மடக்குத் திரைக் கைப்பேசியான 'டூ' (Duo) மற்றும் ஐபோன் 18 ப்ரோ சாதனங்களை அறிமுகப்படுத்தியது ஆப்பிள் நிறுவனம்

ஆப்பிள் நிறுவனம் தனது முக்கிய தயாரிப்பான ஐபோன் வரிசையில் பல ஆண்டுகளுக்குப் பிறகு மிகப்பெரிய மாற்றத்தை அறிமுகப்படுத்தும் வகையில் 'டூ' (Duo) என்ற புதிய மடக்குத் திரைக் கைப்பேசியை அறிமுகப்படுத்தியுள்ளது. 

கலிபோர்னியாவின் குபெர்டினோவில் உள்ள ஸ்டீவ் ஜாப்ஸ் அரங்கில் நடைபெற்ற பிரம்மாண்ட நிகழ்வில் இந்த புதிய சாதனங்கள் வெளியிடப்பட்டன.

கடவுச்சீட்டு (Passport) அளவிலும் வடிவத்திலும் உருவாக்கப்பட்டுள்ள இந்த மடக்குத் கைப்பேசி, திறக்கும்போது கிடைமட்டமாகவும் அகலமாகவும் விரியும் இந்தத் திரையை செங்குத்தாகப் பயன்படுத்தும் வசதியும் வழங்கப்பட்டுள்ளது. 

கைப்பேசியை மடக்கி வைக்கும்போது முன்புறத்தில் தனித்த சிறிய திரை செயல்படும் வகையில் வடிவமைக்கப்பட்டுள்ளது. இதுவரை வெளிவந்த ஆப்பிள் கைப்பேசிகளை விட இதுவே மிக மெல்லிய வடிவமைப்பு கொண்டதாகும் என்று அந்நிறுவனம் தெரிவித்துள்ளது.

புதிய தலைமைச் செயல் அதிகாரியான ஜான் டெர்னஸ் (John Ternus) பொறுப்பேற்ற பின் நடைபெற்ற இந்த நிகழ்வு, 2017 ஆம் ஆண்டில் ஐபோன் எக்ஸ் (iPhone X) வெளியிடப்பட்ட பிறகு ஆப்பிள் தயாரிப்புகளில் நிகழ்ந்த மிக முக்கியமான மாற்றமாகக் கருதப்படுகிறது. 

ஆப்பிள் நிறுவனத்தின் முன்னாள் தலைமைச் செயல் அதிகாரியான டிம் குக் (Tim Cook), ஜான் டெர்னஸுக்கு தனது பொறுப்புகளை வழங்கி வழியனுப்பி வைத்தார். பயனாளர்களின் தரவுப் பாதுகாப்பிற்கு முன்னுரிமை அளித்து ஆப்பிள் இன்டெலிஜென்ஸ் (Apple Intelligence) நேரடியாக சாதனங்களிலேயே இயங்கும் வகையில் தொழில்நுட்பம் மேம்படுத்தப்பட்டுள்ளதாக ஜான் டெர்னஸ் குறிப்பிட்டுள்ளார்.

இதற்கிடையில், மடக்கும் வசதி அற்ற வழக்கமான வடிவமைப்புடைய ஐபோன் 18 ப்ரோ மற்றும் ஐபோன் 18 ப்ரோ மேக்ஸ் கைப்பேசிகளையும் ஆப்பிள் நிறுவனம் வெளியிட்டுள்ளது. 

ஐபோன் 18 ப்ரோ மற்றும் ப்ரோ மேக்ஸ் சாதனங்களின் தொடக்க விலையானது முறையே 1,199 மற்றும் 1,299 அமெரிக்க டாலர்களாக நிர்ணயிக்கப்பட்டுள்ளது. இது முந்தைய மாடல்களின் விலையைக் காட்டிலும் நூறு டாலர்கள் அதிகமாகும்.

செயற்கை நுண்ணறிவு தொழில்நுட்பம் மூலம் தயாரிக்கப்படும் அல்லது மாற்றப்படும் படங்களை அடையாளம் காணும் வகையில் 'ஆப்பிள் ரெஃபரன்ஸ் இமேஜ்' (Apple Reference Image) என்ற புதிய தரநிலையை இந்நிகழ்வில் ஆப்பிள் அறிமுகப்படுத்தியது. 

மேலும் மேம்பட்ட செயற்கை நுண்ணறிவு பயன்பாடுகளை நேரடியாக கையாளுவதற்காக புதிய ஏ20 ப்ரோ (A20 Pro) சில்லு இந்த சாதனங்களில் பொருத்தப்பட்டுள்ளது. ஐபோன் கைப்பேசிகளைத் தவிர ஏர்பாட்ஸ் சாதனங்கள், ஆப்பிள் வாட்ச் சீரிஸ் 12 மற்றும் ஆப்பிள் வாட்ச் அல்ட்ரா 4 போன்ற உடல்நலப் பாதுகாப்பு அம்சங்கள் கொண்ட புதிய சாதனங்களும் இந்த நிகழ்வில் அறிமுகம் செய்யப்பட்டன.