இந்திய அணியில் இந்த வீரரை சேர்க்க வேண்டும்: முன்னாள் வீரர் சுனில் கவாஸ்கர் வலியுறுத்தல்

இந்திய கிரிக்கெட் அணி உலகக் கோப்பையை வெல்ல வேண்டுமானால், ஆல்ரவுண்டர் க்ருணால் பாண்டியாவை அணியில் சேர்க்க வேண்டும் என்று முன்னாள் கேப்டன் சுனில் கவாஸ்கர் தெரிவித்துள்ளார். பத்திரிகை ஒன்றுக்கு அளித்த பேட்டியில் அவர் இந்த யோசனையை முன்வைத்துள்ளார்.

க்ருணால் பாண்டியா களத்தில் புத்திசாலித்தனமாகச் செயல்படும் திறன் கொண்டவர் என்று குறிப்பிட்டுள்ள சுனில் கவாஸ்கர், அவரால் பந்தை பெரிய அளவில் சுழற்ற முடியாவிட்டாலும், பேட்டர்களின் நகர்வுக்கு ஏற்ப பந்தின் திசையையும் நீளத்தையும் மாற்றி ரன்களைக் கட்டுப்படுத்த முடியும் என்றார்.

பந்துவீச்சு மட்டுமின்றி பேட்டிங், ஃபீல்டிங் என அனைத்து நிலைகளிலும் சிறப்பாகச் செயல்படக்கூடிய இவரைப் போன்ற வீரர்கள் மீது முழு நம்பிக்கை வைத்து உலகக் கோப்பைக்கான திட்டமிடலில் இணைக்க வேண்டும் என்றும் அவர் கூறியுள்ளார்.

வீரர்களின் வயதை ஒரு தடையாகக் கருதாமல், உடற்தகுதியையும் திறமையையும் மட்டுமே பிசிசிஐ அளவுகோலாகக் கொள்ள வேண்டும் என்று கவாஸ்கர் கேட்டுக்கொண்டுள்ளார்.

உள்ளூர் போட்டிகள் மற்றும் ஐபிஎல் தொடர்களில் ஒரு சீனியர் வீரர் தொடர்ந்து சிறப்பாக ஆடினால், அவரிடம் முழு உடற்தகுதி இருப்பதாகவே பொருள் என்றும், வயதை மட்டும் காரணம் காட்டி திறமையான சீனியர்களைப் புறக்கணிப்பது சரியான முடிவு அல்ல என்றும் அவர் தெளிவுபடுத்தியுள்ளார்.

சமீபத்தில் நடைபெற்ற ஐபிஎல் 2026 தொடரில் 16 போட்டிகளில் விளையாடிய க்ருணால் பாண்டியா, 14 விக்கெட்டுகளைக் கைப்பற்றியதோடு 226 ரன்களையும் எடுத்து 8.40 என்ற எகானமியைப் பதிவு செய்திருந்தார். இருப்பினும், 2021-ஆம் ஆண்டிற்குப் பிறகு அவர் இந்திய அணியில் சேர்க்கப்படவில்லை.

முன்னதாக அஜித் அகார்கர் தலைவராக இருந்தபோது சீனியர் வீரர்கள் படிப்படியாக ஓரங்கட்டப்பட்டு வந்த நிலையில், தற்போது இடைக்காலத் தேர்வுக் குழுத் தலைவராகப் பொறுப்பேற்றுள்ள பிரக்யான் ஓஜா, நியூசிலாந்துக்கு எதிரான டி20 தொடருக்கு புவனேஷ்வர் குமாரைத் தேர்வு செய்து சீனியர்களுக்கான கதவைத் திறந்துள்ளார்.

அதேநேரம், நியூசிலாந்துக்கு எதிரான ஒருநாள் மற்றும் டெஸ்ட் தொடர்களில் முகமது ஷமி சேர்க்கப்படவில்லை. பிரசித் கிருஷ்ணாவின் உடற்தகுதியைப் பொறுத்தே டெஸ்ட் அணியில் ஷமிக்கு மாற்று வாய்ப்பு கிடைக்கும் எனக் கருதப்படும் சூழலில், சீனியர் வீரர்களை அணிக்குள் கொண்டுவர வேண்டும் என்ற கவாஸ்கரின் கருத்து முக்கியத்துவம் பெற்றுள்ளது.