அனிருத் மனைவி குறித்து 10 வருடங்களுக்கு முன்பே கணித்த ஜோதிடர்: சமூக வலைதளங்களில் வைரல்

இசையமைப்பாளர் அனிருத்தின் திருமணம் உறுதியாகியுள்ள நிலையில், சுமார் பத்து ஆண்டுகளுக்கு முன்பே அவரது திருமணம் தொடர்பாக டாரட் கார்டு நிபுணர் ஜெயஸ்ரீ கணித்துக் கூறிய பழைய காணொலி ஒன்று தற்போது இணையத்தில் பரவலாகப் பகிரப்பட்டு வருகிறது. 

தனியார் தொலைக்காட்சியில் அப்சரா ரெட்டி தொகுத்து வழங்கிய நிகழ்ச்சியில் கலந்துகொண்டபோது, அனிருத்தின் எதிர்காலம் மற்றும் திருமணம் குறித்து ஜெயஸ்ரீ பேசியிருந்தார். அதே நிகழ்ச்சியில் நடிகர் தனுஷின் எதிர்காலம் மற்றும் அவரது மகன்கள் குறித்தும் ஜெயஸ்ரீ கணித்துக் கூறிய பழைய பதிவும் தற்போது கவனம் பெற்றுள்ளது.

அந்தக் காணொலியில் தனுஷ் குறித்துக் குறிப்பிட்ட ஜெயஸ்ரீ, அவர் காரியங்களில் நேர்த்தியைக் கடைப்பிடிப்பவர் என்றும், முழுமையாகத் தெரிந்துகொண்ட பிறகே ஒரு செயலில் இறங்குவார் என்றும் தெரிவித்திருந்தார்.

மேலும், நாற்பது முதல் ஐம்பது வயது வரை தனுஷின் திரை மற்றும் பொது வாழ்க்கை புதிய பாதையை அமைக்கும் உச்சக்கட்ட வளர்ச்சியை எட்டும் என்றும், ஐம்பது வயதுக்குப் பிறகு அவரது வளர்ச்சி இன்னும் பிரம்மாண்டமாக இருக்கும் என்றும் ஜெயஸ்ரீ கூறியிருந்தார். அப்போது தாம் ஓர் உணர்ச்சிவசப்படக்கூடிய நபர் என்பதைத் தனுஷ் ஒப்புக்கொண்டார்.

தொடர்ந்து தனது மகன்களான யாத்ரா மற்றும் லிங்கா குறித்து தனுஷ் கேட்டதற்கு, அவர்கள் நன்றாகப் படித்து சொந்த ஊரை விட்டு வெளியூருக்குச் சென்று வாழ்வார்கள் என ஜெயஸ்ரீ தெரிவித்தார். தொழில் ரீதியாக உதவ முன்வருவது போன்ற மறைமுக எதிர்ப்புகளும் சவால்களும் வரும் என்று ஜெயஸ்ரீ கூறியபோது, அவற்றை தாம் பார்த்துக் கொள்வதாகத் தனுஷ் குறிப்பிட்டிருந்தார்.

இதேபோல் அனிருத் குறித்த கணிப்பில், அவருக்குக் காதல் திருமணமாகவே அமையும் என்றும், அவரது மனைவி திரைத்துறையைச் சாராத, நன்கு படித்த, சென்னையைச் சேர்ந்த மற்றும் அனிருத்தின் வீட்டிற்கு அருகிலேயே வசிக்கும் பெண்ணாக இருப்பார் என்றும் ஜெயஸ்ரீ தெரிவித்திருந்தார்.

தற்போது எம்.பி.ஏ. பட்டதாரியான காவ்யா மாறனை அனிருத் பெற்றோரின் சம்மதத்துடன் கரம் பிடிக்கவுள்ள சூழலில், ஜெயஸ்ரீயின் பழைய கணிப்புகள் சமூக வலைதளங்களில் ரசிகர்களால் அதிகம் பகிரப்பட்டு வருகின்றன.