பைனலில் வரலாறு படைத்த பும்ரா… டி20 உலகக் கோப்பையில் மாபெரும் சாதனை! என்ன தெரியுமா?

அகமதாபாத் நரேந்திர மோடி மைதானத்தில் நடைபெற்ற 2026 ஐசிசி டி20 உலகக் கோப்பை இறுதிப் போட்டியில் இந்திய அணியின் மூத்த வேகப்பந்து வீச்சாளர் ஜஸ்பிரித் பும்ரா வரலாற்றுச் சாதனை ஒன்றை படைத்துள்ளார். இந்தப் போட்டியில் நியூசிலாந்து அணியை 96 ரன்கள் வித்தியாசத்தில் வீழ்த்திய இந்தியா, மூன்றாவது முறையாக டி20 உலகக் கோப்பையை கைப்பற்றியது. இந்த வெற்றியில் பும்ராவின் பந்துவீச்சு முக்கிய பங்காற்றியது.

டி20 உலகக் கோப்பை வரலாற்றில் அதிக விக்கெட்டுகளை வீழ்த்திய வேகப்பந்து வீச்சாளர் என்ற பெருமை இதற்கு முன்பு இலங்கையின் லசித் மலிங்காவிடம் இருந்தது. அவர் உலகக் கோப்பை தொடர்களில் மொத்தம் 38 விக்கெட்டுகளை எடுத்திருந்தார். ஆனால் நியூசிலாந்து அணிக்கு எதிரான இறுதிப் போட்டியில் 4 விக்கெட்டுகளை கைப்பற்றியதன் மூலம் ஜஸ்பிரித் பும்ரா அந்த சாதனையை முறியடித்தார்.

தற்போது பும்ரா 26 இன்னிங்ஸ்களில் மொத்தம் 40 விக்கெட்டுகளை கைப்பற்றி, டி20 உலகக் கோப்பை வரலாற்றில் அதிக விக்கெட்டுகளை எடுத்த வேகப்பந்து வீச்சாளர் என்ற பெருமையை பெற்றுள்ளார். மேலும் அவரது பந்துவீச்சு எகானமி 5.66 என்ற அளவில் மிகவும் சிறப்பாக உள்ளது. இவருக்குப் பிறகு தென் ஆப்பிரிக்காவின் அன்ரிக் நோக்கியா 38 விக்கெட்டுகளுடனும், இந்தியாவின் அர்ஷ்தீப் சிங் 36 விக்கெட்டுகளுடனும் அடுத்தடுத்த இடங்களில் உள்ளனர்.

இந்த இறுதிப் போட்டியில் பும்ரா தனது நான்கு ஓவர்களில் வெறும் 15 ரன்கள் மட்டுமே விட்டுக்கொடுத்து நான்கு முக்கிய விக்கெட்டுகளை வீழ்த்தினார். ரச்சின் ரவீந்திரா, மிட்செல் சாண்ட்னர், ஜேம்ஸ் நீஷம் மற்றும் மேட் ஹென்றி ஆகியோரை அவர் அவுட் செய்தார்.

டி20 உலகக் கோப்பை இறுதிப் போட்டி வரலாற்றில் வேகப்பந்து வீச்சாளரின் மிகச் சிறந்த பந்துவீச்சுகளில் இதுவும் ஒன்றாக கருதப்படுகிறது. இதற்கு முன்பு எந்த வேகப்பந்து வீச்சாளரும் இறுதிப் போட்டியில் இவ்வளவு குறைவான ரன்களை விட்டுக்கொடுத்து நான்கு விக்கெட்டுகளை வீழ்த்தியதில்லை. ஒட்டுமொத்தமாகப் பார்க்கும்போது, இலங்கையின் சுழற்பந்து வீச்சாளர் அஜந்தா மெண்டிஸ் மட்டுமே 4 விக்கெட்டுக்கு 12 ரன்கள் என்ற சாதனையுடன் பும்ராவை விட சிறந்த பந்துவீச்சை இறுதிப் போட்டியில் பதிவு செய்துள்ளார்.

2026 டி20 உலகக் கோப்பை தொடர் முழுவதும் பும்ரா சிறப்பான பந்துவீச்சை வெளிப்படுத்தினார். இறுதிப் போட்டியில் எடுத்த நான்கு விக்கெட்டுகளையும் சேர்த்து, இந்த தொடரில் அவர் மொத்தம் 14 விக்கெட்டுகளை வீழ்த்தியுள்ளார். இதன் மூலம் அதிக விக்கெட்டுகளை எடுத்தவர்கள் பட்டியலில் இந்திய வீரர் வருண் சக்கரவர்த்தியுடன் இணைந்து முதலிடத்தைப் பகிர்ந்து கொண்டுள்ளார். வருண் சக்கரவர்த்தியும் இந்த தொடரில் 14 விக்கெட்டுகளை கைப்பற்றியுள்ளார்.

போட்டியைப் பொறுத்தவரை, முதலில் பேட்டிங் செய்த இந்திய அணி சஞ்சு சாம்சன், அபிஷேக் ஷர்மா மற்றும் இஷான் கிஷன் ஆகியோரின் அரைசதங்களின் உதவியுடன் 20 ஓவர்களில் 255 ரன்கள் குவித்தது. பின்னர் விளையாடிய நியூசிலாந்து அணி இந்திய பந்துவீச்சாளர்களை சமாளிக்க முடியாமல் 159 ரன்களுக்கு அனைத்து விக்கெட்டுகளையும் இழந்தது.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS