நேபாள வெள்ளத்தில் கட்டடங்கள் குச்சிகள்போல் அடித்துச் செல்லப்பட்டன – டிரம்ப் அதிர்ச்சி

நேபாளத்தில் ஏற்பட்ட பயங்கர பெருவெள்ளம், உலகம் முழுவதும் அதிர்வலைகளை ஏற்படுத்தியுள்ள நிலையில், காணாமல் போனவர்கள் குறித்த ஏதேனும் தகவல் கிடைக்குமா என்று உலகின் பல பகுதிகளில் இருப்பவர்கள் ஆதங்கத்துடன் காத்திருக்கின்றனர்.

அந்த வகையில், நேபாளத்திலிருந்து திபெத்தில் உள்ள கைலாய மலைக்கு நடைப்பயணம் சென்ற 10 அமெரிக்க ஆடவர்களில் ஒருவரின் மனைவி சினேகா சுதிர், தற்போதைய நிலை குறித்து ராய்ட்டர்ஸ் செய்தி நிறுவனத்திடம் உருக்கமாக பேசியுள்ளார். அவர் கூறுகையில், "பெண்கள் நாங்கள் ஒருவருக்கொருவர் ஆதரவாக இருக்கிறோம். அமெரிக்கா, இந்தியா உள்ளிட்ட நாடுகளில் உள்ள அதிகாரிகள், அரசியல்வாதிகள், உறவினர்கள், நண்பர்கள் என்று மாற்றி மாற்றி தொடர்புகொண்டு வருகிறோம். ஒவ்வொருவராக அழுகிறோம். கண்ணீரைத் துடைத்துக்கொண்டு மீண்டும் தேடும் பணியைத் தொடர்கிறோம்" என்றார். இந்த பயணக்குழுவில் உள்ளவர்களின் நிலை குறித்து இதுவரை உறுதியான தகவல் ஏதும் கிடைக்கவில்லை.

இதற்கிடையில், நேபாள பெருவெள்ளத்திற்கு அமெரிக்கா உதவி வழங்க முன்வந்துள்ளதாக அமெரிக்க அதிபர் டோனல்ட் டிரம்ப் தெரிவித்துள்ளார். வெள்ளத்தின் பயங்கரத்தை விவரித்த அவர், "வலுவாகக் கட்டப்பட்ட கட்டடங்கள் கூட குச்சிகளைப் போல அடித்துச் செல்லப்பட்டன" என்று குறிப்பிட்டார். மேலும், தாம் தேவையான உதவிகளை வழங்கத் தயாராக இருப்பதாக நேபாளத் தலைவர்களிடம் ஏற்கனவே தெரிவித்துவிட்டதாகவும் அவர் சொன்னார்.

இந்த வெள்ளம் நேபாளத்தில் 472-க்கும் மேற்பட்டோரின் உயிர்களைப் பறித்துள்ள நிலையில், 1,400-க்கும் மேற்பட்டோர் இன்னும் காணாமல் போயுள்ளனர். அமெரிக்க உட்பட பல நாடுகள் தங்கள் குடிமக்களின் நிலை குறித்த தகவல்களை சேகரித்து வருகின்றன. நிவாரண மற்றும் மீட்புப் பணிகளுக்கு பல்வேறு நாடுகளின் உதவிகளும் வரத்தொடங்கியுள்ளன.

கைலாய மலைப் பயணிகளின் நிலை குறித்து தகவல் கிடைக்காததால் அவர்களின் குடும்பத்தினர் மிகுந்த மன உளைச்சலில் உள்ளனர். மீட்புப் பணிகள் தீவிரமாக நடைபெற்று வரும் வேளையில், உலகம் முழுவதிலும் உள்ள மக்கள் இந்த சோகத்தில் பாதிக்கப்பட்டவர்களுக்காக பிரார்த்தனைகளில் ஈடுபட்டுள்ளனர்.