நோர்வே தலைநகர் ஒஸ்லோவில் பேச்சுவார்த்தைக்கு முன்னதாக அமெரிக்க அதிபர் டொனால்ட் ட்ரம்பின் சிறப்புத் தூதர் ஸ்டீவ் விட்காஃப் உக்ரைன் அதிபர் வோலோடிமிர் ஜெலென்ஸ்கியை நேரில் சந்தித்து ஆரத்தழுவிக் கொண்டார். எனினும், போர்ச் சூழலில் உள்ள உக்ரைன் தொடர்பிலான தற்போதைய அமெரிக்கக் கொள்கைகள் குறித்து அதிபர் ஜெலென்ஸ்கி கொண்டுள்ள கடுமையான சந்தேகங்களை இந்தச் சந்திப்பு போக்க வாய்ப்பில்லை எனக் கருதப்படுகிறது.
இந்தச் சந்திப்புக் காட்சிகளை சமூக வலைத்தளத்தில் பகிர்ந்த ஜெலென்ஸ்கி, உக்ரைன் அமைதிக்காக உழைத்து வருவதாகவும், தங்களுக்கு ஆதரவளிக்கும் பங்காளிகளுக்கு நன்றி தெரிவிப்பதாகவும் பதிவிட்டிருந்தார். இருப்பினும், அண்மைக்கால நிகழ்வுகளுக்குப் பிறகு ஜெலென்ஸ்கி இன்னமும் டொனால்ட் ட்ரம்பைத் தனது கூட்டாளியாகக் கருதுகிறாரா என்ற கேள்வி சர்வதேச அளவில் எழுந்துள்ளது.
எப்போதும் நெருக்கமான உறவைக் கொண்டிராத இவ்விரு தலைவர்களுக்கும் இடையிலான உறவு, கடந்த பத்து நாட்களில் முன் எப்போதும் இல்லாத வகையில் தீவிரமான விரிசலைச் சந்தித்துள்ளதை அவர்களின் வார்த்தைகளும் நடவடிக்கைகளும் வெளிப்படுத்துகின்றன.
உக்ரைன் அதிபர் தொடர்பில் ட்ரம்ப் கடுமையாகக் கருத்து வெளியிட்டு வருவது நிலைமையை மேலும் சிக்கலாக்கியுள்ளது. கடந்த வாரம் நியூஸ்மேக்ஸ் ஊடகத்திற்குப் பேட்டியளித்த ட்ரம்ப், ஜெலென்ஸ்கி தங்களுடன் இணைந்து பணியாற்றுவதற்கு உகந்த நல்ல நபர் அல்ல என்று பகிரங்கமாகக் குற்றம்சாட்டினார்.
அதனைத் தொடர்ந்து, ரஷ்யாவுடனான டீசல் விவகாரம் அமெரிக்காவை வரலாற்றின் தவறான பக்கத்தில் நிறுத்தும் என்ற ஜெலென்ஸ்கியின் கூற்றுக்கு பதிலளித்த ட்ரம்ப், ஜெலென்ஸ்கி எதைப் பற்றிப் பேசுகிறார் என்றே அவருக்குத் தெரியவில்லை எனக் கடந்த திங்கட்கிழமை சாடினார்.
இவ்வாறான தனிப்பட்ட ரீதியிலான கடுமையான விமர்சனங்கள் ட்ரம்பின் தூதரக அணுகுமுறையில் வழக்கமான ஒன்றாகவே பார்க்கப்படுகிறது. கடந்த ஜூன் மாதம் இஸ்ரேலிய பிரதமர் பெஞ்சமின் நெதன்யாகுவுக்கு எவ்விதப் புரிதலும் இல்லை என்று தாக்கிப் பேசிய ட்ரம்ப், நான்கு மாதங்களுக்குப் பிறகு அவரை மாபெரும் போர்வீரர் பிரதமர் எனப் புகழ்ந்து தள்ளினார்.
இதன் காரணமாக ட்ரம்ப் தனது நிலைப்பாட்டை எந்நேரமும் மாற்றிக்கொள்ளலாம் என்றாலும், தற்போதைய சூழல் மிகவும் மோசமானதாகவே தென்படுவதாக ஐரோப்பிய சீர்திருத்த மையத்தைச் சேர்ந்த இயன் பாண்ட் தெரிவித்துள்ளார்.
