'ஜெயிலர் 2' படத்தின் எதிர்பார்ப்பை எகிற வைக்குமா டிரெய்லர்? நாளை வெளியாகிறது
நெல்சன் இயக்கத்தில் ரஜினிகாந்த் நடித்துள்ள 'ஜெயிலர் 2' படத்தின் டிரெய்லர் அக்டோபர் 5-ம் தேதி வெளியாகவுள்ள நிலையில், படத்திற்கான எதிர்பார்ப்பை அதிகரிக்கும் கடைசி வாய்ப்பாக இது பார்க்கப்படுகிறது.
சன் பிக்சர்ஸ் தயாரிப்பில் நெல்சன் திலீப்குமார் இயக்கத்தில் சூப்பர் ஸ்டார் ரஜினிகாந்த் நடித்துள்ள 'ஜெயிலர் 2' திரைப்படம் வெளியாக இன்னும் 11 நாட்களே உள்ள நிலையில், அக்டோபர் 5-ம் தேதியான நாளை படத்தின் டிரெய்லர் வெளியாக உள்ளது.
முன்னதாக அனிருத் தலைமையில் ரேவ் பார்ட்டி முறையில் பாடல்கள் வெளியிடப்பட்ட போதிலும், அதில் ரஜினிகாந்த் பங்கேற்றுப் பேசாததால் அந்த நிகழ்வு பரவலான கவனத்தைப் பெறவில்லை.
இதனால் வெளிநாடுகளில் முன்பதிவு இன்னும் எதிர்பார்த்த வேகத்தை எட்டவில்லை என்ற சூழலில், நாளை வெளியாகும் டிரெய்லரே படத்திற்கான எதிர்பார்ப்பை அதிகரிக்கும் முக்கியக் காரணியாகக் கருதப்படுகிறது.
டிரெய்லரை நேரடி பிரமாண்ட விழாவாக நடத்தாமல் ஆன்லைனில் மட்டுமே எளிமையாக வெளியிட படக்குழு திட்டமிட்டுள்ளது. விடுமுறை நாளான ஞாயிற்றுக்கிழமை டிரெய்லர் வெளியாகாமல், வாரத்தின் முதல் நாளான திங்கட்கிழமை வெளியாவது ரசிகர்களிடையே எந்தளவுக்கு வரவேற்பைப் பெறும் என்ற கேள்வியும் எழுந்துள்ளது.
முன்னதாக இந்தி நடிகை நோரா ஃபதேஹி நடனமாடிய 'பிந்தாஸ்' பாடலும் 'அல்லபோலேலே' பாடல் அளவுக்குப் பெரிய அளவில் ட்ரெண்ட் ஆகவில்லை என்பதும் ரசிகர்களிடையே சலசலப்பை ஏற்படுத்தியுள்ளது.
ஜெயிலர் முதல் பாகத்தின் வெற்றிக்குப் பிறகு வெளியான லால் சலாம், வேட்டையன், கூலி ஆகிய படங்கள் ரசிகர்களை முழுமையாகக் கவரத் தவறியதே ஜெயிலர் 2 படத்திற்கான ஆரம்பகட்ட எதிர்பார்ப்பு குறைவாக இருப்பதற்குக் காரணமாகக் கூறப்படுகிறது.
மோகன்லால், சிவராஜ்குமார் தொடர்பான காட்சிகளாவது இடம்பெற்றால் கவனம் ஈர்க்கும் என்று கூறப்படும் நிலையில், நெல்சன் - ரஜினிகாந்த் கூட்டணியின் இந்த டிரெய்லர் படத்திற்கான எதிர்பார்ப்பைத் தீவிரப்படுத்தும் என்ற நம்பிக்கையில் ரசிகர்கள் காத்திருக்கின்றனர்.
