ஷிராந்தி ராஜபக்ஷவை எதிர்வரும் 13 ஆம் திகதி வரை விளக்கமறியலில் வைக்குமாறு உத்தரவு

முன்னாள் ஜனாதிபதி மஹிந்த ராஜபக்ஷவின் பாரியாரான முன்னாள் முதற்பெண்மணி ஷிராந்தி ராஜபக்ஷவை, எதிர்வரும் ஒக்டோபர் மாதம் 13 ஆம் திகதி வரை விளக்கமறியலில் வைக்குமாறு கொழும்பு நீதவான் நீதிமன்றம் உத்தரவிட்டுள்ளது.

 இலஞ்சம் அல்லது ஊழல் பற்றிய சார்த்துதல்களைப் புலனாய்வு செய்யும் ஆணைக்குழுவின் அதிகாரிகளினால் இன்று காலை அவர் கைது செய்யப்பட்டதைத் தொடர்ந்து, நீதிமன்றத்தில் முன்னிலைப்படுத்தப்பட்ட போதே இந்த உத்தரவு பிறப்பிக்கப்பட்டது.

இதேவேளை, குறித்த சம்பவம் தொடர்பில் இலஞ்ச ஊழல் விசாரணை ஆணைக்குழுவின் அதிகாரிகளினால் கைது செய்யப்பட்டிருந்த தேசிய சேமிப்பு வங்கியின் முன்னாள் தலைவர் பிரதீப் காரியவசத்தை பிணையில் விடுவிக்க நீதிமன்றம் உத்தரவிட்டுள்ளது. 

கிருலப்பனை பூர்வாராம வீதியிலுள்ள அவரது இல்லத்தில் வைத்து இன்று காலை இலஞ்ச ஊழல் விசாரணை ஆணைக்குழுவின் அதிகாரிகளினால் ஷிராந்தி ராஜபக்ஷ கைது செய்யப்பட்டார்.

‘சிரிலிய சவிய நிதியம்’ தொடர்பான கணக்கொன்றில் இடம்பெற்றதாகக் கூறப்படும் நிதி முறைகேடுகள் மற்றும் கொடுக்கல் வாங்கல்கள் குறித்த விசாரணைகளின் அடிப்படையில், அவரிடம் சுமார் இரண்டு மணித்தியாலங்கள் வாக்குமூலம் பதிவு செய்யப்பட்ட பின்னரே இந்த கைது நடவடிக்கை முன்னெடுக்கப்பட்டது.

மருத்துவ சிகிச்சைக்காக கடந்த செப்டெம்பர் 16 ஆம் திகதி அதிகாலை சிங்கப்பூர் சென்றிருந்த ஷிராந்தி ராஜபக்ஷ, சிகிச்சைகளை நிறைவு செய்து கடந்த திங்கட்கிழமை இரவு நாடு திரும்பியிருந்தார்.

நாடு திரும்பிய அவரை வாக்குமூலம் வழங்குவதற்காக எதிர்வரும் ஒக்டோபர் 13 ஆம் திகதி நிதிக்குற்றப் புலனாய்வுப் பிரிவில் முன்னிலையாகுமாறு பொலிஸார் ஏற்கனவே அறிவித்திருந்தனர்.

முன்னதாக செப்டெம்பர் 15 ஆம் திகதி திடீர் சுகயீனம் காரணமாக கொழும்பிலுள்ள தனியார் வைத்தியசாலையொன்றில் அனுமதிக்கப்பட்டிருந்த அவர், அங்கிருந்து நேரடியாக விமான நிலையத்திற்குச் சென்று வௌிநாடு புறப்பட்டதாகத் தகவல்கள் தெரிவிக்கின்றன.

இதேவேளை, ‘சிரிலிய சவிய’ அமைப்பின் நிதி விவகாரங்கள் தொடர்பான விசாரணைகளில் தாம் கைது செய்யப்படுவதைத் தடுத்து உத்தரவிடுமாறு கோரி, ஷிராந்தி ராஜபக்ஷவின் சட்டத்தரணிகளினால் மாளிகாகந்த நீதவான் நீதிமன்றில் கடந்த திங்கட்கிழமை எதிர்பார்ப்பு பிணை மனுவொன்றும் தாக்கல் செய்யப்பட்டிருந்தமை குறிப்பிடத்தக்கது.