நியூசிலாந்தின் அதிரடி வெற்றி; உலக டெஸ்ட் சாம்பியன்ஷிப் பட்டியலில் இந்தியா சரிவு

நியூசிலாந்து கிரிக்கெட் அணி மற்றும் வெஸ்ட் இண்டீஸ் கிரிக்கெட் அணி மோதிய இரண்டாவது டெஸ்ட் போட்டியில், நியூசிலாந்து அணி 9 விக்கெட் வித்தியாசத்தில் அபார வெற்றியைப் பதிவு செய்தது. 

இந்த வெற்றியின் மூலம் உலக டெஸ்ட் சாம்பியன்ஷிப் 2025–27 புள்ளிப்பட்டியலில் நியூசிலாந்து அதிவேகமாக முன்னேற, இந்திய கிரிக்கெட் அணி மேலும் ஒரு இடம் சரிந்து 6-வது இடத்துக்குத் தள்ளப்பட்டுள்ளது.

வெலிங்டனில் உள்ள பேசின் ரிசர்வ் மைதானத்தில் நடைபெற்ற இந்த டெஸ்டில், நியூசிலாந்து பந்துவீச்சாளர்கள் முழுமையான ஆதிக்கம் செலுத்தினர். இரண்டாவது இன்னிங்ஸில் வெஸ்ட் இண்டீஸ் அணி வெறும் 128 ரன்களுக்கு ஆல் அவுட் ஆனது. தொடர்ந்து 56 ரன்கள் என்ற எளிய இலக்கை ஒரு விக்கெட் இழப்பில் எட்டிய நியூசிலாந்து, தொடரையும் கைப்பற்றியதுடன் புள்ளிப்பட்டியலிலும் பெரிய பாய்ச்சலை நிகழ்த்தியது.

இந்தப் போட்டிக்கு முன் 7-வது இடத்தில் இருந்த நியூசிலாந்து, இந்த வெற்றியால் நேரடியாக 3-வது இடத்துக்கு முன்னேறியுள்ளது. 2021 உலக டெஸ்ட் சாம்பியனான நியூசிலாந்து தற்போது 66.67 சதவீத வெற்றி விகிதத்துடன் வலுவான நிலையில் உள்ளது. 

இந்த திடீர் முன்னேற்றம் இந்திய அணிக்குப் பின்னடைவை ஏற்படுத்தியுள்ளது. ஏற்கனவே தென்னாப்பிரிக்கா கிரிக்கெட் அணிக்கு எதிராக சொந்த மண்ணில் தொடரை இழந்த இந்தியா, 48.15 வெற்றி சதவீதத்துடன் இப்போது 6-வது இடத்தில் உள்ளது. 

தொடர்ந்து இரண்டு முறை இறுதிப்போட்டியை எட்டிய இந்தியாவுக்கு, இந்த சாம்பியன்ஷிப்பில் முதல் இரண்டு இடங்களுக்குள் நுழைவது கடினமாகும் நிலை உருவாகியுள்ளது.

மற்றொரு புறம், ஆஸ்திரேலியா கிரிக்கெட் அணி விளையாடிய அனைத்து போட்டிகளிலும் வெற்றி பெற்று 100% வெற்றி சதவீதத்துடன் முதலிடத்தில் கம்பீரமாகத் தொடர்கிறது. 75% வெற்றி சதவீதத்துடன் தென்னாப்பிரிக்கா இரண்டாம் இடத்தில் உள்ளது. 7 போட்டிகளில் 6 தோல்விகளைச் சந்தித்த வெஸ்ட் இண்டீஸ் புள்ளிப்பட்டியலில் கடைசி இடத்தில் உள்ளது. நியூசிலாந்து அடுத்த டெஸ்டிலும் வென்றால், தென்னாப்பிரிக்காவை பின்னுக்குத் தள்ளி 2-வது இடத்தைப் பிடிக்கும் வாய்ப்பும் உள்ளது; இது இந்திய அணிக்கு மேலும் அழுத்தத்தை ஏற்படுத்தும்.

நாட்டு நடப்புகளை உங்கள் அலைபேசியில் பெற்றுக்கொள்ள Colomboதமிழ் WHATSAPP மற்றும் GOOGLE NEWS பக்கத்தில் இணையுங்கள்.

WHATSAPP CHANNEL GOOGLE NEWS