குழந்தையை வளர்க்க தயாராக இல்லாவிட்டால் பெற்றெடுக்காமல் இருப்பதே நல்லது: நடிகை வரலக்ஷ்மி சரத்குமார் 

தனக்குக் குழந்தை பெற்றுக்கொள்வதில் விருப்பமில்லை என்றும், குழந்தை வளர்ப்புக்கான பாரிய பொறுப்பை ஏற்கத் தயாராக இல்லாத பட்சத்தில் குழந்தை பெற்றுக்கொள்ளாமல் இருப்பதே பொறுப்பான முடிவு என்றும் பிரபல தென்னிந்தியத் திரைப்பட நடிகை வரலக்ஷ்மி சரத்குமார் தெரிவித்துள்ளார்.

அண்மையில் ஊடகமொன்றுக்கு வழங்கிய நேர்காணலிலேயே அவர் தனது தனிப்பட்ட வாழ்க்கை தொடர்பான இந்தத் துணிச்சலான நிலைப்பாட்டை வெளிப்படுத்தியுள்ளார்.

மும்பையைச் சேர்ந்த தொழிலதிபரும் கலைக்கூட உரிமையாளருமான நிக்கோலாய் சச்தேவை கடந்த 2024 ஆம் ஆண்டு திருமணம் செய்துகொண்ட வரலக்ஷ்மி சரத்குமார், தொடர்ந்து திரைப்படத் துறையில் தீவிரமாக இயங்கி வருகின்றார்.

இந்த நிலையில், தனக்குக் குழந்தை பெற்றுக்கொள்ளும் விருப்பமில்லை என்ற முடிவானது எந்தவித உடல்நலக் குறைபாடுகள் காரணமானது அல்ல என்றும், அது முற்றுமுழுதாக தனது சொந்த விருப்பத்தின் பேரில் கணவருடன் இணைந்து எடுக்கப்பட்ட பரஸ்பர முடிவு என்றும் அவர் சுட்டிக்காட்டியுள்ளார்.

திருமணம் செய்துகொண்ட காரணத்தினாலேயே அனைத்துத் தம்பதியினரும் கட்டாயமாகக் குழந்தைகளைப் பெற்றுக்கொள்ள வேண்டும் என்ற நியதி கிடையாது எனத் தெரிவித்த வரலக்ஷ்மி, பெற்றோர் என்ற நிலைக்குப் பின்னால் உள்ள பொறுப்புணர்வு மிக ஆழமானது எனக் குறிப்பிட்டுள்ளார்.

ஒரு குழந்தையை உலகிற்கு அறிமுகப்படுத்துவதற்கு முன்னர், அதன் முழுமையான வளர்ப்புச் செலவுகளையும் வாழ்க்கை நெறிமுறைகளையும் பொறுப்பேற்க நாம் மனதளவிலும் வாழ்வியலிலும் தயாராக இருக்கின்றோமா என்பதைச் சிந்திக்க வேண்டும் எனவும், அந்தப் பாரிய பொறுப்பை ஏற்கத் தயக்கமிருப்பின் குழந்தைகளைப் பெறாமல் இருப்பதே சிறந்தது எனவும் அவர் தெளிவுபடுத்தியுள்ளார்.

தனது கணவர் நிக்கோலாய் சச்தேவின் முந்தைய திருமணத்தின் மூலமாகப் பிறந்த மகளைத் தமது சொந்த மகளாகவே பாவித்து வருவதாகத் தெரிவித்த அவர், வீட்டில் வளர்க்கப்படும் இரண்டு வளர்ப்பு நாய்களையும் தமது சொந்தக் குழந்தைகளாகவே கருதிப் பராமரித்து வருவதாகவும், இவர்களே தமது முழுமையான குடும்பம் எனவும் பகிர்ந்து கொண்டுள்ளார்.

மரபுசார்ந்த சமூகப் பொதுப்புத்திகளைத் தாண்டி, ஒரு பெண்ணாகவும் தாயாகவும் பொறுப்புணர்வை முன்னிறுத்தி அவர் வெளியிட்டுள்ள இக்கருத்துக்கள் தற்போது இணையத்தளங்களிலும் சமூக வலைத்தளங்களிலும் பரவலான கவனத்தையும் பாராட்டுக்களையும் பெற்று வருகின்றன.