ஜெலன்ஸ்கி பேச்சுவார்த்தைக்கு தகுதியானவர் அல்ல, புதினை விட கடினமானவர்: டிரம்ப் விமர்சனம்
உக்ரைன் அதிபர் வோலோடிமிர் ஜெலன்ஸ்கி, அமெரிக்காவுடன் பேச்சுவார்த்தை நடத்துவதற்குத் தகுதியான நபர் அல்ல என்று அமெரிக்க அதிபர் டொனால்டு டிரம்ப் விமர்சித்துள்ளார். மேலும், ரஷிய அதிபர் விளாடிமிர் புதினை விட ஜெலன்ஸ்கியுடன் பேச்சுவார்த்தை நடத்துவதுதான் கடினமானது என்றும் அவர் தெரிவித்துள்ளார்.
அமெரிக்க ஊடகம் ஒன்றுக்கு டிரம்ப் அளித்த பேட்டியில், உக்ரைன் போரை முடிவுக்குக் கொண்டுவருவதற்கான அமைதி ஒப்பந்தத்தில் ஜெலன்ஸ்கி உண்மையான ஆர்வம் காட்டவில்லை என்று கூறியுள்ளார்.
அமைதி ஒப்பந்தம் வேண்டும் என்று ஜெலன்ஸ்கி கூறினாலும், அதற்கான உடன்பாட்டை எட்ட விரும்பவில்லை என்றும், ஒப்பந்தத்தை விரும்புவதாகக் கூறுகிறார், ஆனால் உண்மையில் விரும்பவில்லை என்றும் அவர் குற்றம்சாட்டியுள்ளார். ஜெலன்ஸ்கி மீது தனக்குப் பெரிய அபிமானம் இல்லை என்றும், அவர்கள் அந்த நாட்டையே அழித்துவிட்டனர் என்றும் டிரம்ப் தெரிவித்துள்ளார்.
உக்ரைன் மற்றும் ரஷியா எரிசக்தி கட்டமைப்புகள் மீது தாக்குதல் நடத்தாது என்று ஒப்புக்கொண்டிருப்பதாக டிரம்ப் முன்னர் கூறியிருந்தார். ஆனால், இரு நாடுகளும் தொடர்ந்து தாக்குதல்களை நடத்தி வந்தன. இதனால் கோபமடைந்த டிரம்ப், உக்ரைனைச் சாடியுள்ளார்.
ரஷியாவின் எண்ணெய் சுத்திகரிப்பு நிலையங்கள் மீது உக்ரைன் மீண்டும் தாக்குதல் நடத்தி வருவதை அவர் கடுமையாக விமர்சித்துள்ளார். இத்தகைய தாக்குதல்கள் உலகளாவிய எரிபொருள் விலையை உயர்த்துகின்றன, இது ஏற்றுக்கொள்ள முடியாதது என்றும் டிரம்ப் கூறியுள்ளார்.
