அமெரிக்க தாக்குதலில் உயிரிழந்த 84 ஈரான் கடற்படையினரின் உடல்கள் ஈரானுக்கு அனுப்பி வைப்பு

இலங்கைக்குத் தெற்கே உள்ள சர்வதேச கடற்பரப்பில் அமெரிக்க தாக்குதலுக்கு இலக்காகி மூழ்கடிக்கப்பட்டதாக கூறப்படும் “IRIS DENA” கப்பலில் உயிரிழந்த 84 ஈரானிய கடற்படையினரின் உடல்கள் இன்று (13) ஈரானுக்கு அனுப்பப்படவுள்ளதாக பாதுகாப்பு அமைச்சு தெரிவித்துள்ளது. இந்த சம்பவம் சர்வதேச அளவில் கவனம் பெற்ற நிலையில், உயிரிழந்தவர்களின் உடல்களை தாய்நாட்டிற்கு அனுப்புவதற்கான ஏற்பாடுகள் தற்போது நிறைவு செய்யப்பட்டுள்ளன.

உயிரிழந்த கடற்படையினரின் உடல்களை ஏற்றிய விசேட விமானம் ஒன்று மத்தல சர்வதேச விமான நிலையத்திலிருந்து இன்று ஈரான் நோக்கிப் புறப்படத் தயாராக உள்ளதாக அதிகாரிகள் தெரிவித்துள்ளனர். இலங்கையில் செயல்படும் ஈரான் தூதரகத்தின் நேரடி ஒருங்கிணைப்பின் கீழ் இந்த நடவடிக்கை மேற்கொள்ளப்பட்டுள்ளதாகவும் பாதுகாப்பு அமைச்சு குறிப்பிட்டுள்ளது.

காலி துறைமுகத்திலிருந்து சுமார் 40 மைல் தொலைவில் இந்த ஈரானிய கடற்படை கப்பல் விபத்துக்குள்ளானதாக தகவல்கள் வெளியாகின. அந்த நேரத்தில் கப்பலில் சுமார் 180 பேர் இருந்ததாகவும் கூறப்படுகிறது. சம்பவத்துக்குப் பின்னர் மீட்கப்பட்ட 35 கடற்படையினர் காலி கராப்பிட்டிய வைத்தியசாலையில் சிகிச்சைக்காக அனுமதிக்கப்பட்டனர். அதே சமயம் 84 பேரின் உடல்கள் மீட்கப்பட்டதாக அதிகாரிகள் உறுதிப்படுத்தினர்.

இந்த சம்பவம் தொடர்பாக அமெரிக்க பாதுகாப்புச் செயலாளர் Peter Hegseth பின்னர் வெளியிட்ட தகவலில், சர்வதேச கடற்பரப்பில் அமெரிக்க நீர்மூழ்கிக் கப்பலிலிருந்து ஏவப்பட்ட டோர்பிடோ தாக்குதலின் காரணமாக அந்த ஈரானிய கப்பல் மூழ்கடிக்கப்பட்டதாக உறுதிப்படுத்தியிருந்தார். இந்த தகவல் வெளியாகியதன் பின்னர் சர்வதேச அரசியல் வட்டாரங்களில் இந்த சம்பவம் குறித்து அதிக கவனம் செலுத்தப்பட்டு வருகிறது.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS