அகதிகள் படகு கவிழ்ந்து விபத்து: 139 பேர் உயிரிழப்பு, 116 பேர் மாயம்

வடகிழக்கு ஆப்பிரிக்க நாடான ஜிபூட்டி அருகே அகதிகள் பயணித்த படகு கவிழ்ந்து விபத்துக்குள்ளானதில் 100-க்கும் மேற்பட்டோர் உயிரிழந்துள்ளனர்.

பாப் எல் மண்டேப் நீரிணை வழியாக ஏமன் நாட்டை நோக்கிச் சென்ற அந்தப் படகில் சுமார் 350 பயணிகள் இருந்ததாகவும், அதிகப்படியான பயணிகளை ஏற்றிச் சென்றதே விபத்துக்குக் காரணம் என்றும் தெரிவிக்கப்படுகிறது. ஜிபூட்டியின் ஓபோக் பகுதிக்கு அருகே நள்ளிரவில் இந்த விபத்து நிகழ்ந்துள்ளது.

விபத்தில் 139 பேர் உயிரிழந்துள்ளதாக ஐக்கிய நாடுகளின் சர்வதேச புலம்பெயர்ந்தோர் அமைப்பு தெரிவித்துள்ளது. பலியானவர்களில் 52 ஆண்கள், 42 பெண்கள் மற்றும் 15 குழந்தைகள் அடங்குவர்.

இதுவரை 80 பேர் வரை உயிருடன் மீட்கப்பட்டுள்ள நிலையில், அவர்கள் அனைவரும் எத்தியோப்பிய நாட்டைச் சேர்ந்தவர்கள் என்பது தெரியவந்துள்ளது.

மேலும் கடலில் மூழ்கி மாயமான சுமார் 116 பேரைத் தேடும் பணி விபத்து நிகழ்ந்த பகுதியில் தீவிரமாக முன்னெடுக்கப்பட்டு வருகிறது. நேரம் கடந்து செல்வதால், மாயமானவர்களை உயிருடன் மீட்பதற்கான வாய்ப்புகள் குறைந்து வருவதாக அதிகாரிகள் கவலை வெளியிட்டுள்ளனர்.