ஆசிரமத்துக்கு செல்ல 5 கோடி ரூபாய் வாங்கினேனா? குற்றச்சாட்டுக்கு விராட் கோலி விளக்கம்!
பிரேமானந்த் மகாராஜை சந்திக்க ரூ.5 கோடி பெற்றதாக தினேஷ் சர்மா முன்வைத்த குற்றச்சாட்டை விராட் கோலி தரப்பு திட்டவட்டமாக மறுத்துள்ளதுடன், சந்திப்பு தனிப்பட்ட நம்பிக்கையின் அடிப்படையில் மட்டுமே நடந்தது என விளக்கம் அளித்துள்ளது.
ஆன்மிக குரு பிரேமானந்த் மகாராஜை ஆசிரமத்தில் சந்திப்பதற்காக இந்திய கிரிக்கெட் அணியின் நட்சத்திர வீரர் விராட் கோலிக்கு ரூ.5 கோடி வழங்கப்பட்டதாக பரவி வரும் தகவல்களை அவரது தரப்பு திட்டவட்டமாக மறுத்துள்ளது.
இந்த விவகாரம் தொடர்பாக சமூக வலைதளங்களில் விவாதங்கள் தீவிரமடைந்துள்ள நிலையில், இது முற்றிலும் ஆதாரமற்ற மற்றும் தவறான குற்றச்சாட்டு என கோலியின் செய்தித் தொடர்பாளர் தெளிவுபடுத்தியுள்ளார்.
ஸ்ரீ கிருஷ்ண ஜென்மபூமி சங்கர்ஷ் நியாஸ் அமைப்பின் தலைவரான தினேஷ் சர்மா (பலஹாரி மகாராஜ்), பிரேமானந்த் மகாராஜின் ஆசிரமத்திற்கு விராட் கோலியை அழைத்து வருவதற்காக ரூ.5 கோடி செலவிடப்பட்டதாக குற்றம்சாட்டியதாக செய்திகள் வெளியாகின.
மேலும், குறிப்பிட்ட சில கட்டுமானம் மற்றும் நிலம் சார்ந்த வணிகக் குழுக்களின் ஆதாயத்திற்காகவே இந்தச் சந்திப்பு ஏற்பாடு செய்யப்பட்டதாகவும் அவர் கூறியதாக தகவல்கள் பரவின.
இக்குற்றச்சாட்டுகளை முழுமையாக நிராகரித்துள்ள விராட் கோலியின் செய்தித் தொடர்பாளர், முன்வைக்கப்பட்டுள்ள தகவல்கள் எவ்வித அடிப்படையும் அற்றவை என்று தெரிவித்துள்ளார்.
விராட் கோலி பணம் வாங்கியோ அல்லது ஏதேனும் வணிக நோக்கத்துடனோ பிரேமானந்த் மகாராஜை சந்திக்கவில்லை என்றும், ஆன்மிகத்தின் மீதான தனிப்பட்ட நம்பிக்கை மற்றும் குரு மீதான மரியாதையின் காரணமாக மட்டுமே அவர் அங்கு சென்று வருவதாகவும் விளக்கம் அளிக்கப்பட்டுள்ளது.
விராட் கோலியும் அவரது மனைவி அனுஷ்கா சர்மாவும் 2023 ஜனவரி மாதம் முதன்முதலாக பிரேமானந்த் மகாராஜை சந்தித்தனர். அதன்பின்னர் பல்வேறு சூழ்நிலைகளில் தொடர்ந்து அந்த ஆசிரமத்திற்குச் சென்று ஆசி பெற்று வந்துள்ளனர்.
குறிப்பாக, கிரிக்கெட் வாழ்க்கையின் முக்கிய தருணங்களிலும் அவர்கள் மேற்கொண்ட இந்த ஆன்மிகப் பயணங்கள் தொடர்பான புகைப்படங்கள் மற்றும் காணொளிகள் ஏற்கனவே இணையத்தில் பரவலாகப் பேசப்பட்டவை என்பது குறிப்பிடத்தக்கது.
