இலங்கையில் வங்கிக் கணக்கு ஆரம்பித்தல், வாகனப் பதிவு, காணிப் பதிவு உள்ளிட்ட எட்டு முக்கியமான சேவைகளைப் பெற்றுக்கொள்வதற்கு இன்று (நவம்பர் 01) முதல் வரி செலுத்துவோர் அடையாள இலக்கமான TIN (Taxpayer Identification Number) சமர்ப்பிப்பது கட்டாயமாக்கப்பட்டுள்ளதாக உள்நாட்டு இறைவரித் திணைக்களம் அறிவித்துள்ளது.
இதன்படி, குறிப்பிட்ட நிதி, சொத்து மற்றும் வணிக நடவடிக்கைகளை மேற்கொள்ளும் பொதுமக்கள் செல்லுபடியாகும் TIN இலக்கத்தைச் சமர்ப்பிக்க வேண்டுமெனத் தெரிவிக்கப்பட்டுள்ளது.
புதிய நடைமுறையின் கீழ் வங்கி அல்லது நிதி நிறுவனங்களில் கணக்குகளை ஆரம்பித்தல், கட்டட வரைபடங்களுக்கான அனுமதியைப் பெற்றுக்கொள்ளுதல், மோட்டார் வாகனங்களைப் பதிவு செய்தல் மற்றும் மோட்டார் வாகன வருமான அனுமதிப்பத்திரங்களைப் புதுப்பித்தல் ஆகிய நடவடிக்கைகளுக்கு TIN இலக்கம் அவசியமாகும்.
அதேபோன்று, காணி அல்லது காணி உரிமையைப் பதிவு செய்தல், வணிக நிறுவனங்களைப் பதிவு செய்தல், இலங்கையில் பதிவு செய்யப்பட்ட நிறுவனங்களின் பங்குகளை மாற்றுதல் மற்றும் கடனட்டைகளைப் பெற்றுக்கொள்ளுதல் ஆகிய நடவடிக்கைகளுக்கும் TIN இலக்கம் சமர்ப்பிக்கப்பட வேண்டும்.
இந்தச் சேவைகளை வழங்கும் சம்பந்தப்பட்ட அதிகாரிகள், பரிவர்த்தனைகளை மேற்கொள்வதற்கு முன்னர் சமர்ப்பிக்கப்பட்ட TIN இலக்கம் செல்லுபடியாகுமா என்பதைச் சரிபார்க்க வேண்டும் என உள்நாட்டு இறைவரித் திணைக்களம் அறிவுறுத்தியுள்ளது.
இதுவரை TIN இலக்கத்தைப் பெற்றுக்கொள்ளாதவர்கள் உள்நாட்டு இறைவரித் திணைக்களத்தின் உத்தியோகபூர்வ e-Services இணையத்தளத்தின் ஊடாகப் பதிவு செய்து இலக்கத்தைப் பெற்றுக்கொள்ள முடியும் எனத் தெரிவிக்கப்பட்டுள்ளது.
ஏற்கெனவே TIN இலக்கம் பெற்றுள்ளவர்கள் அதன் செல்லுபடியாகும் தன்மையை இணையவழியில் உறுதிப்படுத்திக்கொள்வதற்கான வசதிகளும் ஏற்படுத்தப்பட்டுள்ளன.
உள்நாட்டு இறைவரி ஆணையாளர் நாயகத்தின் அறிவுறுத்தலின்படி, இணையவழிச் சரிபார்ப்பு வெற்றிகரமாக நிறைவடைந்ததும் சம்பந்தப்பட்ட நபரின் TIN இலக்கம் திரையில் காண்பிக்கப்படும்.
அந்தத் திரையில் காண்பிக்கப்படும் தகவல்களை அச்சிட்டு, தேசிய அடையாள அட்டை இலக்கம் மற்றும் TIN இலக்கம் தெளிவாகக் குறிப்பிடப்பட்டுள்ள ஆவணத்தைச் சமர்ப்பிக்க முடியும்.
குறிப்பிட்ட சேவைகளுக்காக உத்தியோகபூர்வ TIN சான்றிதழுக்குப் பதிலாக இந்த அச்சிடப்பட்ட ஆவணமும் ஏற்றுக்கொள்ளப்படும் எனத் திணைக்களம் தெரிவித்துள்ளது.
இதனிடையே, TIN இலக்கத்தைப் பெற்றுக்கொள்வது தொடர்பாகப் பொதுமக்கள் மத்தியில் பரவி வரும் தவறான தகவல்களுக்கும் உள்நாட்டு இறைவரித் திணைக்களம் விளக்கமளித்துள்ளது.
18 வயதுக்கு மேற்பட்ட அனைவரும் TIN இலக்கத்தைப் பெற்றுக்கொள்வது கட்டாயமாக இருந்தாலும், TIN இலக்கம் வைத்திருக்கும் அனைவரும் வருமான வரி செலுத்த வேண்டும் என்பது உண்மையல்ல எனத் திணைக்களம் தெளிவுபடுத்தியுள்ளது.
வருமான வரி செலுத்த வேண்டிய கடப்பாடு, ஒருவரின் வருமானம் மற்றும் பொருந்தக்கூடிய வரிச் சட்ட ஏற்பாடுகளின் அடிப்படையிலேயே தீர்மானிக்கப்படும் எனத் தெரிவிக்கப்பட்டுள்ளது.
திணைக்களத்தின் அறிவிப்பின்படி, ஆண்டுக்கு 18 இலட்சம் ரூபாய்க்கும் அதிகமான வருமானம் பெறுபவர்களே தனிநபர் வருமான வரிக்கான வருமான வரம்பை மீறுகின்றனர். இருப்பினும், உண்மையான வரிப் பொறுப்பு பொருந்தக்கூடிய விலக்குகள் மற்றும் வரி விதிகளுக்கு அமைவாகத் தீர்மானிக்கப்படும்.
எனவே, TIN இலக்கம் பெற்றிருப்பதாலேயே ஒருவர் கட்டாயமாக வருமான வரி செலுத்த வேண்டிய நிலை ஏற்படாது என உள்நாட்டு இறைவரித் திணைக்களம் வலியுறுத்தியுள்ளது.
இதற்கிடையில், இலங்கையில் 18 வயதுக்கு மேற்பட்ட சுமார் 1 கோடியே 30 இலட்சம் பேர் இதுவரை TIN இலக்கத்தைப் பெற்றுள்ளதாக உள்நாட்டு இறைவரித் திணைக்கள வட்டாரங்கள் தெரிவித்துள்ளன.
புதிய நடைமுறை இன்று முதல் அமுலுக்கு வந்துள்ள நிலையில், வங்கி, வாகனப் பதிவு, காணிப் பதிவு மற்றும் ஏனைய குறிப்பிட்ட சேவைகளைப் பெற்றுக்கொள்ளத் திட்டமிட்டுள்ள பொதுமக்கள் தங்களது TIN இலக்கம் செல்லுபடியாகும் நிலையில் உள்ளதா என்பதை முன்கூட்டியே உறுதிப்படுத்திக்கொள்ளுமாறு அறிவுறுத்தப்படுகின்றனர்.
TIN பதிவு மற்றும் இலக்கச் சரிபார்ப்புக்கான சேவைகளை இலங்கை உள்நாட்டு இறைவரித் திணைக்களத்தின் உத்தியோகபூர்வ இணையத்தளமான www.ird.gov.lk ஊடாக அணுக முடியும்.
