ஆஸ்திரேலியாவுக்கு எதிரான தொடர்: இந்திய ‘ஏ’ அணியில் ஹர்திக் பாண்டியா திடீர் சேர்ப்பு!

இந்தியாவில் சுற்றுப்பயணம் மேற்கொண்டு விளையாடவுள்ள ஆஸ்திரேலிய ‘ஏ’ கிரிக்கெட் அணிக்கு எதிரான டெஸ்ட் மற்றும் ஒருநாள் தொடர்களுக்கான இந்திய ‘ஏ’ அணி உத்தியோகபூர்வமாக அறிவிக்கப்பட்டுள்ளது.

இந்தத் தொடரில் இரண்டு அதிகாரபூர்வமற்ற நான்கு நாள் டெஸ்ட் போட்டிகளும், மூன்று ஒருநாள் சர்வதேச போட்டிகளும் இடம்பெறவுள்ளன.

அனைத்து போட்டிகளும் புதுச்சேரியில் நடைபெறவுள்ள நிலையில், முதலாவது டெஸ்ட் போட்டி செப்டம்பர் 22 ஆம் திகதியும், இரண்டாவது டெஸ்ட் போட்டி செப்டம்பர் 29 ஆம் திகதியும் தொடங்கவுள்ளன. அதனைத் தொடர்ந்து அக்டோபர் 6, 9 மற்றும் 11 ஆகிய திகதிகளில் ஒருநாள் போட்டிகள் நடைபெறவுள்ளன.

இந்த ஒருநாள் தொடருக்கான இந்திய ‘ஏ’ அணியில் நட்சத்திர சகலதுறை ஆட்டக்காரர் ஹர்திக் பாண்டியா சேர்க்கப்பட்டிருப்பது கிரிக்கெட் ரசிகர்களிடையே பெரும் எதிர்பார்ப்பை ஏற்படுத்தியுள்ளது.

கடந்த மே மாதம் நிறைவடைந்த ஐபிஎல் தொடருக்குப் பின்னர் தசைப்பிடிப்பு காயம் காரணமாக எந்தவொரு சர்வதேசப் போட்டிகளிலும் பங்கேற்காமல் இருந்த ஹர்திக் பாண்டியா, உடற்தகுதித் தேர்வில் தேர்ச்சி பெறுவதைப் பொறுத்து ஆடும் லெவனில் களமிறங்குவார் எனத் தெரிவிக்கப்பட்டுள்ளது.

அதேபோல், காயத்திலிருந்து முழுமையாக மீண்டுள்ள தமிழகத்தைச் சேர்ந்த முன்னணி துடுப்பாட்ட வீரர் சாய் சுதர்சனும் இரு அணிகளிலுமே தேர்வாகியுள்ளார்.

டெஸ்ட் தொடருக்கான இந்திய ‘ஏ’ அணிக்கு தேவ்தத் படிக்கல் தலைவராகவும், சாய் சுதர்சன் உப தலைவராகவும் நியமிக்கப்பட்டுள்ளனர். அணியில் அமன் மொகடே, ஆயுஷ் பாண்டே, யாஷ் ரத்தோட், ஷேக் ரஷீத், குமார் குஷாக்ரா, ஷம்ஸ் முலானி, தனுஷ் கோடியன், துஷார் தேஷ்பாண்டே, அன்ஷூல் கம்போஜ், பிரபுல் ஹிங்கே, என்.ஜெகதீசன், நசிகெட் புதே மற்றும் வைஷாக் ஆகியோர் இடம்பிடித்துள்ளனர்.

ஒருநாள் தொடருக்கான இந்திய ‘ஏ’ அணிக்கு ருதுராஜ் கெய்க்வாட் தலைமை தாங்கவுள்ளதுடன், தேவ்தத் படிக்கல் உப தலைவராகச் செயல்படவுள்ளார். பிரியான்ஷ் ஆர்யா, சாய் சுதர்சன், ரஜத் படிதார், குமார் குஷாக்ரா, நிஷாந்த் சிந்து, விப்ராஜ் நிகம், அர்ஷின் குல்கர்னி, அர்ஷத் கான், நமன் திர், ஹர்திக் பாண்டியா, பிரப்சிம்ரன் சிங், குர்ஜப்னீத் சிங் மற்றும் யாஷ் தாக்குர் ஆகியோர் ஒருநாள் அணியில் சேர்க்கப்பட்டுள்ளனர்.