளது.
கொழும்பு உள்ளிட்ட நாட்டின் சில பகுதிகளில் உள்ள தனியார் நிறுவனங்களுக்குச் சொந்தமான எரிபொருள் நிரப்பு நிலையங்களில் பெற்றோல் உள்ளிட்ட எரிபொருட்களுக்குத் தட்டுப்பாடு நிலவுவதாக பொதுமக்கள் குற்றம் சுமத்துகின்றனர்.
குறிப்பிட்ட சில நிலையங்களில் டீசல் மற்றும் சுப்பர் டீசல் மட்டுமே விநியோகிக்கப்படுவதால், எரிபொருளைப் பெற்றுக்கொள்வதற்காக மக்கள் நீண்ட வரிசைகளில் காத்திருக்க வேண்டிய நிலை ஏற்பட்டுள்ளது.
தற்போதைய செலவீனங்களுக்கு ஏற்ப எரிபொருளை விற்பனை செய்ய முடியாது என தனியார் நிறுவனங்கள் சுட்டிக்காட்டியதை அடுத்து, அண்மையில் மேற்கொள்ளப்பட்ட எரிபொருள் விலைத் திருத்தத்தின்போது அவற்றுக்கு மானியம் வழங்க அரசாங்கம் நடவடிக்கை எடுத்திருந்தது.
இருப்பினும், தனியார் எரிபொருள் நிலையங்களில் தொடர்ந்தும் நிலவும் இந்த நிலைமை தொடர்பில் நுகர்வோரும் ஊழியர்களும் விசனம் தெரிவித்துள்ளனர்.
எரிபொருள் விநியோக நடவடிக்கைகளால் தனியார் நிறுவனங்களுக்குக் கடுமையான நிதி இழப்பு ஏற்படுவதன் காரணமாகவே, அவை விநியோகத்தை மேலும் மட்டுப்படுத்தியுள்ளதாக அகில இலங்கை பெற்றோலிய தனியார் தாங்கி உரிமையாளர்கள் சங்கத்தின் செயலாளர் டீ.வி. சாந்த சில்வா தெரிவித்துள்ளார்.
கொழும்பில் இடம்பெற்ற ஊடகவியலாளர் சந்திப்பில் கலந்துகொண்டு கருத்து வெளியிட்ட அவர், இலங்கை பெற்றோலியக் கூட்டுத்தாபனத்தின் கீழ் இயங்கும் எரிபொருள் நிரப்பு நிலையங்களில் எவ்வித தட்டுப்பாடும் இன்றி விநியோகம் வழமைபோல் இடம்பெற்று வருவதாகவும் குறிப்பிட்டார்.
