பிரபல இசையமைப்பாளர் அனிருத் மற்றும் காவ்யா மாறன் ஆகியோரின் திருமண வரவேற்பு (Reception) நிகழ்வு நேற்று (21) சென்னையில் பிரமாண்டமாக நடைபெற்ற நிலையில், திரையுலகப் பிரபலங்கள் பலரும் கலந்துகொண்டபோதிலும் நடிகர் தனுஷ் பங்கேற்காதது இரசிகர்களிடையே பெரும் ஏமாற்றத்தையும் பல்வேறு கேள்விகளையும் ஏற்படுத்தியுள்ளது.
இந்தியாவின் முன்னணி இசையமைப்பாளர்களில் ஒருவரான அனிருத்திற்கும், பிரபல தயாரிப்பாளர் கலாநிதி மாறனின் மகள் காவ்யா மாறனுக்கும் இடையே ஏற்பட்ட காதலுக்கு இரு வீட்டாரும் சம்மதம் தெரிவித்ததைத் தொடர்ந்து, கடந்த 11 ஆம் திகதி கிரீஸ் நாட்டில் இவர்களது திருமணம் நடைபெற்றது. நெருங்கிய உறவினர்கள் மற்றும் நண்பர்கள் மாத்திரமே குறித்த திருமண நிகழ்வில் கலந்துகொண்டனர்.
இதனைத் தொடர்ந்து, திரையுலகினர், தொழிலதிபர்கள் மற்றும் அரசியல் பிரமுகர்கள் கலந்துகொள்வதற்கு ஏதுவாக சென்னையிலுள்ள பிரபல நட்சத்திர விடுதி ஒன்றில் நேற்று வரவேற்பு நிகழ்விற்கு ஏற்பாடு செய்யப்பட்டிருந்தது. இவ்விழாவில் மணமக்கள் கோலத்தில் ஜொலித்த அனிருத் மற்றும் காவ்யா மாறனின் எளிமையான தோற்றம் இரசிகர்களை வெகுவாகக் கவர்ந்துள்ளது.

இந்த வரவேற்பு நிகழ்வில் தமிழ்நாடு முதலமைச்சர் விஜய், முன்னாள் முதலமைச்சர் எடப்பாடி பழனிசாமி, தெலங்கானா முதலமைச்சர் ரேவந்த் ரெட்டி உள்ளிட்ட முக்கிய அரசியல் தலைவர்களும், ஒட்டுமொத்த தமிழ் திரையுலகப் பிரபலங்களும் நேரில் சென்று மணமக்களை வாழ்த்தினர்.
எவ்வாறாயினும், அனிருத் திரையுலகில் அறிமுகமாவதற்கு முக்கிய காரணமாக இருந்தவரும், அவரது உறவினருமான நடிகர் தனுஷ் இந்த வரவேற்பு நிகழ்வில் கலந்துகொள்ளவில்லை. இச்சம்பவம் சமூக வலைத்தளங்களில் பேசுபொருளாக மாறியுள்ளதுடன், தனுஷின் இரசிகர்கள் இது குறித்துப் பல்வேறு கருத்துக்களைப் பதிவிட்டு வருகின்றனர்.
அனிருத் மற்றும் தனுஷ் ஆகியோருக்கு இடையே கடந்த சில வருடங்களாகவே கருத்து வேறுபாடுகள் நிலவி வருவதாகக் கூறப்பட்டு வந்தது. அத்துடன், தனது திருமணம் மற்றும் வரவேற்பு நிகழ்விற்கான அழைப்பிதழைக் கூட மக்கள் தொடர்பாளர் (PRO) ஊடாகவே தனுஷிற்கு அனிருத் அனுப்பி வைத்ததாகத் தகவல்கள் பரவின. இதன் காரணமாகவே தனுஷ் இந்த வரவேற்பு நிகழ்வைத் தவிர்த்திருக்கலாம் எனவும், இருவருக்கும் இடையிலான விரிசல் இதன் மூலம் உறுதியாகியுள்ளதாகவும் சமூக வலைத்தளங்களில் விவாதங்கள் எழுந்துள்ளன.