நெருக்கமான காட்சியால் நெருக்கடியில் சிக்கிய நடிகை ரச்சிதா.. குடும்பத்தில் ஏற்பட்ட விரிசல் குறித்து உருக்கம்!

கன்னட திரையுலகின் முன்னணி நடிகைகளில் ஒருவரான ரச்சிதா ராம், கடந்த 2019ஆம் ஆண்டு வெளியான 'ஐ லவ் யூ' திரைப்படத்தில் நடித்த குறிப்பிட்ட ஒரு காட்சியால் தனது குடும்பத்தில் ஏற்பட்ட மனக்கசப்புகள் குறித்து நேர்காணல் ஒன்றில் வேதனையுடன் பகிர்ந்துகொண்டுள்ளார். 

நடிகர் உபேந்திராவுடன் இணைந்து நடித்த அந்தத் திரைப்படம் 2007ஆம் ஆண்டு வெளியான 'ஐ திங்க் ஐ லவ் மை வைஃப்' என்ற ஆங்கிலப் படத்தின் மறு உருவாக்கமாகும். படம் ரசிகர்களிடையே நல்ல வரவேற்பைப் பெற்றபோதிலும், அதில் இடம்பெற்ற நெருக்கமான காட்சியில் நடித்தது தனது தனிப்பட்ட வாழ்க்கையில் பெரும் தாக்கத்தை ஏற்படுத்தியதாக அவர் குறிப்பிட்டுள்ளார்.

அக்காட்சியில் நடித்ததற்காக தான் தொழில்ரீதியாக வருத்தப்படவில்லை என்றாலும், தனது பெற்றோர் அதனை ஏற்றுக்கொள்ளவில்லை என்று ரச்சிதா தெரிவித்துள்ளார்.

தங்களை ஒரு குழந்தையாகவே கருதிவந்த பெற்றோருக்கு அக்கதாபாத்திரம் மிகுந்த வருத்தத்தை அளித்ததாகவும், அதன் தொடர்ச்சியாக அவரது தாயார் 'உன்னை ஒரு நடிகையாக ஏற்றுக்கொள்ள முடியும், ஆனால் மகளாகப் பார்க்க முடியாது' என்று கூறியது மனதளவில் பெரும் அதிர்ச்சியை ஏற்படுத்தியதாகவும் அவர் கூறியுள்ளார்.

இதனைத் தொடர்ந்து தனது பெற்றோரின் காலில் விழுந்து உடனடியாக மன்னிப்புக் கேட்டதாகவும், இனிமேல் இதுபோன்ற காட்சிகளில் நடிக்க மாட்டேன் என்று உறுதியளித்ததாகவும் ரச்சிதா விவரித்துள்ளார்.

தனது தந்தை இன்றும் தன்னை ஒரு குழந்தையாகவே பார்ப்பதாகவும், தன் குடும்பத்திற்கு ஏற்பட்ட வேதனையை நினைத்து தொடர்ந்து மன்னிப்பு கோருவதாகவும் அவர் கண்ணீருடன் தெரிவித்துள்ளார். மேலும் குடும்பமே தனக்கு முதன்மையானது என்றும், அவர்களுக்குப் பிறகே மற்ற அனைத்தும் என்றும் அவர் தனது நேர்காணலில் வெளிப்படுத்தியுள்ளார்.