சர்ச்சைக்கு மத்தியில் சாதித்த தனுஷின் 'ஓம்' திரைப்படம்; இரண்டாவது நாள் வசூல் விபரம் வெளியானது

இயக்குநர் ராஜ்குமார் பெரியசாமி இயக்கத்தில் நடிகர் தனுஷ் நடிப்பில் வெளியாகியுள்ள 'ஓம்' (O.M: Operation Mole) திரைப்படம், விமர்சன ரீதியாகக் கலவையான வரவேற்பைப் பெற்றபோதிலும் வசூல் ரீதியாக இரண்டு நாட்களில் உலகளவில் 60 கோடியே 90 இலட்சம் இந்திய ரூபாவை ஈட்டியுள்ளதாகப் பாக்ஸ் ஆபிஸ் தரவுத் தளமான 'சாக்னில்க்' (Sacnilk) அறிவித்துள்ளது.

மம்மூட்டி, சாய் பல்லவி, ஸ்ரீலீலா உள்ளிட்ட பல முன்னணி நட்சத்திரங்கள் நடித்துள்ள இத்திரைப்படத்திற்கு சாய் அபயங்கர் இசையமைத்துள்ளார். கடந்த வெள்ளிக்கிழமை (20) திரையரங்குகளில் வெளியான இத்திரைப்படத்திற்கு இரசிகர்கள் மத்தியில் கலவையான விமர்சனங்களே கிடைத்துள்ளன. படத்தின் முதல் பாதி ஓரளவிற்கு வரவேற்பைப் பெற்றபோதிலும், இரண்டாம் பாதி மற்றும் உச்சக்கட்ட காட்சிகள் எதிர்பார்த்த அளவிற்கு அமையவில்லை என இரசிகர்கள் கருத்து வெளியிட்டு வருகின்றனர்.

எவ்வாறாயினும், பாக்ஸ் ஆபிஸ் வசூலில் இத்திரைப்படம் வலுவான நிலையைத் தக்கவைத்துக்கொண்டுள்ளது. 'சாக்னில்க்' இணையதளம் வெளியிட்டுள்ள தரவுகளின்படி, இரண்டாவது நாளான நேற்று (21) இத்திரைப்படம் இந்தியாவில் மாத்திரம் 15 கோடியே 40 இலட்சம் ரூபாவை வசூலித்துள்ளது. இதில் தமிழ் பதிப்பு 11 கோடியே 40 இலட்சம் ரூபாவையும், தெலுங்கு பதிப்பு 3 கோடியே 50 இலட்சம் ரூபாவையும், இந்தி பதிப்பு 50 இலட்சம் ரூபாவையும் ஈட்டியுள்ளன.

இதன் மூலம் இத்திரைப்படத்தின் இரண்டு நாட்களுக்கான இந்திய மொத்த வசூல் 38 கோடியே 90 இலட்சம் ரூபாவாக உயர்வடைந்துள்ளது. அத்துடன், வெளிநாட்டு சந்தைகளில் நேற்றைய தினம் 10 கோடி ரூபாவை வசூலித்ததன் மூலம், இரண்டு நாட்களில் வெளிநாடுகளில் மாத்திரம் 22 கோடி ரூபாவை இத்திரைப்படம் ஈட்டியுள்ளது. ஒட்டுமொத்தமாக, வெளியான இரண்டு நாட்களில் 'ஓம்' திரைப்படம் உலகளவில் 60 கோடியே 90 இலட்சம் ரூபாவை வசூலித்துள்ளதாகக் குறிப்பிடப்பட்டுள்ளது.