சவுதி அரேபியாவில் இலங்கை தமிழர் அனோஜனுக்கு விதிக்கப்பட்ட மரண தண்டனை ரத்து

சவுதி அரேபியாவில் பணியாற்றி வந்த இலங்கைத் தமிழரான சிவராசா அனோஜனுக்கு விதிக்கப்பட்ட மரண தண்டனையை சவுதி அரேபியாவின் உச்ச நீதிமன்றம் ரத்து செய்துள்ளது. சமூக ஊடகத்தில் செய்த கருத்து தொடர்பாக அந்த நாட்டு நீதிமன்றம் அவருக்கு மரண தண்டனை விதித்திருந்தது.

இந்த மரண தண்டனையை ரத்து செய்ய வேண்டுமென இலங்கை, தமிழ்நாடு மட்டுமல்லாது சர்வதேச அளவிலும் குரல் எழுந்தது. இந்நிலையில், அனோஜன் சிவராசவுக்கு விதிக்கப்பட்ட மரண தண்டனையை சவுதி அரேபியாவின் உச்ச நீதிமன்றம் ரத்து செய்துள்ளதாக இலங்கையின் வெளியுறவு அமைச்சர் அருண் ஹேமச்சந்திரா அறிவித்துள்ளார்.

இலங்கை அரசாங்கத்தின் தொடர்ச்சியான இராஜதந்திர மற்றும் சட்டரீதியான முயற்சிகளைத் தொடர்ந்து இது சாத்தியமானது என அவர் தெரிவித்துள்ளார். மேலும், சவுதி அரேபிய அரசாங்கத்தின் ஒத்துழைப்பிற்கும், நமது தூதர், வெளியுறவு அமைச்சகத்தின் செயலாளர் மற்றும் அதிகாரிகள், இலங்கை வெளிநாட்டு வேலைவாய்ப்பு பணியகத்தின் தலைவர் மற்றும் உறுப்பினர்கள், மற்றும் இலங்கை, சவுதி சட்டக் குழுக்களின் அர்ப்பணிப்புமிக்க முயற்சிகளுக்கு அவர் பாராட்டு தெரிவித்துள்ளார்.