பிரிட்டனில் வனவிலங்கு பூங்காவில் புலி கூண்டுக்குள் குதித்த நபர் பரிதாப பலி; பதறியடித்து ஓடிய பயணிகள்!
பிரிட்டன் யார்கஷையர் வனவிலங்கு பூங்காவில் புலி கூண்டுக்குள் குதித்த நபர் தாக்கப்பட்டதில் சம்பவ இடத்திலேயே பலி; பூங்கா மூடப்பட்டு சுற்றுலாப் பயணிகள் அவசரமாக வெளியேற்றம்.
பிரிட்டனில் உள்ள பிரபல வனவிலங்கு பூங்காவில் புலியின் பாதுகாப்பு கூண்டுக்குள் எதிர்பாராத விதமாக குதித்த நபர் ஒருவர், புலி தாக்கியதில் சம்பவ இடத்திலேயே பரிதாபமாக உயிரிழந்த விபரீத சம்பவம் உலகளவில் பெரும் அதிர்வலைகளை ஏற்படுத்தியுள்ளது.
இங்கிலாந்தின் டான்காஸ்டர் அருகே அமைந்திருக்கும் புகழ்பெற்ற யார்கஷையர் வனவிலங்கு பூங்காவில் இந்த நடுக்கமூட்டும் சம்பவம் பதிவாகியுள்ளது. பொதுமக்களின் பார்வையாளர் பகுதியைக் கடந்து சென்ற அடையாளம் தெரியாத நபர் ஒருவர், தீவிர பாதுகாப்பு வளையத்தில் அடைக்கப்பட்டிருந்த சைபீரியன் வகை புலியின் எல்லைக்குள் திடீரெனக் குதித்துள்ளார். கண் இமைக்கும் நேரத்தில் ஆக்ரோஷமடைந்த புலி அந்த நபரை கொடூரமாகத் தாக்கியதில் அவர் பலத்த காயங்களுக்கு உள்ளானார்.
தகவல் அறிந்து விரைந்து வந்த அவசரகால மீட்புக் குழுவினர் தீவிர சிகிச்சை அளிக்க முற்பட்ட போதிலும், காயங்களின் தீவிரத்தால் அவர் நிகழ்விடத்திலேயே உயிரிழந்ததாக சவுத் யார்க்ஷயர் காவல்துறையினர் அதிகாரப்பூர்வமாக அறிவித்துள்ளனர். உயிரிழந்த நபரின் முழு விவரங்களை உறுதிப்படுத்தும் முதற்கட்ட நடவடிக்கைகள் தற்போது முன்னெடுக்கப்பட்டு வருகின்றன.
இந்த எதிர்பாராத துயரச் சம்பவத்தைத் தொடர்ந்து பூங்காவில் இருந்த சுற்றுலாப் பயணிகள் மற்றும் பொதுமக்கள் அனைவரும் அவசர அவசரமாகப் பாதுகாப்பான இடங்களுக்கு வெளியேற்றப்பட்டு, பூங்கா வளாகம் முழுமையாக மூடப்பட்டது.
தாக்குதலை நடத்திய புலிக்கு எவ்வித காயங்களும் ஏற்படவில்லை எனவும், அது தற்போது பாதுகாப்புப் பிரிவில் இருப்பதாகவும் தெரிவித்துள்ள காவல்துறையினர், பொதுமக்களுக்கு மேலதிக ஆபத்துகள் எதுவும் இல்லை என தெளிவுபடுத்தியுள்ளனர். அத்துடன் சம்பவம் தொடர்பான காணொளிகளைச் சமூக ஊடகங்களில் பகிர வேண்டாம் எனவும் பொதுமக்களுக்குக் கடும் அறிவுறுத்தல் விடுக்கப்பட்டுள்ளது.
