எந்தவொரு பந்தும் வீசப்படாமல் இந்தியா மற்றும் பாகிஸ்தான் அரையிறுதிக்கு தகுதி

ஜப்பானின் நிஷின் நகரில் நடைபெற்று வரும் 2026 ஆசிய விளையாட்டுப் போட்டிகளின் ஆடவர் கிரிக்கெட் காலிறுதி ஆட்டம் கனமழை காரணமாக கைவிடப்பட்ட நிலையில், சர்வதேச டி20 தரவரிசை விதிகளின் பிரகாரம் இந்திய அணி நேரடியாக அரையிறுதிச் சுற்றுக்கு தகுதி பெற்றுள்ளது.

இந்தியா மற்றும் ஆப்கானிஸ்தான் அணிகளுக்கு இடையிலான இப்போட்டி ஒரு பந்து கூட வீசப்படாமல் ரத்து செய்யப்பட்டதால், ஆப்கானிஸ்தான் அணி தொடரிலிருந்து ஏமாற்றத்துடன் வெளியேறியுள்ளது.

நிஷின் நகரில் அமைந்துள்ள கோரோகி ஸ்போர்ட்ஸ் பார்க் மைதானத்தில் செப்டம்பர் 28 அன்று காலை இந்தியா மற்றும் ஆப்கானிஸ்தான் அணிகள் மோதும் இரண்டாவது காலிறுதி ஆட்டம் திட்டமிடப்பட்டிருந்தது.

எனினும் காலை முதலே தொடர்ந்து பெய்த பலத்த மழை காரணமாக ஆடுகளம் மற்றும் மைதானப் பகுதிகள் முழுமையாக ஈரப்பதமடைந்தன. மழை தணியாமல் நீடித்ததால் ஆடுகளத்தை தயார்படுத்துவதில் பெரும் சிக்கல் ஏற்பட்டதுடன், நாணயச் சுழற்சி கூட நடத்தப்படாமல் ஆட்டத்தை முழுமையாக கைவிடுவதாக கள நடுவர்கள் தீர்மானித்தனர்.

ஆசிய விளையாட்டுப் போட்டி விதிகளின்படி நாக்-அவுட் ஆட்டங்கள் மழையினால் முழுமையாக கைவிடப்படும் சந்தர்ப்பங்களில் மேலதிக நாளோ அல்லது சுப்பர் ஓவர் முறையோ நடைமுறையில் இல்லை.

இவ்வாறான சூழலில் சர்வதேச கிரிக்கெட் பேரவையின் சர்வதேச டி20 தரவரிசையில் முன்னிலையில் உள்ள அணியே வெற்றியாளராக தீர்மானிக்கப்பட்டு அடுத்த சுற்றுக்கு தகுதி பெறும். அதற்கமைய சர்வதேச டி20 தரவரிசையில் முதலிடத்தில் இருக்கும் இந்திய அணி, பத்தாவது இடத்தில் உள்ள ஆப்கானிஸ்தானை பின்தள்ளி ஸ்ரேயாஸ் ஐயர் தலைமையில் நேரடியாக அரையிறுதிக்கு முன்னேறியுள்ளது.

இதே மைதானத்தில் முன்னதாக நடைபெறவிருந்த முதலாவது காலிறுதி ஆட்டமும் மழை காரணமாக கைவிடப்பட்டது. அதிலும் சர்வதேச தரவரிசையின் அடிப்படையில் 24ஆவது இடத்திலுள்ள ஹொங்கொங் அணியை விட ஆறாவது இடத்தில் உள்ள பாகிஸ்தான் அணி அரையிறுதி வாய்ப்பைப் பெற்றது.

இதன்மூலம் ஒரே நாளில் எந்தவொரு பந்தும் வீசப்படாமல் இந்தியா மற்றும் பாகிஸ்தான் ஆகிய இரு அணிகளும் அரையிறுதிக்கு தகுதி பெற்றுள்ளன. இந்திய அணி தனது அரையிறுதி மோதலில் இலங்கை மற்றும் நேபாள அணிகளுக்கு இடையிலான காலிறுதிப் போட்டியில் வெற்றி பெறும் அணியை எதிர்கொள்ளவுள்ளது.