கடைசி லீக் போட்டியில் பும்ரா ஓய்வு? இந்த வீரருக்கு இன்றாவது வாய்ப்பு கிடைக்குமா? 

ஆசியக் கோப்பை தொடர் 2025 -இன் சூப்பர் ஃபோர் சுற்றுக்கு ஏற்கனவே தகுதி பெற்றுவிட்ட இந்திய அணி தனது கடைசி லீக் போட்டியில் ஓமனை இன்று வெள்ளிக்கிழமை எதிர்கொள்கிறது. 

இந்தப் போட்டியின் முடிவு இந்திய அணியை பாதிக்காது என்றாலும், இந்த போட்டியில் சில முக்கிய மாற்றங்கள் செய்யப்படும் என எதிர்பார்க்கப்படுகிறது.

இந்திய வேகப்பந்து வீச்சின் முதுகெலும்பான ஜஸ்பிரித் பும்ராவுக்கு ஓய்வளிக்கப்படலாம் என்று தெரிகின்றது. செப்டம்பர் 21, 24 மற்றும் 26 ஆகிய தேதிகளில் சூப்பர் ஃபோர் போட்டிகளும், செப்டம்பர் 28 அன்று இறுதிப் போட்டியும் நடைபெற உள்ளதால், இந்திய அணி அடுத்த ஏழு நாட்களில் நான்கு போட்டிகளில் விளையாட வேண்டியிருக்கும். 

இந்தச் சூழலில், அணியின் முக்கிய வேகப்பந்து வீச்சாளரான பும்ராவை புத்துணர்ச்சியுடன் வைத்திருக்க, அவருக்கு ஓய்வளிப்பது ஒரு சிறந்த முடிவாகவே பார்க்கப்படுகிறது.

பாகிஸ்தானுக்கு எதிரான கடந்த போட்டியில் பும்ரா நான்கு ஓவர்கள் மட்டுமே பந்துவீசியிருந்தாலும், முக்கியமான கட்டங்களில் அவரது பங்களிப்பு அணிக்கு அத்தியாவசியமானது. எனவே, அணி நிர்வாகம் பும்ராவை பாதுகாப்பாக வைத்திருக்கவே விரும்பும். 

பும்ராவுக்கு ஓய்வளிக்கப்பட்டால், அந்த இடத்திற்கு இடது கை வேகப்பந்து வீச்சாளர் அர்ஷ்தீப் சிங் தேர்வு செய்யப்படுவது கிட்டத்தட்ட உறுதியாகியுள்ளது. இதுவரை அர்ஷ்தீப் சிங்குக்கு ஆடும் லெவனில் இடம் கிடைக்கவில்லை.

இந்த வாய்ப்பு, மீண்டும் அணிக்குள் தனது இடத்தைப் பிடிக்க அவருக்கு ஒரு சிறந்த வாய்ப்பாக அமையும். மேலும், சர்வதேச டி20 போட்டிகளில் 100 விக்கெட்டுகள் என்ற மைல்கல்லை எட்ட அர்ஷ்தீப் சிங்குக்கு இன்னும் ஒரு விக்கெட் மட்டுமே தேவைப்படுகிறது. 

பயிற்சியாளர் கௌதம் கம்பீர், இன்னும் சில பரிசோதனை முயற்சிகளில் ஈடுபட விரும்பினால், இளம் வேகப்பந்து வீச்சாளர் ஹர்ஷித் ராணாவுக்கும் வாய்ப்பு கிடைக்கலாம். 

சுழற்பந்து வீச்சாளர்களில் ஒருவருக்கு ஓய்வளித்து, அந்த இடத்தில் ராணாவை களமிறக்க வாய்ப்புள்ளது. குறிப்பாக, ஹர்திக் பாண்டியாவுக்கு ஓய்வளிக்கப்பட்டு, அந்த இடத்தில் ஹர்ஷித் ராணா தனது முதல் ஆட்டத்தில் களமிறக்கப்படலாம்.