ஞானசார தேரருக்கு உதவிய குற்றச்சாட்டில் கைது செய்யப்பட்ட வங்கி உத்தியோகத்தர் விளக்கமறியலில்

பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரருக்கு எதிராக மூன்று நீதிமன்றங்களால் பிடியாணை பிறப்பிக்கப்பட்டிருந்த நிலையில், அவர் கைது செய்யப்படுவதைத் தவிர்த்து தலைமறைவாக இருப்பதற்கு உதவினார் என்ற குற்றச்சாட்டில் கைது செய்யப்பட்ட வங்கி உத்தியோகத்தர் ஒருவர் எதிர்வரும் ஒக்டோபர் மாதம் 9 ஆம் திகதி வரை விளக்கமறியலில் வைக்கப்பட்டுள்ளார்.

களனி பகுதியைச் சேர்ந்த குறித்த வங்கி உத்தியோகத்தர் கொழும்பு குற்றத்தடுப்புப் பிரிவினரால் கைது செய்யப்பட்டு நீதிமன்றில் முன்னிலைப்படுத்தப்பட்டதை அடுத்தே, கொழும்பு பிரதான நீதவான் அசங்க எஸ். போதரகம இந்த விளக்கமறியல் உத்தரவை பிறப்பித்துள்ளார்.

ஞானசார தேரரைக் கைது செய்வதற்கு பிடியாணை பிறப்பிக்கப்பட்டிருந்தமை குறித்து நன்கு அறிந்திருந்தும், சந்தேக நபர் தனது வாகனத்தில் அவரை இராஜகிரிய பகுதியிலிருந்து எல்பிட்டிய பகுதிக்கு அழைத்துச் சென்றுள்ளதாக கொழும்பு குற்றத்தடுப்புப் பிரிவினர் நீதிமன்றில் தெரிவித்தனர்.

நீதிமன்ற உத்தரவுகளை மதிக்கத் தவறியமை மற்றும் ஞானசார தேரர் கைது செய்யப்படுவதைத் தவிர்ப்பதற்கு உதவியமை ஆகிய குற்றச்சாட்டுகளின் கீழ், தண்டனைச் சட்டக்கோவையின் பிரிவுகளுக்கு அமைவாக இந்த விவகாரம் தொடர்பில் விசாரணைகள் முன்னெடுக்கப்பட்டு சந்தேக நபர் கைது செய்யப்பட்டதாக பொலிஸார் தெரிவித்தனர்.

சம்பவம் தொடர்பான விசாரணைகள் இதுவரை நிறைவடையவில்லை என நீதிமன்றத்திற்கு அறிவித்த கொழும்பு குற்றத்தடுப்புப் பிரிவினர், சந்தேக நபரை விளக்கமறியலில் வைக்குமாறு கோரிக்கை விடுத்தனர். முன்வைக்கப்பட்ட விடயங்களை ஆராய்ந்த பிரதான நீதவான், சந்தேக நபரை எதிர்வரும் ஒக்டோபர் 9 ஆம் திகதி வரை விளக்கமறியலில் வைக்குமாறு உத்தரவிட்டார்.