ரிஷப் பண்டுக்கு ஏற்பட்ட காயத்தால் இஷான் கிஷனுக்கு அடித்த அதிர்ஷ்டம் – துணை கேப்டனாக கே.எல்.ராகுல்?

சென்னை, செப். 4, 2025: இந்திய கிரிக்கெட் அணியின் துணை கேப்டனான ரிஷப் பண்ட்-க்கு ஏற்பட்ட காயத்தால், வெஸ்ட் இண்டீஸ் அணிக்கு எதிரான டெஸ்ட் தொடரில் விக்கெட் கீப்பர் பேட்ஸ்மேன் இஷான் கிஷனுக்கு வாய்ப்பு கிடைக்கும் சூழல் உருவாகியுள்ளது. ரிஷப் பண்ட் இல்லாத நிலையில், துணை கேப்டனாக கே.எல்.ராகுல் செயல்படவும் வாய்ப்புள்ளதாகத் தெரிகிறது.

சமீபத்தில் சுப்மன் கில் தலைமையில் இங்கிலாந்தில் நடைபெற்ற ஐந்து போட்டிகள் கொண்ட ஆண்டர்சன் டெண்டுல்கர் டெஸ்ட் தொடரில் இந்திய அணி பங்கேற்றது. முதல் முறையாக சர்வதேச டெஸ்ட் கேப்டனாக செயல்பட்ட சுப்மன் கில்லின் கேப்டன்சி இங்கிலாந்து தொடரில் சிறப்பாக இருந்ததாகக் கூறப்படுகிறது.

இதனைத் தொடர்ந்து, தற்போது இந்திய மண்ணில் நடைபெறவுள்ள வெஸ்ட் இண்டீஸ் அணிக்கு எதிரான டெஸ்ட் தொடரில் சுப்மன் கில் முதல் முறையாக கேப்டனாக செயல்பட இருக்கிறார். இந்தத் தொடரில் இந்திய அணியின் துணை கேப்டனான ரிஷப் பண்ட்டால் பங்கேற்க முடியாத சூழல் ஏற்பட்டுள்ளது.

ரிஷப் பண்ட் காயம் மற்றும் இஷான் கிஷனுக்கு வாய்ப்பு: இங்கிலாந்து தொடரின் போது கால் பகுதியில் காயமடைந்த ரிஷப் பண்ட், அந்தக் காயத்திலிருந்து மீண்டு வர இன்னும் சில மாதங்கள் ஆகும் என்பதால், வெஸ்ட் இண்டீஸ் அணிக்கு எதிரான டெஸ்ட் தொடரில் அவர் இடம்பிடிக்க மாட்டார் என்று தெரிகிறது.

ரிஷப் பண்ட்டுக்கு ஏற்பட்டுள்ள இந்தக் காயத்தால், மற்றொரு விக்கெட் கீப்பர் பேட்ஸ்மேனான இஷான் கிஷனுக்கு இந்த வெஸ்ட் இண்டீஸ் தொடருக்கான இந்திய டெஸ்ட் அணியில் இடம் பிடிக்க வாய்ப்புள்ளதாகக் கூறப்படுகிறது. கடந்த 2023 ஆம் ஆண்டு இந்திய அணிக்காக டெஸ்ட் போட்டிகளில் அறிமுகமான இஷான் கிஷன், இதுவரை இரண்டு டெஸ்ட் போட்டிகளில் விளையாடியுள்ளார். 

தற்போது அவர் மீண்டும் டெஸ்ட் போட்டிகளுக்குத் திரும்பும் வாய்ப்பைப் பெறவுள்ளார். இந்திய அணிக்காக மூன்று விதமான கிரிக்கெட்டிலும் விளையாடி உள்ள இஷான் கிஷன், கடந்த இரண்டு ஆண்டுகளாகவே நிரந்தர இடம் இல்லாமல் போராடி வருவது குறிப்பிடத்தக்கது.

துணை கேப்டனாக கே.எல்.ராகுல்? 

இந்திய டெஸ்ட் அணியின் துணை கேப்டனான ரிஷப் பண்ட் அடுத்த தொடரில் பங்கேற்க மாட்டார் என்பதால், வெஸ்ட் இண்டீஸ் அணிக்கு எதிரான டெஸ்ட் தொடருக்கான துணை கேப்டனாக கே.எல்.ராகுல் செயல்பட வாய்ப்புள்ளதாகவும் தெரிகிறது.